Mukanda wa Matayo 11:1-30
11 Hamanesele Yesu guhana malongo gudi apostolo enji 12, wakatugile, wayile nu gulongesa nu gumuanga lukuma luabonga mu membo ako.
2 Uvi mu tangua diene, Yone wakhalele mu bologo. Havile muene ndaga jiakhalele mukalagala Klisto, watumine alandudi enji
3 ha gumuhula egi: “Aye Muthu udi naye guza, nga ndo tudi naye gunengena muthu muko?”
4 Yesu waawambelele egi: “Ndenu muwambele Yone ndaga mudi muvua nu jinyi mudi mumona:
5 Ifofo idi mumona, ikata* idi muwenda, enya hute adi musagewa, ifua matshui idi muvua, athu a gufua adi mufuzumuga, lukuma luabonga nji ludi mulongesewa gudi phutu.
6 Gusuanguluga gukhale gudi muthu gashigo mumona nga gima gimoshi gudi ame giajiya gumubuisa mu gubola.”*
7 Hakhalele muvutuga alandudi a Yone, Yesu wasendesele guwambela athu mukunda nu Yone egi: “Itshi muayile mutala mu mavu a luselenga?* Tende diakhalele munyigishiwa gudi funji ba?
8 Itshi muayile mutala? Muayile mutala muthu wasudigile milele yawaha ba?* Athu ana sudiga milele yawaha ana khala mu jinzo jia mafumu.
9 Itshi muayile mutala giwa? Muayile mutala profete ba? Ngudi gumiwambela giamatshidia egi, muene udi nu ndando yavula gubalega profete.
10 Mukanda wa Nzambi udi muzuela mukunda nu muene egi: ‘Tala! Ngudi mutuma mutumiwi wami gutuama diaye,* muene mbawulondega njila gutuama diaye!’
11 Ngudi gumiwambela giamatshidia egi mukatshi dia athu agasue avalewe gudi akhetu, gushigo nu mumoshi udi wakoma gubalega Yone Mubatiji. Uvi muthu wazonda mu Ufumu wa mu dilu udi wamubalega gukoma.
12 Sendese mu masugu a Yone Mubatiji uu nu henyaha, athu ana kalagala ngolo ha gungina mu Ufumu wa mu dilu. Luko, athu anyi ana tshita ngolo, ana guwuheta.
13 Handaga Baprofete agasue nu Mukhuala wa Moize, akhalele mulongesa athu uu nu hajile Yone;
14 nga muayitshigina, nga muayituna, muene ‘Eliya udi naye guza.’
15 Muthu udi nu matshui a guvua, avue.
16 “Ngajiya gufuanesa gindongo egi nu nanyi? Gidi gifua ana azonda adi hashi ha zando adi muwambela ana ako mu dijui diakola
17 egi: ‘Tuamishigile jimbinga hagula mukine, uvi muakinyinego. Tuamiyimbidile ngimbo jia gikenene, uvi muadidilego.’
18 Luholo lumoshi nji, Yone wajile, gakhalelego mudia nu gakhalelego munua, uvi athu azuelele egi: ‘Muene udi nu demo.’
19 Mun’a muthu wajile, wakhalele mudia nu gunua, uvi athu azuelele egi: ‘Talenu! Muthu yowu wafudila gudia nu munui wa matombe. Futa dia afutshishi a gitadi nu enya gubola.’ Uvi ndunge jiana monega mu midimo yajio.”
20 Gungima Yesu wasendesele gubalela* enya mu membo anyi akalegele muene ndaga jiavula jia gushimana, handaga ene abalumuinego mitshima.
21 “Mukumbu gudi enue enya Kolazina! Mukumbu gudi enue enya gu Betesayida! Handaga gula nga ndaga jia gushimana jiakalegewe gumbo dienu, jiakalegewe mu dimbo dia Tile nu dia Sidona, nga ene abalumuine gale mitshima mualeha, nga asudigile gale ngombo, nga akhalele gale nji hashi mu fuphi.
22 Uvi ngudi gumiwambela egi, mu Lusugu lua Gusophesa, lamba dienu mbadikhala diakola gubalega dia enya gu Tile nu dia enya gu Sidona.
23 Aye Kaphelenauma, udi mutangiza egi mbawukanduishiwa uu nu mu dilu ba? Ndo sha. Aye mbawubulumuishiwa uu nu mu Malumba;* handaga gula nga ndaga jia gushimana jiakalegewe gumbo dienu, jiakalegewe gu dimbo dia Sodoma, nga dimbo diene didi guene uu nu mangino.
24 Uvi ngudi gumiwambela egi mu Lusugu lua Gusophesa, lamba dienu mbadikhala diakola gubalega dia enya gu Sodoma.”
25 Mu tangua diene, Yesu wazuelele egi: “Tata, Fumu ya dilu nu mavu, ngudi gugutumbuisa ha meso a athu agasue handaga aye wasuegele ndaga eji gudi enya ndunge nu athu atema, uvi wajimonesele gudi ana azonda.
26 Ayi Tata, handaga aye wasuangulugile ha gukalagala ngenyi.
27 Tata wanguhuile ima yagasue, gushigo nu muthu wajiya Mona muabonga, phamba Tata. Luko, gushigo nu muthu wajiya Tata muabonga, phamba Mona nu muthu yonu Mona adi mutshigina gulongesa ndaga jia Sh’enji.
28 Zenu mukut’enu agasue gudi ame, enue mudi aguhuila nu mudi mubata inemo, mbangumihana ngolo.
29 Zangulenu muhitu* wami, ame mbangumilongesa handaga ngudi muthu wahuima nu wa gudibulumuisa.* Ngenyi mbamuheta ngolo.*
30 Handaga muhitu wami ushigo lamba* ha gubata, ginemo giami gidi gialeluga.”
Mbimbi goshi'a diyiji
^ Nga “ikalaba.”
^ Nga “gumukhakhuisa.”
^ Nga “mavu a gishegele.”
^ Nga “milele ya ndando?”
^ Mu Greke: “gu phala yaye.”
^ Nga “gudingila.”
^ Nga “Hadese,” yakotelesa egi, fundo ana funda athu agasue. Tala Ukoteleshi wa Mbimbi.
^ Nga “muphando.”
^ Mu Greke: “muthu wa mutshima wa gudibulumuisa.”
^ Nga “mionyo yenu mbayiheta ngolo.”
^ Nga “ushigo wanema.”
