Mukanda wa Matayo 12:1-50
-
Yesu udi “Fumu wa Lusugu lua Guhuluguga” (1-8)
-
Yesu wasaga yala wakhalele nu koko dia gufua (9-14)
-
Muenya mudimo yonu Nzambi ana guzumba (15-21)
-
Yesu wakaya bademo mu ukuateshi wa nyuma ya Nzambi (22-30)
-
Gubola gunu Nzambi gajiyilego gutotesela athu (31, 32)
-
Mutshi wana jiyiwa gu mabundu enji (33-37)
-
Gijiyishilo gia Yona (38-42)
-
Tangua nyuma yabola yana vutuga (43-45)
-
Gin’a Yesu nu aphangi’a Yesu (46-50)
12 Mu tangua dinyi, Yesu wakhalele mubalega mu mahia a mbuto jia ble mu Lusugu lua Guhuluguga. Alandudi enji avuile nzala, hene asendesele guhela mbuto jia ble ha gudia.
2 Hamonele Afalese ndaga eyi, amuwambelele egi: “Tala! Alandudi aye adi mutshita ndaga mukhuala udi mutunyisa ha gukalagala mu Lusugu lua Guhuluguga.”
3 Muene waahudile egi: “Enue khenji muatangelego ndaga yakalegele Davidi nu athu enji tangua akhalele nu nzala ba?
4 Muene wanginyine monzo ya Nzambi, adile mapha ahanewe gudi Nzambi,* uvi mukhuala wakhalelego gumuhana njila nu athu enji ha gudia mapha ene, phamba nganga-nzambi wakhalele naye guadia.
5 Luko, khenji muatangele galego mu Mukhuala egi mu Lusugu lua Guhuluguga, nganga-nzambi jinyi jiana kalagala mudimo mu tempelo, jiana shiya Mukhuala wa Lusugu lua Guhuluguga, uvi yana khala ndo ndaga yabola ba?
6 Uvi ngudi gumiwambela egi ndaga ya ndando yavula gubalega tempelo idi haha.
7 Nga muajiyile ukoteleshi wa mbimbi eji: ‘Ngana tshigina khadilo dia khenda uvi milambu ndo,’ nga muafishilego athu awa atshitshilego gubola milonga.
8 Handaga Mun’a muthu udi Fumu wa Lusugu lua Guhuluguga.”
9 Hakatugile muene fundo dinyi, wayile mu sinagoga yawo.
10 Mu sinagoga yene, muakhalele nu yala mumoshi wakhalele nu koko dia gufua.* Ene ahudile Yesu egi: “Mukhuala udi gutuhana njila ha gusaga muthu mu Lusugu lua Guhuluguga ba?” Amuhudile ngenyi ha gukamba ndaga ya gumufundjila.
11 Yesu waawambelele egi: “Nanyi mukatshi dienu gula udi nu gimeme gimoshi, uvi giene giabua mu wina mu Lusugu lua Guhuluguga, muene gashigo muya gugikamba ha gugizola?
12 Muthu udi nu ndando yavula gubalega gimeme. Mukhuala udi gutuhana diago njila ha gukalagala ndaga yabonga mu Lusugu lua Guhuluguga.”
13 Gungima, Yesu wawambelele yala muene egi: “Sununa koko diaye.” Yala muene wasunuine koko dienji. Koko diene diasagewe, diabuile luholo lumoshi nu koko diko.
14 Uvi Afalese azogele hanze, ayile giphungi ha gumushiya.
15 Tangua diajiyile Yesu matangi awo, wakatugile ha fundo diene. Athu avula amulanduile, waasagele mukut’awo agasue.
16 Uvi Yesu waatunyishile egi awambelago nga muthu gula muene udi nanyi.
17 Yakhalele mukunda nu gutagenesa ndaga jiadiangele guzuela profete Yeshaya egi:
18 “Talenu muenya mudimo wami ngatombele, ngana gumuzumba, muene wana gungusuanguluisa!* Mbangumuhana nyuma yami, muene mbawulongesa ndaga jiabonga mu ifutshi.
19 Muene mbagashigo mumana* nu athu, mbagashigo nji mukaluluga. Nga muthu mumoshi mbagashigo muvua dijui dienji mu njila jiakoma.
20 Muene mbagashigo mubogola ditetete didi dia gufugula, mbagashigo mujima shinga ya muenda ushigo mulema muabonga uu nu tangua mbadibinga muene ha guhaga ndaga jiabonga.
21 Enya ifutshi mbaahaga felela mu jina dienji.”
22 Amubatelele muthu mumoshi wakhalele nu demo. Muthu muene wakhalele gifofo, wakhalele nji gatabu.* Yesu wamusagele, hene muthu muene wasendesele guzuela nu gumona.
23 Athu agasue akhalele hene ashimanele, azuelele egi: “Muthu owu wajiya gukhala Mun’a Davidi ba?”
24 Tangua Afalese avile ndaga eyi, azuelele egi: “Muthu owu udi muzola bademo mu ngolo jia Belezebula,* fumu wa bademo.”
25 Yesu wajiyile matangi’awo, hene waawambelele egi: “Ufumu wagasue udi wa gudikhapha, wana gufua. Luko, gushigo dimbo nga inzo, gula idi ya gudikhapha yajiya gumagana.
26 Luholo lumoshi nji, gula Satana udi mukaya Satana, udi gudiluisa muene hakhenji; na luholo lutshi ufumu wenji wajiya gumagana?
27 Luko, gula ame ngudi muzola bademo mu ngolo jia Belezebula, alandudi enu* giwa adi guazola mu ngolo jia nanyi? Gishina giene, ene mbaakhala manzuji enu.
