Mukanda wa Matayo 19:1-30
19 Hamanesele Yesu guzuela ndaga eji, wakatugile gu Galilea, wayile ha sambua* dia Muta wa Yordani, gu khanda ya Yudea.
2 Athu avula amulanduile; wasagele enya misongo guene.
3 Afalese ajile gudi muene ha gumutela muheto. Amuhudile egi: “Muthu udi naye gushiya ulo nu mukaji’enji mukunda nu ndaga yagasue ba?”
4 Muene waavutudile egi: “Enue khenji muatangelego egi gu gisendeselo Nzambi waafugile yala nu mukhetu ba?
5 Nu wazuelele egi: ‘Hene yala mbawubemba sh’enji nu gin’enji, mbawudibungisa nu mukaji’enji, ene muyadi’awo mbaabua muthu mumoshi.’
6 Ene ashigo luko athu mbadi, uvi adi muthu mumoshi. Hene yabungishile Nzambi, muthu gayikhaphumunago.”
7 Ene azuelele egi: “Mukunda natshi giwa Moize wazuelele egi yala ahane mukhetu mukanda wa gushiya ulo hamukaya muene?”
8 Muene waawambelele egi: “Moize wamiwambelele ha gushiya ulo nu akaji’enu handaga mudi enya mitshima yakola. Uvi gu gisendeselo yakhalelego ngenyi.
9 Ngudi gumiwambela egi muthu wagasue washiya ulo nu mukaji’enji uvi mukhetu muene gakalegelego uthambi,* gula muene wazula mukhetu muko, wakalagala uthambi.”
10 Alandudi amuwambelele egi: “Gula ndaga jidi ngenyi mukunda nu yala nu mukaji’enji, idi yabonga ha gusala undumbu.”
11 Muene waawambelele egi: “Athu agasue anago gutshigina ndaga eyi, phamba athu anyi ahetele khapho dia gusala undumbu.
12 Handaga athu ako ajiyilego guwata* mukunda avalewe ngenyi; ako ajiyilego guwata handaga athu a abuishile ngenyi, uvi ako anago guwata handaga ene hakhawo adibuishile ngenyi mukunda nu Ufumu wa mu dilu. Muthu watshigina ndaga eyi, ayitshigine.”
13 Gungima, athu ajile nu ana azonda hagula Yesu a ahage mago nu akombelele mukunda nu ana ene, uvi alandudi a atunyishile.
14 Uvi Yesu wazuelele egi: “Bembenu ana azonda aze gudi ame, muatunyisago, handaga Ufumu wa mu dilu udi wa athu anyi adi gifua ana azonda.”
15 Waahagele mago ha mito, gungima wakatugile ha fundo diene.
16 Muvuala mumoshi wajile gudi muene, wamuhudile egi: “Mulongeshi, ndaga itshi yabonga ngudi naye gukalagala ha guheta monyo wa ivo nu ivo?”
17 Muene wamuwambelele egi: “Mukunda natshi udi gunguhula muhu watadila ndaga yabonga? Muthu wabonga udi phamba mumoshi. Uvi gula watshigina guheta monyo, landula gunemesa mikhuala.”
18 Muene wahudile egi: “Mikhuala itshi?” Yesu wamuwambelele egi: “Ushiyigo muthu, ukalagalago uthambi, ukuyigo, utelago muthu uthemua wa mambo,
19 nemesa sh’aye nu gin’aye, zumba nji muthu na muku’enu gifua luholo wana zumba muila waye.”
20 Muvuala muene wamuwambelele egi: “Ngana tumagela mikhuala eyi yagasue. Itshi iko yangusala ha gutshita?”
21 Yesu wamuwambelele egi: “Gula watshigina gukhala muthu watagana, nda usumbise ima yaye, uhane phutu falanga. Gula watshita ngenyi, mbawukhala nu umonyi mu dilu. Gungima iza ungulandule.”
22 Havuile muvuala muene ngenyi, wayile nu gikenene handaga wakhalele nu ima yavula.
23 Gungima Yesu walezele alandudi enji egi: “Ngudi gumiwambela giamatshidia egi, mbayikhala lamba gudi muenya umonyi ha gungina mu Ufumu wa mu dilu.
24 Ngudi gumiwambela luko egi idi yaleba gudi shamo ha gungina mu wina dia ndongo.* Uvi idi lamba gudi muenya umonyi ha gungina mu Ufumu wa Nzambi.”
25 Tangua alandudi avuile ndaga yene, adihudile muavula, azuelele egi: “Nanyi wajiya giwa guhuluishiwa?”
26 Yesu waatalele nonoo, wazuelele egi: “Gudi athu idi lamba, uvi gu meso a Nzambi gushigo nga ndaga imoshi yakola.”
27 Gungima Phetelo wazuelele egi: “Tala! Tuabembele ima yagasue ha gugulandula; itshi mbatuheta giwa?”
28 Yesu waalezele egi: “Ngudi gumiwambela giamatshidia egi tangua ima yagasue mbayibua ihe-ihe,* tangua mbadikhala Mun’a muthu ha nguasa yenji ya lutumbu ya ufumu, enue muangulanduile mbamukhala ha nguasa jia ufumu 12 ha gusophesa iphuta 12 ya Isalele.
29 Muthu wagasue wabemba jinzo nga aphangi’enji a mala nga aphangi’enji a akhetu nga sh’enji nga gin’enji nga an’enji nga mahia mukunda nu jina diami, muene mbawuyiheta lukhama nu mbawuheta monyo wa ivo nu ivo.
30 “Uvi athu avula adi athu a thomo, mbaabua athu a gisugishilo, athu a gisugishilo mbaabua athu a thomo.
Mbimbi goshi'a diyiji
^ Nga “gu mididilo.”
^ Mu Greke: porneya. Tala Ukoteleshi wa Mbimbi.
^ Nga “gudizula mu ulo.”
^ Nga “shindanyi.”
^ Nga “tangua ima mbayifugiwa luko.”
