Mukanda wa Matayo 13:1-58
-
IFEZEGESELO YATADILA UFUMU (1-52)
-
Gifezegeselo gia mukunyi wa mbuto (1-9)
-
Mukunda natshi Yesu wakhalele mulongesa mu ifezegeselo? (10-17)
-
Ukoteleshi wa gifezegeselo gia mukunyi wa mbuto (18-23)
-
Gifezegeselo gia ble nu mayiji abola (24-30)
-
Gifezegeselo gia lumbale lua mutada nu levire (31-33)
-
Yesu wataganesele profesi luholo alongesele mu ifezegeselo (34, 35)
-
Ukoteleshi wa gifezegeselo gia ble nu gia mayiji abola (36-43)
-
Umonyi wasuegewe mu dihia nu musanga wawaha (44-46)
-
Wanda wa jishui (47-50)
-
Ima ihe-ihe nu ima ikulu ya mu gibambelo gia ima ya ndando (51, 52)
-
-
Yesu watunyiwa gumbo diawo (53-58)
13 Mu lusugu luene, Yesu wazogele monzo, wayile mukhala gu khulo ya kianga.
2 Athu avula diago ayile gudi muene. Wanginyine mu wato, wakhalele hashi. Athu ene agasue akhalele gu khulo ya kianga.
3 Gungima, wasendesele gualongesa ima yavula mu ifezegeselo. Wazuelele egi: “Muthu mumoshi wayile mukuna mbuto.
4 Hakhalele muene mukuna, mbuto jiko jiabuile mu khulo ya njila. Tunjila tuajile, tuajidile.
5 Jiko jiabuile mu maseso, jiashiphilego ha guzoga handaga mavu akhalelego avula.
6 Uvi hazogele muanya, jiamiginyine, jiafile handaga jiakhalelego nu miji.
7 Mbuto jiko jiabuile moshi’a mitshi ya miya. Mitshi yene yakudile, yajilangele.
8 Uvi mbuto jiko jiabuile mu mavu abonga. Hene, jiazolele mbuto jiko. Jiko 100, jiko 60, jiko 30.
9 Muthu udi nu matshui a guvua, avue.”
10 Gungima, alandudi asuenele gudi muene, amuhudile gamba: “Mukunda natshi udi gualongesa mu ifezegeselo?”
11 Muene waawambelele egi: “Enue Nzambi wamihuile luendu lua gukotelesa ndaga jia gisuegi jia Ufumu wa mu dilu, uvi ene gaahanelego.
12 Handaga muthu udi nu gima, mbaamuhana gima giko, muene mbawubua nayo yavula. Uvi muthu gashigo nu gima, nu giene gidi nagio muene, mbaamutambula nagio.
13 Gishina giene ngudi gualongesa mu ifezegeselo; handaga adi mutala, uvi ashigo mumona. Adi mutegelela, uvi ashigo muvua nu ashigo mukotelesa.
14 Ngenyi adi mutagenesa ndaga jiadiangele guzuela profete Yeshaya egi: ‘Enue mbamutegelela, uvi mbamushigo mukotelesa nga gima, enue mbamutala, uvi mbamushigo mumona nga gima.
15 Handaga mitshima ya athu awa yakolele gale. Ene ashitshile gale matshui awo nu abategele* gale meso awo, hagula amonyigo nga hazonda nu meso awo, avuigo nga hazonda nu matshui awo, akotelesago nga hazonda nu mitshima yawo nu hagula avutugago gudi ame nguasage.’
16 “Uvi enue mudi nu gusuanguluga handaga meso enu adi mumona nu matshui enu adi muvua.
17 Ngudi gumiwambela giamatshidia egi baprofete avula nu athu ako abonga akambele gumona ndaga eji mudi mumona, uvi ajimonelego. Akambele guvua ndaga eji mudi muvua, uvi ajivuilego.
18 “Henyaha tegelelenu ukoteleshi wa gifezegeselo gia muthu wakunyine mbuto.
