Mukanda wa Matayo 16:1-28
-
Athu atoga Yesu ha guahana gijiyishilo gia mu dilu (1-4)
-
Yesu watemesa alandudi mukunda nu levire ya Afalese nu Asadoke (5-12)
-
Yesu wahana Phetelo saphi jia Ufumu (13-20)
-
Hungu diatungiwa holu dia seso (18)
-
-
Yesu wadiangela guzuelela gufua guenji (21-23)
-
Ndaga jidi naye gutshita muthu ha gubua mulandudi wa Yesu wa giamatshidia (24-28)
16 Gungima, Afalese nu Asadoke ajile gudi Yesu ha gumutela muheto. Amutogele ha guahana gijiyishilo gia mu dilu.
2 Yesu waawambelele egi: “Mu ngueze, muana zuela egi: ‘Hamene guma mbagutshia muabonga, handaga dilu didi diabenga.’
3 Mu gimenegena muana zuela egi: ‘Guma guza mukhala guahuma nu mvula iza munoga, handaga dilu didi diabenga nu didi nu matuta avula.’ Enue muana gujiya gukotelesa luholo matuta adi gosa, uvi muana gujiyago gukotelesa ijiyishilo ya tangua.
4 Gindongo gia athu abola ashigo agujinginyina gudi Nzambi, gidi mulandula gukamba gijiyishilo, uvi gushigo nga gijiyishilo gimoshi mbagiahanewa phamba gijiyishilo gia Yona.” Gungima, Yesu waabembele, wayile genji.
5 Alandudi azawugile ha sambua dia kianga, uvi abuitshile mutshima ha guzangula mapha.
6 Yesu waawambelele egi: “Kangulenu meso, temenu mukunda nu levire ya Afalese nu Asadoke.”
7 Alandudi asendesele guzuela egi: “Tuazanguilego mapha.”
8 Yesu wajiyile ndaga yene, waahudile egi: “Enue enya gutshigina guazonda, mukunda natshi mudi muzuela egi muazanguilego mapha?
9 Khenji mukotelesago ba? Mushigo muwunguluga mapha thano athu 5 000 adile nu guvula gua inda yakoma muazalesele?
10 Nu mapha sambadi athu 4 000 adile nu guvula gua inda* yakoma muazalesele?
11 Mukunda natshi muakoteleselego egi ngakhalelego muzuelela mapha? Uvi temenu mukunda nu levire ya Afalese nu Asadoke.”
12 Hene, akotelesele egi wakhalele guawambela ha gutemena malongo a Afalese nu a Asadoke, uvi yakhalelego mukunda nu levire ya mapha.
13 Tangua Yesu nu alandudi enji ahetele gu Sezalea ya Filiphi, waahudile egi: “Athu adi muzuela egi Mun’a muthu udi nanyi?”
14 Azuelele egi: “Athu ako adi muzuela egi Yone Mubatiji, ako egi Eliya, uvi ako egi Yelemiya nga ndo profete muko.”
15 Muene waahudile egi: “Uvi enue giwa mudi muzuela egi ngudi nanyi?”
16 Simona Phetelo wamuwambelele egi: “Aye udi Klisto, Mun’a Nzambi wa monyo.”
17 Yesu wamuwambelele egi: “Khala nu gusuanguluga, Simona mun’a Yona, handaga ishigo muila nu mahatshi* aguwambela ndaga eyi, uvi Tata wami udi mu dilu waguwambela.
18 Ngudi guguwambela luko egi: Aye udi Phetelo, holu dia seso edi, hene mbangutunga hungu diami. Mifulo ya Malumba* nji mbayishigo mubalega hungu diene ngolo.
19 Mbanguguhana saphi jia Ufumu wa mu dilu. Ndaga yagasue mbawujitshiga ha mavu, mbayikhala yajitshigiwe gale mu dilu. Ndaga yagasue mbawujitulula ha mavu, mbayikhala yajituluiwe gale mu dilu.”
20 Gungima, Yesu walezele alandudi enji egi awambelago nga muthu mumoshi egi muene udi Klisto.
21 Sendese tangua dinyinyi, Yesu wasendesele guwambela alandudi enji egi udi naye guya gu Yelusalema ha gumonesewa malamba avula gudi malemba a athu nu mafumu a nganga-nzambi nu alongeshi a mikhuala, udi naye nji gushiyiwa. Uvi mu lusugu lua thathu mbawufuzumuga.
22 Phetelo wayile n’enji mu khanda, wasendesele gumuwamba egi: “Fumu, uzuedigo ngenyi. Ndaga jia luholo elu mbajishigo gugubuila nga hazonda.”
23 Uvi Yesu wawasele Phetelo dikunda, wamuwambelele egi: “Balega gungima diami, Satana! Aye udi gikhakhuishilo mukunda nu ame, handaga matangi’aye ashigo a Nzambi, uvi a athu.”
24 Gungima, Yesu wawambelele alandudi enji egi: “Gula muthu watshigina gungulandula, udi naye gudituna, azudi mutshi wenji wa lamba,* alandula gunguhata.
25 Handaga muthu udi mutshigina guhuluisa monyo wenji, mbawuwutotesa. Uvi muthu watotesa monyo wenji mukunda nu ame, mbawuwuheta.
26 Gubonga gutshi muthu wajiya guheta gula waheta mavu agasue, uvi watotesa monyo wenji? Nga ndo, gima gitshi muthu mbawuhana mukunda nu monyo wenji?
27 Handaga Mun’a muthu udi naye guza mu gutumbuga gua Sh’enji nu anjelo enji. Muene mbawushimbiga muthu wagasue gifua mudi makalegelo enji.
28 Ngudi gumiwambela giamatshidia egi, athu ako mukatshi dia athu adi haha, mbaashigo mufua gutuama egi amone thomo Mun’a muthu muza mu Ufumu wenji.”
Mbimbi goshi'a diyiji
^ Nga “inda ya gubambela ima ya gudia.”
^ Nga “muthu.”
^ Nga “Hadese,” fundo ana funda athu agasue. Tala Ukoteleshi wa Mbimbi.
^ Tala Ukoteleshi wa Mbimbi.
