Mukanda wa Matayo 17:1-27
17 Gungima dia masugu samano, Yesu wazudile Phetelo nu Yakoba nu phangi’enji Yone, wayile nawo holu dia mulundu waleha. Akhalele guene ene hakhawo.
2 Gungima, Yesu wasombegesele gutuama diawo; phala yenji yasendesele guhenya gifua tangua. Milele yenji ya holu yasendesele guhenya* gifua muanya.
3 Mu tangua diene, Moize nu Eliya azogele. Akhalele muta maga nu Yesu.
4 Phetelo wawambelele Yesu egi: “Fumu, idi ndaga yabonga egi tukhale getu haha. Gula watshigina, ngudi mutunga tenta thathu, imoshi yaye, iko ya Moize, iko ya Eliya.”
5 Hakhalele muene muzuela, tuta dila kedi-kedi diaatshuigile. Dijui diazogele mu tuta diene, diazuelele egi: “Yowu Mun’ami ngana zumba muavula, wana gungusuanguluisa. Mutegelelenu.”
6 Tangua alandudi avuile ngenyi, afugamene, afulumigile phala hashi, avuile woma wavula.
7 Gungima Yesu wasuenele gudi ene, waakuatele, waawambelele egi: “Zugenu. Muvuigo woma.”
8 Tangua athuphuile meso, amonelego nga muthu muko phamba Yesu.
9 Hakhalele ene mubulumuga gu mulundu, Yesu waalezele egi: “Muwambelago nga muthu mungoshi vizio eyi uu nu tangua Mun’a muthu mbawufuzumuga gu gufua.”
10 Uvi alandudi amuhudile egi: “Mukunda natshi giwa alongeshi a mikhuala ana zuela egi Eliya udi naye thomo guza?”
11 Yesu waavutudile egi: “Yadiago, Eliya udi naye guza, muene mbawulondega ima yagasue.
12 Uvi ngudi gumiwambela egi Eliya wajile gale, uvi ene amujiyilego, amukalegele yagasue atshiginyile. Luholo lumoshi nji, ene mbaamonesa Mun’a muthu lamba.”
13 Alandudi akotelesele giwa egi wakhalele muzuelela Yone Mubatiji.
14 Tangua diahetele ene hehi nu fundo diakhalele athu avula, yala mumoshi wajile gudi Yesu, wafugamele, wamuwambelele egi:
15 “Fumu, vuila mun’ami wa yala khenda, handaga muene udi muenya gikonyi. Udi mukata muavula. Wana gubua ha tshuya muavula nu mu meya.
16 Ngayi n’enji gudi alandudi aye, uvi abingilego ha gumusaga.”
17 Yesu wazuelele gamba: “Gindongo gia athu abola ashigo nu gutshigina. Mbangukhala n’enu matangua guvula gutshi? Matangua guvula gutshi ngudi naye gukolesela mukunda nu khadilo dienu? Izenu n’enji haha gudi ame.”
18 Yesu wabalele* demo diakhalele musagesa mona muene, demo diene diazogele, mona muene wavile muabonga mu tangua diene.
19 Gungima, alandudi ayile gudi Yesu mu gisuegi,* amuhudile egi: “Mukunda natshi esue tuabingilego guzola demo dinyi?”
20 Yesu waawambelele gamba: “Handaga mudi nu gutshigina guazonda. Ngudi gumiwambela giamatshidia egi gula mudi nu gutshigina guakoma gifua lumbale lua mutada, mbamuwambela mulundu owu egi: ‘Katuga haha, nda gunu,’ wene mbawuya. Gushigo nga ndaga imoshi mbayimikolela.”
21 ——
22 Tangua Yesu nu alandudi enji adibungishile gu Galilea, waawambelele egi: “Mun’a muthu mbawuhanewa ha mago a athu.
23 Ene mbaamushiya, uvi mu lusugu lua thathu, muene mbawufuzumuga.” Hene alandudi avuile gikenene giavula.
24 Tangua Yesu nu alandudi enji ahetele gu Kaphelenauma, athu akhalele mufutshisa gitadi gia tempelo* ayile gudi Phetelo, amuhudile egi: “Mulongeshi wenu ganago gufuta gitadi gia tempelo ba?”
25 Phetelo wazuelele egi: “Ayi, wana gufuta.” Uvi hanginyine muene monzo, Yesu wadiangele guzuela n’enji, wamuhudile egi: “Simona, wamona gikuatshi? Mafumu a ha mavu awa ana futshisa gitadi gudi akuatshi? Gudi an’awo nga gudi ngenji?”
26 Muene wazuelele egi: “Gudi ngenji.” Yesu wamuwambelele egi: “Yadiago, ana a mafumu anago gufuta gitadi.
27 Uvi hagula tuatumigo ha gutangiza ndaga jiabola, nda gu kianga, mba ndobo* mu muta, zangula ishui ya thomo mbawukuata. Tangua mbawuyikangula kano, mbawumona lufalanga lua utadi wa siliva.* Luzangule ha gufuta gitadi giaye nu giami.”
Mbimbi goshi'a diyiji
^ Nga “yabuile yaphega.”
^ Nga “wadingidile.”
^ Nga “mu mafumbe; ku mateke.”
^ Mu Greke: “drakime jiyadi jia makuta a utadi.” Yakhalele makuta akhalele mufuta muthu mukunda nu masugu mbadi a mudimo.
^ Nga “ndopho.”
^ Mu Greke: “setatele,” yajiya gukhala egi badrakime nguana.
