Mukanda wa Matayo 18:1-35
18 Mu tangua diene, alandudi ajile gudi Yesu, amuhudile egi: “Nanyi udi wabalega gukoma mu Ufumu wa mu dilu?”
2 Yesu watamegele mona wazonda, wamuhagele mukatshi diawo,
3 wazuelele egi: “Ngudi gumiwambela giamatshidia egi, gula muasombegeselego makalegelo enu nu muabuilego gifua ana azonda, mbamushigo mungina nga hazonda mu Ufumu wa mu dilu.
4 Muthu wagasue wadibulumuisa gifua mona yowu wazonda, muene udi muthu wabalega gukoma mu Ufumu wa mu dilu.
5 Muthu wagasue wayamba mona muene wazonda mukunda nu jina diami, wanguyamba nji ame.
6 Uvi muthu wagasue wabuisa mona mungoshi mu gubola* mukatshi dia ana awa azonda adi nu gutshigina gudi ame, idi yabonga egi akudigiwe seso* diakoma mu shingo nu ambiwe mu kianga.
7 “Lamba diavula gudi athu a ha mavu awa, handaga adi mubuisa athu ako mu gubola! Yadiago, ndaga jidi mubuisa athu mu gubola mbajikhala guene. Uvi lamba diavula gudi muthu udi ha gishina gia ndaga idi mubuisa athu ako mu gubola!
8 Gula koko diaye nga kulu diaye didi gugubuisa mu gubola, dibatule udibishile gualeha nu aye. Idi ndaga yabonga egi uhete monyo nu koko dimoshi nga nu kulu dimoshi, ha fundo egi ubishidiwe mu tshuya tua ivo nu ivo nu mago mbadi nga nu malu mbadi.
9 Gula diso diaye didi gugubuisa mu gubola, dikatule udibishile gualeha. Handaga idi yabonga egi uhete monyo nu diso dimoshi ha fundo egi ubishidiwe nu meso aye mbadi mu tshuya tua Gehena.*
10 Temienu hagula musegululago mona mungoshi mukatshi dia ana awa azonda, handaga ngudi gumiwambela egi anjelo awo mu dilu ana tala tangua diagasue phala ya Tata wami udi mu dilu.
11 ——
12 “Muamona gikuatshi? Gula muthu udi nu imeme 100, gimoshi giatota, muene mbawubemba imeme iko 99 gu mulundu ha guya mukamba ginyi giatotshi.
13 Gula wagimona, giamatshidia ngudi gumiwambela egi, muene mbawusuanguluga muavula mukunda nu gimeme giene, gubalega imeme 99 inyi yatotelego.
14 Luholo lumoshi nji, Tata wami* udi mu dilu ganago gutshigina egi mona mungoshi mukatshi dia ana awa azonda afue.
15 “Luko, gula phangi’aye wakalagala gubola, nda umusange, umuwambele gubola* guenji phamba enue muyadi. Gula muene waguvuila, wamukuatesa ha guvutuga mu njila yabonga.
16 Uvi gula muene gaguvidilego, zangula muthu mumoshi nga athu mbadi uye nawo. Ngenyi, uthemua* wa athu mbadi nga thathu mbawukuatesa ha gutshiginyisa ndaga jiagasue.
17 Gula muene watuna guavila, wambela hungu. Uvi gula muene watuna gutegelela hungu, muzule gifua muenya ifutshi nga ndo mufutshishi wa gitadi.
18 “Ngudi gumiwambela giamatshidia egi ndaga jiagasue muajitshiga ha mavu, mbajikhala jiajitshigiwe gale mu dilu. Ndaga jiagasue muajitulula ha mavu, mbajikhala jiajituluiwe gale mu dilu.
19 Ngudi gumiwambela luko giamatshidia egi gula athu mbadi mukatshi dienu ha mavu awa, adivua ha gukombelela mukunda nu ndaga imoshi ya ndando, Tata wami udi mu dilu mbawatagenesela nayo.
20 Handaga, gula athu mbadi nga thathu adibungisa mukunda nu jina diami, ame ngudi mukatshi diawo.”
21 Gungima Phetelo wayile gudi Yesu, wamuhudile egi: “Fumu, mbala guvula gutshi ngudi naye gutotesela phangi’ami gula wangutshitshila gubola? Mbala sambadi ba?”
22 Yesu wamuwambelele egi: “Ngudi guguwambela egi, ishigo mbala sambadi, uvi uu mbala 77.
23 “Ufumu wa mu dilu wajiya gufuanesewa nu fumu mumoshi watogele egi ahiga enji afute mikudi yenji.
24 Tangua asendesele gumufuta mikudi, ajile nu yala mumoshi wakhalele nu mukudi wenji wa talanta 10 000.*
25 Uvi yala muene gakhalelego nga nu gima gimoshi gia gufuta mukudi wa fumi’enji. Hene fumi’enji wazuelele egi amudige nu muene nu mukaji’enji nu an’enji nu ima yenji yagasue ha gufuta mukudi wene.
26 Muhiga muene wafugamene gutuama dia fumi’enji, wazuelele egi: ‘Fumu huiminyina, mbangudi gugufuta mukudi waye wagasue.’
27 Fumi’enji wamuvuidile khenda, wamubembele. Wamutotesele mukudi wenji wagasue.
28 Uvi muhiga muene wazogele, wayile musanga muhiga n’a muko wakhalele nu mukudi wenji wa denye 100, wamukuatele, wamukamene ha muminyo, wamuwambelele egi: ‘Futa mukudi wami udi nawo.’
29 Muhiga muene wafugamene, wasendesele gumububila egi: ‘Khala nu guhuiminyina, mbangudi gugufuta mukudi waye.’
30 Uvi muene watunyile, wamumbile mu bologo uu nu tangua mbadifuta muene mukudi wenji.
31 Tangua ahiga ako amonele ndaga yene, avuile gikenene giavula. Hene ayile mutela fumi’awo lumene lua ndaga yakalegewe.
32 Fumi’enji wamutamegele, wamuwambelele egi: ‘Aye udi nu mutshima wabola, ngagutotesele mukudi waye wagasue tangua wangububidile.
33 Aye wakhalelego naye guvila muku’enu khenda gifua luholo ame ngaguvuidile khenda ba?’
34 Fumi’enji wavuile khabu jiavula, hene amuhanele gudi abambi a bologo uu nu tangua mbadifuta muene mukudi wenji wagasue.
35 Gula mushigo mutotesela aphangi’enu nu mutshima umoshi, Tata wami wa mu dilu mbawumikalegela nji ndaga luholo elu.”
Mbimbi goshi'a diyiji
^ Mu Greke: “gukhakhuisa.”
^ Nga “seso ya gutuila mbuto,” yakhalele mubalumuiwa gudi gabalu.
^ Tala Ukoteleshi wa Mbimbi.
^ Nga ndo yajiya gukhala egi, “wenu.”
^ Mu Greke: “gumuwamba.”
^ Mu Greke: “kano.”
^ Talanta 10 000 jia utadi wa siliva jiakhalele muta denye 60 000 000.