19 Mbuto jinyi jiabuile mu khulo ya njila jidi muthu udi mutegelela lukuma lua Ufumu, uvi gashigo mukotelesa; muthu wabola waza wakatula ndaga jiakunyiwe mu mutshima wenji.
20 Mbuto jinyi jiabuile mu maseso jidi muthu udi muvua mbimbi ya Nzambi, wayitshigina muphushi nu gusuanguluga guagasue.
21 Uvi luholo mbimbi yahagelego miji mu mutshima wenji, muene udi mukolesela mu tangua diazonda. Gungima haza malamba nu usageshi mukunda nu mbimbi yene, muene wana gubua.
22 Mbuto jinyi jiabuile moshi’a mitshi ya miya jidi muthu udi muvua mbimbi, uvi gikenene gia ndaga jia ha mavu awa* nu ngolo jia umonyi jidi muhuiga, yana kanga mbimbi njila, ngenyi mbimbi yanago guhaga mabundu.
23 Uvi mbuto jinyi jiabuile mu mavu abonga jidi muthu udi muvua mbimbi, udi guyikotelesa nu udi muhaga mabundu, ako 100, ako 60, ako 30.”
24 Yesu waahanele gifezegeselo giko egi: “Ufumu wa mu dilu wajiya gukhala gifua muthu wakunyine mbuto jiabonga mu dihia dienji.
25 Mu phipha tangua athu akhalele gu tulo, mbalagaji wenji wajile, wakunyine mayiji abola mukatshi dia ble, wayile.
26 Tangua ble yazogele nu yahagele mabundu, mayiji abola nji azogele.
27 Enya mudimo ayile muwambela fumi’a dihia egi: ‘Fumu, aye wakunyile mbuto jiabonga mu dihia diaye, na luholo lutshi mayiji abola azoga muene?’
28 Muene waawambelele egi: ‘Mbalagaji watshitshile ngenyi.’ Enya mudimo amuwambelele egi: ‘Watshigina egi tuye tukatule mayiji ene abola ba?’
29 Muene waawambelele egi: ‘Ndo, handaga tangua mudi muvuza mayiji abola, muajiya nji guvuza ble.
30 Bembenu yagasue iyadi ikule hamoshi uu nu mu sungi ya gukatula mbuto. Mu sungi yene, mbanguwambela athu ana gukatula mbuto egi: Katulenu thomo mayiji abola, muajitshige mu itungu ha guamba tshuya, gungima bungisenu ble, muyimbe mu mukala wami.’”
31 Yesu waahanele gifezegeselo giko egi: “Ufumu wa mu dilu udi gifua lumbale lua mutada luazanguile muthu ha gukuna mu dihia dienji.
32 Lumbale luene luakhala luazonda gubalega mbale jiagasue; uvi gula luazoga, luana balega ivunza yagasue gukoma, gungima luana gubua mutshi. Tunjila tua gosa tuana guza mutunga yanzu yato mu thango jienji.”
33 Yesu waahanele gifezegeselo giko egi: “Ufumu wa mu dilu udi gifua levire yazanguile mukhetu mumoshi, wayifutula mu izongelo ya phupha thathu yakoma. Gungima phupha yene yagasue yajimbile.”
34 Yesu walongesele athu ndaga eji jiagasue mu ifezegeselo. Yadiago, tangua diagasue diakhalele muene mulongesa, wakhalele muhana ifezegeselo.
35 Ngenyi, Yesu wataganesele ndaga jiadiangele guzuela profete egi: “Mbangukangula kano diami ha gulongesa mu ifezegeselo; mbanguzuela ndaga jiakhalele jia gusuega sendese gu gisendeselo.”*
36 Walezele athu ha guvutuga, gungima wanginyine monzo. Alandudi enji asuenele gudi muene, amuwambelele egi: “Tukotelesele gifezegeselo gia mayiji abola mu dihia.”
37 Waavutudile egi: “Muthu wakunyine mbuto jiabonga udi Mun’a muthu;
38 dihia didi mavu awa. Mbuto jiabonga jidi ana a Ufumu, uvi mayiji abola adi ana a muthu wabola,
39 mbalagaji wakunyile mayiji abola udi Diabulu. Sungi ya gukatula mbuto idi gisugishilo gia mavu awa.* Athu adi mukatula mbuto adi anjelo.
