Mukanda wa Matayo 2:1-23
2 Tangua diavalewe Yesu gu Beteleheme ya gu Yudea mu masugu a fumu Helode,* athu ana tala themua ha guphonga, akatugile gu khanda ya mazogelo a kumbi ajile gu Yelusalema.
2 Azuelele egi: “Mona wavalewa ha gubua fumu wa enya Yuda udi gui? Handaga tuamonyi themua yenji tangua tuakhadi gu khanda ya mazogelo a kumbi, hene tuaza ha gumutumbuisa.”*
3 Tangua Fumu Helode nu enya gu Yelusalema agasue avile ndaga yene, abuile tunga-tunga.
4 Wabungishile mafumu agasue a nganga-nzambi, nu alongeshi a mikhuala agasue, waahudile fundo diakhalele naye guvualewa Klisto.*
5 Amuwambelele egi: “Gu Beteleheme ya gu Yudea, gifua luholo yasonegewe gudi profete egi:
6 ‘Aye Beteleheme ya mu mavu a gu Yuda, giamatshidia ushigo gadimbo gagithuhu mukatshi dia membo a Yuda, handaga fumu mbawutuameza athu ami enya Isalele, mbawuzoga mukatshi diaye.’”
7 Gungima, Helode wayile mu gisuegi, watamegene athu ene ana gutala themua ha guphonga, hagula amuwambele tangua themua yene yazogele.
8 Hatumine muene athu ene gu Beteleheme, waawambelele egi: “Ndenu mukambe mona muene muabonga, gula muamumona, muze munguwambele hagula ame nji nguye ngumutumbuise.”
9 Tangua avuile ndaga jiazuelele fumu, ayile. Hakhalele ene muya, themua yinyi amonele gu khanda ya mazogelo a kumbi, yayile gutuama diawo, yaatuamezele uu yayile mumagana fundo diakhalele mona muene.
10 Tangua amonele themua yene, asuangulugile muavula.
11 Hanginyine ene monzo, asangele mona muene nu gin’enji Madiya, afugamele ha gumutumbuisa. Akanguile makuba awo, amuhanele utadi wa wolo nu uhafu ulaphe nu mula.
12 Uvi avutugile gumbo diawo mu njila iko, handaga Nzambi waatunyishile mu nzoji ha guvutuga gumbo dia Helode.
13 Havutugile ene, muanjelo wa Yehowa wawambelele Yozefe mu nzoji egi: “Zuga, zula mona nu gin’enji, lengenu muye gu Ejipitu mukhale guene uu nu tangua mbangumiwambela ha guvutuga. Handaga, Helode udi mukamba mona ha gumushiya.”
14 Yozefe wazugile mu phipha, wazudile mona nu gin’enji ayile gu Ejipitu.
15 Wasalele guene uu nu tangua diafuile Helode. Ndaga yene yatagenesele mbimbi jiazuelele Yehowa mu njila ya profete wenji egi: “Ngatamegene mun’ami ha guzoga gu Ejipitu.”
16 Hamonele Helode egi athu ana gutala themua ha guphonga amuhuigile, wavuile khabu jiabala. Watumine athu ha gushiya ana mala agasue akhalele nu ivo mbadi nga goshi mu dimbo dia Beteleheme nu mu membo agasue a hehi. Wazuelele ngenyi ha gutadila tangua diamuwambelele athu ana gutala themua ha guphonga.
17 Ndaga yene yataganesele mbimbi jiazuelele profete Yelemiya egi:
18 “Dijui dia gudila nu gukaluluga guakola diazogele mu dimbo dia Lama. Yakhalele Lashele wakhalele mudila an’enji handaga afile. Gakhalelego mutshigina egi amuhenese.”
19 Tangua diafile Helode, muanjelo wa Yehowa wawambelele Yozefe mu nzoji gu Ejipitu
20 egi: “Zuga, zula mona nu gin’enji, ndenu gu Isalele handaga athu akhalele mukamba mona ha gumushiya afi gale.”
21 Yozefe wazugile, wazudile mona nu gin’enji, avutugile gu Isalele.
22 Uvi tangua diavuile Yozefe egi Alekelause wakhalele muhinyina gu Yudea ha fundo dia she’nji Helode, wavuile woma ha guya guene. Luko, muanjelo wa Nzambi wamutemesele mu nzoji, hene wayile gu Galilea.
23 Wayile mukhala gu dimbo dia Nazaleta, ha gutagenesa ndaga jiazuelele baprofete egi: “Muene mbawutamegewa egi Muenya gu Nazaleta.”*
Mbimbi goshi'a diyiji
^ Tala Ukoteleshi wa Mbimbi.
^ Nga “ha gumufugamena.”
^ Nga “Masiya; Muthu wambiwe Maji mu nyuma.”
^ Yajiya gukhala egi mbimbi eyi yakatuga mu zuelelo dia Hebelu, idi mukotelesa egi “luthango ludi musaphutshila.”
