Mukanda wa Matayo 15:1-39
15 Afalese nu alongeshi a mikhuala akatugile gu Yelusalema, ajile mumona Yesu; amuhudile egi:
2 “Mukunda natshi alandudi aye ashigo munemesa shigu jia akhakh’etu? Ha gufezegesa, ene anago guweva* mago awo gutuama egi adie.”
3 Yesu waawambelele egi: “Uvi enue mukunda natshi mudi mushiya mikhuala ya Nzambi ha gunemesa shigu jienu jia mambuta?
4 Ha gufezegesa, Nzambi wazuelele egi: ‘Nemesa sh’aye nu gin’aye.’ Wazuelele luko egi, ‘Muthu udi mushinga* sh’enji nga gin’enji udi naye gushiyiwa.’
5 Uvi enue mudi muzuela egi: ‘Muthu wagasue udi muwambela sh’enji nga gin’enji egi: “Gima giagasue ngudi nagio, ginyi giajiya gugukuatesa gidi mulambu ngalayele ha guhana Nzambi,”
6 muene gashigo naye gunemesa sh’enji nga hazonda.’ Ngenyi, mukunda nu shigu jienu jia mambuta, mushigo muzula mbimbi ya Nzambi nu ndando.
7 Enue enya mambo, gishina giene Yeshaya wadiangele guzuela mukunda nu enue egi:
8 ‘Athu awa adi gungunemesa phamba gu ivungo,* uvi mitshima yawo idi gualeha nu ame.
9 Ene adi mulaba gulandula gungukombelela, handaga malongo adi mulongesa ene adi shigu jia athu.’”
10 Gungima, Yesu watamegele athu avula akhalele hehi, waawambelele gamba: “Tegelelenu nu kotelesenu muabonga ndaga eyi:
11 Ima yana ngina mu kano dia muthu, ishigo yene yana gumubolesa, uvi ima yana zoga mu kano dienji yene yana gumubolesa.”
12 Gungima, alandudi ajile gumuwambela egi: “Udi mujiya egi ndaga wazuedi jiahanyi Afalese khabu ba?”
13 Yesu waavutudile egi: “Mutshi wagasue wakunyiwego gudi Tata wami wa mu dilu, mbawuvujiwa.
14 Abembenu. Ene adi atuameji a ifofo. Gula gifofo gidi mutuameza gifofo n’a muko, muyadi’awo mbaabua mu wina.”
15 Phetelo wamulezele egi: “Tukotelesele gifezegeselo egi wahana.”
16 Yesu waavutudile egi: “Nu enue nji khenji mukotelesago ba?
17 Enue muanago gujiya egi ima yagasue yana ngina mu kano yana guya mu vumo, gungima yana bishidiwa ba?
18 Ima yana zoga mu kano yana katuga mu mutshima. Yene yana buisa muthu usala.
19 Ha gufezegesa, matangi abola, gushiya muthu nu uthambi nu ndaga jia musonyi* nu unzangi nu uthemua wa mambo nu gushingana Nzambi, yana gukatuga mu mutshima.
20 Ima eyi yene yana gubuisa muthu usala, uvi gutuna* guweva mago ha gudia guanago gubuisa muthu usala.”
21 Yesu wakatugile ha fundo dinyi, wayile gu khanda ya Tile nu Sidona.
22 Mukhetu mumoshi wa gu khanda inyi, muenya gu Fenisia, wajile gudi Yesu. Wakalugile egi: “Fumu, Mun’a Davidi, nguvile khenda. Mun’ami wa mukhetu udi nu demo didi gumusagesa mangololo.”
23 Uvi Yesu gamuvutudilego nga mbimbi imoshi. Hene alandudi enji asuenele gudi muene, amuwambelele egi: “Muwambele aye, handaga muene udi gutulandula nu gutushila matululu.”
24 Yesu wavutudile egi: “Nzambi gangutuminego gudi athu agasue, wangutumine phamba gudi imeme ya monzo ya Isalele yatotele.”
25 Uvi mukhetu wajile mufugama gutuama dienji, wazuelele egi: “Fumu, ngukuatese!”
26 Yesu wamuwambelele egi: “Ishigo yatagana ha guzangula mapha a ana ha guabishidila ana a jimbua.”
27 Mukhetu muene wazuelele egi: “Idi ngenyi Fumu, uvi ana a jimbua ana gudia isesu ya ima yana gubua goshi’a mesa a mafumu awo.”
28 Gungima Yesu wamuwambelele egi: “Mukhetu, gutshigina guaye gudi guakola; ndaga jigukalegewe gifua luholo watogi.” Mu tangua diene, mun’enji wa mukhetu wavile muabonga.
29 Yesu wakatugile ha fundo diene, wayile hehi nu kianga gia Galilea, wakandugile holu dia mulundu, wakhalele guene.
30 Gungima, athu avula asuenele gudi muene; amubatelele ikata* nu athu akhalele nu mago a gufua nu ifofo nu mbobo* nu athu avula akhalele nu misongo. Abatele athu ene mu malu a Yesu, muene waasagele.
31 Hene athu adihudile mangololo ha gumona luholo mbobo jiakhalele muzuela, athu a mago agufua musagewa, ikata muwenda nu ifofo mumona, atumbuishile Nzambi wa Isalele.
32 Yesu watamegele alandudi enji, waalezele egi: “Ngudi muvila athu awa khenda, handaga atshitshi gale masugu thathu nu ame uvi ashigo nga nu gima gia gudia. Ngajiyilego guaavutula nzala, gula ndo ajiya gulehuga mu njila.”
33 Uvi alandudi amuwambelele egi: “Dimbo didi gualeha, gui tuajiya guheta mapha avula ajiya guta ha gudisa athu awa agasue?”
34 Yesu waahudile egi: “Mapha guvula gutshi mudi nawo?” Ene amuvutudile egi: “Tudi nu mapha sambadi nu ndambo ya jishui.”
35 Hene, Yesu wawambelele athu ha gukhala hashi.
36 Wazanguile mapha sambadi nu jishui, wahanele Nzambi mersi. Gungima, waabatuile, waahanele gudi alandudi, alandudi a ahanele gudi athu.
37 Mukut’awo agasue adile nu akutshile. Gungima, anonele itshinyi yasalele, yakhalele inda* sambadi yakoma ya guzala.
38 Athu adile akhalele 4 000, uvi akhetu nu ana azonda atangewego.
39 Gu gisugishilo, Yesu wawambelele athu agasue ha guya. Gungima, wanginyine mu wato, wayile gu khanda ya Magadana.
Mbimbi goshi'a diyiji
^ Yakotelesa egi, guweva mago gifua muakhalele mutoga shigu jia enya Yuda.
^ Nga “udi musegulula.”
^ Nga “ivungu.”
^ Mu Greke: porneya. Tala Ukoteleshi wa Mbimbi.
^ Yakotelesa egi, gutuna guweva mago gifua muakhalele muzuela shigu jia enya Yuda.
^ Nga “ikalaba.”
^ Nga “gatabu.”
^ Nga “inda ya gubambela ima ya gudia.”