40 Luholo mayiji abola ana bungishiwa ha gumbiwa ha tshuya, mbayikhala nji ngenyi gu gisugishilo gia mavu awa.*
41 Mun’a muthu mbawutuma anjelo enji ha gukatula mu Ufumu wenji ima yagasue idi mubuisa mu gubola nu athu agasue adi mushiya mikhuala.
42 Ene mbaabishila ha jigo dia tshuya. Guene mbaakhala mudila nu gudidia mazo.
43 Mu tangua diene, athu abonga mbahenya gifua muanya mu Ufumu wa Sh’awo. Muthu udi nu matshui a guvua, avue.
44 “Ufumu wa mu dilu udi gifua umonyi wasuegewe mu dihia. Muthu wawumona nu wawusuega luko. Muene udi nu gusuanguluga guavula, hene waya musumbisa ima yenji yagasue hagula asumbe dihia diene.
45 “Ufumu wa mu dilu udi nji gifua muenya mungenda udi muwenda ha gukamba misanga yawaha.
46 Tangua diaheta muene musanga wa ndando yavula, waya muphushi ha gusumbisa ima yagasue adi nayo ha guwusumba.
47 “Luko, Ufumu wa mu dilu udi gifua wanda wa jishui wambiwa mu muta, wakuata jishui jia maluholo agasue.
48 Hazala wanda wene, mayanga awunana gonze, akhala hashi, atomba jishui jiabonga ajimba mu misanda, uvi jishui jiabola ajibishila.
49 Gu gisugishilo gia mavu awa,* ndaga mbajikalegewa nji ngenyi. Anjelo mbaakhaphumuna athu abola nu athu abonga.
50 Luko, ene mbaabishila athu abola ha jigo dia tshuya. Guene mbaakhala mudila nu gudidia mazo.”
51 Yesu waahudile egi: “Muakotelesa ndaga eji jiagasue ba?” Alandudi amuvutudile egi: “Ayi.”
52 Gungima, waawambelele egi: “Gula idi ngenyi, mulongeshi wagasue walongesewa ndaga jia Ufumu wa mu dilu, udi gifua fumi’a inzo wazola ima ihe-ihe nu ima ikulu mu gibambelo gienji gia ima ya ndando.”
53 Hamanesele Yesu guhana ifezegeselo eyi, wakatugile ha fundo diene.
54 Tangua diavutugile muene gumbo diawo, wasendesele gulongesa athu mu sinagoga yawo. Athu adihudile mangololo, azuelele egi: “Gui muthu yowu gahetshi ndunge jia luholo elu nu ngolo jia gutshita ndaga eji jia gushimana?
55 Muene gashigo mun’a muenya mabaya ba? Gin’enji gashigo Madiya ba? Aphangi’enji a mala ashigo Yakoba nu Yozefe nu Simona nu Yudasa ba?
56 Aphangi’enji a akhetu ashigo mukatshi dietu ba? Gui giwa muthu yowu wahetele ngolo eji jiagasue?”
57 Hene asendesele gumutuna. Uvi Yesu waawambelele egi: “Profete wana nemesewa mafundo agasue, uvi athu a mu dimbo diawo nu a mu inzo yawo anago gumunemesa.”
58 Yesu gakalegelego ndaga jiavula jia gushimana ha fundo diene, handaga ene akhalelego musha gutshigina guawo gudi muene.
Mbimbi goshi'a diyiji
^ Nga “akangile.”
^ Nga “jia gindongo egi.” Tala Ukoteleshi wa Mbimbi.
^ Nga ndo yajiya gukhala egi, “gisendeselo gia mavu.”
^ Nga “gindongo egi.” Tala Ukoteleshi wa Mbimbi.
^ Nga “gindongo egi.” Tala Ukoteleshi wa Mbimbi.
^ Nga “gindongo egi.” Tala Ukoteleshi wa Mbimbi.