28 Uvi gula ngudi mukaya bademo mu ukuateshi wa nyuma ya Nzambi, jiyenu egi Ufumu wa Nzambi wamijila gale.
29 Luholo lutshi muthu wajiya gungina monzo ya muenya ngolo ha gumutambula ima yenji? Udi naye thomo gumujitshiga ngonji, gungima wajiya giwa gukuya ima yenji.
30 Muthu wagasue gashigo gu khanda yami, udi mbalagaji yami. Muthu wagasue gashigo mubungisa hamoshi nu ame, udi mumuanga.
31 “Hene ngudi gumiwambela egi, Nzambi mbawutotesela athu gubola guawo guagasue nu mashingo awo agasue. Uvi muthu udi mushingana nyuma ya Nzambi, muene mbagashigo gumutotesela.
32 Ha gufezegesa, muthu wagasue udi muzuela mbimbi jiabola mukunda nu Mun’a muthu, Nzambi mbawumutotesela. Uvi muthu wagasue udi muzuela ndaga jiabola mukunda nu nyuma ya Nzambi, muene mbagashigo gumutotesela mu masugu awa* nu mu masugu adi muza.
33 “Tshitenu hagula mutshi ukhale wabonga, mabundu enji akhale nji abonga; nga ndo mutshi ukhale wafukha, mabundu enji akhale nji afukha, handaga mutshi wana gujiyiwa gu mabundu enji.
34 Enue ana mavambu, luholo lutshi muajiya guzuela ndaga jiabonga hamudi enue athu abola? Handaga kano diana zuela ndaga jidi jia guzala mu mutshima.
35 Muthu wabonga wana zuela ndaga jiabonga, handaga mutshima wenji udi waguzala pha nu ndaga jiabonga. Uvi muthu wabola wana zuela ndaga jiabola, handaga mutshima wenji udi wa guzala pha nu ndaga jiabola.
36 Ngudi gumiwambela egi mu Lusugu lua Gusophesa, athu mbaasophesewa mukunda nu mbimbi jiagasue jiabola jidi ene muzuela;
37 handaga Nzambi mbawugutamega egi udi muthu wabonga mukunda nu mbimbi jiaye, nga ndo, muene mbawuguhana ndola mukunda nu mbimbi jiaye.”
38 Gungima, alongeshi a mikhuala nu Afalese amuwambelele egi: “Mulongeshi, tuatshigina egi utuhane gijiyishilo.”
39 Uvi Yesu waavutudile gamba: “Gindongo gia athu abola ashigo agujinginyina gudi Nzambi gidi mulandula gukamba gijiyishilo, uvi gushigo nga gijiyishilo gimoshi mbagiahanewa, phamba gijiyishilo gia profete Yona.
40 Gifua muakhalele Yona mu vumo dia ishui yakoma masugu thathu nu phipha thathu, Mun’a muthu nji mbawukhala ngenyi goshi’a mavu masugu thathu nu phipha thathu.
41 Mu lusugu lua gusophesa, enya gu Ninive mbaafuzumuga hamoshi nu gindongo egi nu mbaagifuisa milonga, handaga tangua avuile ndaga jialongesele Yona, ene abalumuine mitshima. Uvi gudi nu muthu haha wabalega Yona gukoma.
42 Mu lusugu lua gusophesa, fumu wa mukhetu wa gu sud mbawufuzumuga hamoshi nu gindongo egi nu mbawugifuisa milonga, handaga wakatugile gu gisugishilo gia mavu ha guza mutegelela ndunge jia Solomo. Uvi gudi nu muthu haha wabalega Solomo gukoma.
43 “Gula nyuma yabola yazoga gudi muthu, yana guya mu mafundo a gimigina ha gukamba fundo yajiya gukhala, uvi yanago gumona fundo diene.
44 Gungima, yana zuela egi ngudi muvutuga gu inzo yami, fundo ngakatugile. Tangua yana vutuga, yana sanga inzo ya githuhu, yagukomba nu yagulondega muabonga.
45 Gungima, yana guya muzula nyuma jiko sambadi jiayibalega gubola, jiana ngina mukatshi, jikhadi muene; gu gisugishilo muthu muene wana gubola muavula gubalega luholo luakhalele muene thomo. Ndaga mbajikhala nji ngenyi gudi athu a mu gindongo egi giabola.”
46 Hakhalele Yesu muzuela nu athu avula, gin’enji nu aphangi’enji akhalele hanze, akhalele mutshigina guzuela n’enji.
47 Muthu mumoshi wamuwambelele egi: “Tala! Gin’aye nu aphangi’aye adi hanze, adi mutshigina guzuela naye.”
48 Uvi Yesu wamuhudile egi: “Gin’ami udi nanyi? Aphangi’ami adi akuatshi?”
49 Wasunuine koko gu khanda yakhalele alandudi enji, wazuelele egi: “Gin’ami nu aphangi’ami enyawa!
50 Handaga muthu wagasue udi mukalagala gutshigina gua Tata wami udi mu dilu, muene phangi’ami wa yala, phangi’ami wa mukhetu nu muene gin’ami.”
Mbimbi goshi'a diyiji
^ Nga “mapha a gijila.”
^ Nga “dia gimigina.”
^ Nga “monyo wami wana suanguluga n’enji.”
^ Nga “mutenda.”
^ Nga “mbobo.”
^ Jina diko dia Satana.
^ Nga “an’enu.”
^ Nga “mu gindongo egi.” Tala Ukoteleshi wa Mbimbi.
