Mukanda wa Matayo 20:1-34
20 “Handaga Ufumu wa mu dilu udi gifua fumi’a inzo wazogele mu gimenegena gia mutshiatshia ha guya mukamba enya mudimo ha guatuma mu dihia dienji dia vinyo.
2 Wadivile nu enya mudimo ha guafuta denye imoshi mu lusugu, gungima waatumine mu dihia dienji dia vinyo.
3 Wazogele luko hehi nu tangua dia divua mu gimenegena,* wamonele athu ako mulaba gumagana ha zando, ashigo nu mudimo;
4 waawambelele egi: ‘Enue nji ndenu mutshite mudimo mu dihia dia vinyo, mbangumihana lufuto luatagana.’
5 Ene ayile. Wazogele luko hehi nu tangua dia midi* nu mu tangua dia thathu gungima dia midi,* wakalegele luholo lumoshi.
6 Gu gisugishilo, wazogele luko hehi nu tangua dia thano gungima dia midi,* wasangele athu ako mumagana, waahudile egi: ‘Mukunda natshi mualaba gumagana mudimo ndo?’
7 Ene amuvutudile egi: ‘Tualaba gumagana handaga gushigo nu muthu wa gutuhana mudimo.’ Muene waawambelele egi: ‘Enue nji ndenu mutshite mudimo mu dihia dia vinyo.’
8 “Mu ngueze, fumi’a dihia watamegele gaphita ga enya mudimo, wamuwambelele egi: ‘Tamega enya mudimo waahane lufuto luawo. Sendesa thomo gufuta athu anyi aji gu gisugishilo, gungima ufute giwa athu a thomo.’
9 Tangua diajile athu asendesele mudimo mu tangua dia thano gungima dia midi, a afutshile denye imoshi.
10 Tangua diajile athu a thomo anyi adiangele guzudiwa gu mudimo, atangijile egi ene mbahanewa lufuto luavula gubalega athu ako, uvi a afutshile nji denye imoshi.
11 Hazudile ene lufuto luawo, asendesele guzuela muabola mukunda nu fumi’a dihia.
12 Azuelele egi: ‘Athu awa aza gungima; ene atshita mudimo phamba kumbi dimoshi, uvi aye waafuta luholo lumoshi nu esue tuakalagala mudimo lusugu lua mudidi ha muanya wabala!’
13 Uvi muene wawambelele muenya mudimo mumoshi egi: ‘Yala, ngagutshitshilego gubola. Tuadivui naye egi nguza gugufuta denye imoshi, ishigo ngenyi ba?
14 Zangula lufuto luaye, nda gaye. Ngudi mufuta nji enya mudimo aji gu gisugishilo luholo lumoshi nu aye.
15 Ame ngajiyilego gukalegela ima yami gifua luholo ngatshigina ba? Nga ndo, udi muvua fuwa* mukunda nu mutshima wami wabonga ba?’*
16 Hene athu a gisugishilo mbaabua athu a thomo, athu a thomo mbaabua athu a gisugishilo.”
17 Yesu wakhalele mukanduga gu Yelusalema. Hakhalele ene mu njila, wazanguile apostolo 12 gu khanda, waawambelele egi:
18 “Tegelelenu! Tudi mukanduga gu Yelusalema, Mun’a muthu mbawuhanewa ha mago a mafumu a nganga-nzambi nu alongeshi a mikhuala. Ene mbaamufuisa milonga ha gumushiya.
19 Ene mbaamuhana ha mago a athu a ifutshi hagula amulele, amubete, gungima amushiye ha mutshi. Uvi mu lusugu lua thathu muene mbawufuzumuga.”
20 Gungima mukaji’a Zebedayo wajile nu an’enji a mala muyadi gudi Yesu, wafugamele gutuama dienji ha gumutoga gima gimoshi.
21 Yesu wamuhudile egi: “Itshi watshigina?” Muene wamuwambelele egi: “Zuela mbimbi imoshi hagula egi an’ami awa mbadi a mala akhale mungoshi gu koko diaye dia madia* muko gu koko diaye dia mahidi* mu Ufumu waye.”
22 Yesu waavutudile egi: “Mushigo mujiya gima mudi mutoga. Enue muajiya gunua khiopho ngudi mutshigina gunua ba?” Ene amuwambelele egi: “Ayi, tuajiya gunua.”
23 Muene waawambelele egi: “Giamatshidia mbamunua khiopho giami, uvi ishigo ame ngudi naye gutomba muthu udi naye gukhala gu koko diami dia madia nga gu koko diami dia mahidi. Mafundo awa adi a athu anyi Tata wami walondele mukunda nu ene.”
24 Tangua alandudi ako kumi avuile ndaga yatshitshile alandudi anyi mbadi, avuile khabu.
25 Yesu waatamegele, waawambelele egi: “Mudi mujiya egi mafumu a ifutshi ana guhinyina athu gu ngolo; mafumu akoma ana gumonesa egi adi nu ufumu holu dia athu ene.
26 Uvi ishigo naye gukhala ngenyi mukatshi dienu; muthu watshigina gukhala wakoma mukatshi dienu, udi naye gukhala muenya mudimo wenu.
27 Luko, muthu watshigina gukhala muthu wa thomo mukatshi dienu, udi naye gukhala muhiga wenu.
28 Mun’a muthu gajilego hagula athu amukalegele mudimo, uvi wajile ha gukalegela athu mudimo nu guhana monyo wenji gifua gibawu mukunda nu athu avula.”
29 Tangua diakhalele muzoga Yesu mu dimbo dia Yeliko, athu avula amulanduile.
30 Ifofo mbadi yakhalele mu khulo ya njila yavuile egi Yesu wakhalele mubalega, yakalugugile egi: “Fumu, Mun’a Davidi, tuvuile khenda!”
31 Uvi athu avula a ibalele* ha guhena tedie; ikhale ngenyi, ene akalugile luko mu dijui diakola egi: “Fumu, Mun’a Davidi, tuvuile khenda!”
32 Yesu wamagenele, waatamegele. Waahudile egi: “Itshi mudi mutshigina egi ngumikalegele?”
33 Ene amuwambelele egi: “Fumu, tuatshigina egi meso etu akanguge.”
34 Yesu waavuidile khenda, wakuatele meso awo, meso awo akangugile mu tangua diene. Gungima asendesele gumulandula.
Mbimbi goshi'a diyiji
^ Yakotelesa egi, hehi nu tangua dia thathu.
^ Yakotelesa egi, hehi nu tangua dia samano.
^ Yakotelesa egi, mu tangua dia divua.
^ Yakotelesa egi, hehi nu tangua dia 11.
^ Mu Greke: “diso diabola; diso dia shidi.”
^ Nga “nu khadilo diami dia guhana.”
^ Nga “koko dia utata.”
^ Nga “koko dia umama.”
^ Nga “ayidingidile.”
