Mukanda wa Matayo 22:1-46
22 Yesu wakhalele guawambela luko ndaga mu ifezegeselo. Wazuelele egi:
2 “Ufumu wa mu dilu wajiya gufuanesewa nu fumu mumoshi walondele wano wa ulo mukunda nu mun’enji wa yala.
3 Watumine enya mudimo enji ha gutamega athu atamegewe gu wano wa ulo, uvi ene atunyile gawo ha guza.
4 Watumine luko enya mudimo enji ako, waalezele egi: ‘Wambelenu athu atamegewe gu ulo egi: “Ngalondji gale ima ya gudia, ngashiyi ngombe nu shitu jiami jia maji-maji, ima yagasue idi yagulonda. Izenu gu wano wa ulo.”’
5 Uvi athu ene atunyile gawo guza. Muko wayile gu dihia dienji, muko wayile gu mungenda wenji;
6 uvi ako akuatele enya mudimo, a abetele gungima a ashiyile.
7 “Fumu wavuile khabu, watumine masuta enji ha gushiya athu anyi ashiyile enya mudimo enji nu ha gukonda* dimbo diawo tshuya.
8 Gungima wawambelele enya mudimo enji egi: ‘Ima ya gudia mukunda nu wano wa ulo idi hehi, uvi athu atamegewe ashigo agutagana.
9 Ndenu mu njila jidi mubata gonze ya dimbo, tamegenu athu agasue muasanga guene ha guza gu wano wa ulo.’
10 Hene, enya mudimo ayile mu njila, atamegele athu agasue asangele, athu abola nu athu abonga; inzo ya wano yazalele pha nu athu atamegewe ha gudia.*
11 “Tangua dianginyine fumu ha gutala athu atamegewe, wamonele muthu mumoshi gasudigilego mulele wa ulo.
12 Wamuhudile egi: ‘Yala, luholo lutshi wanginyi haha uvi aye ushigo nu mulele wa ulo?’ Muthu muene wahenele tedie.
13 Fumu wawambelele enya mudimo enji egi: ‘Mujitshigenu mago nu malu mumubishile hanze hadi phipha. Guene mbagukhala muene mudila nu gudidia mazo.’
14 “Handaga athu atamegewe adi avula, uvi atombewe adi azonda.”
15 Gungima Afalese ayile giphungi ha gumutela muheto, hagula amukuate mu mbimbi ji’enji.
16 Atumine alandudi awo nu alandudi a Helode ha gumuwambela egi: “Mulongeshi, tumujiya egi wana zuela giamatshidia, ndaga wana zuela aye mukunda nu Nzambi jiakhala jia giamatshidia. Aye wana kambago egi athu agutumbuise, handaga wanago gutala phala jia athu.
17 Tuwambele ndaga udi mutangiza. Mukhuala udi gutuhana njila* ha gufuta gitadi gudi Sezale nga ndo?”
18 Uvi Yesu wajiyile matangi’awo abola, hene wawambelele egi: “Enue enya mambo, mukunda natshi mudi gungutela muheto?
19 Ngulezenu falanga muana hana ha gufuta gitadi.” Amubatelele denye imoshi.
20 Waahudile egi: “Gifuanesa egi nu isona eyi idi ya nanyi?”
21 Ene azuelele egi: “Ya Sezale.” Muene waawambelele egi: “Hanenu ima ya Sezale gudi Sezale, uvi ima ya Nzambi gudi Nzambi.”
22 Tangua avuile ndaga eyi, adihudile muavula, amubembele, ayile gawo.
23 Mu lusugu luene, Asadoke ana zuela egi gufuzumuga guana khalago guene ajile gumuhula egi:
24 “Mulongeshi, Moize wazuelele egi: ‘Gula yala wafua, uvi muene nu guvuala ndo ana, phangi’enji wa yala udi naye guzula mukaji’enji mu ulo ha gumuvualela ana.’
25 Guakhalele nu mala sambadi. Wa thomo wazudile mukhetu mu ulo, gungima wafuile. Gavualelego nga mona, wabembele mukaji’enji gudi phangi’enji wa yala.
26 Luholo lumoshi nji nu yala wa mbadi nu wa thathu, uu mukut’awo agasue sambadi afuile.
27 Gu gisugishilo mukhetu nji wafuile.
28 Tangua athu mbaafuzumuga, muene mbawukhala mukaji’a nanyi mukatshi dia mala awa sambadi? Handaga mukut’awo agasue amuzudile mu ulo.”
29 Yesu waawambelele egi: “Mudi gudihuiga handaga mushigo mujiya Mukanda wa Nzambi nu ngolo jia Nzambi;
30 handaga mu lusugu lua gufuzumuga, mala mbaashigo muzula akhetu mu ulo, akhetu nji mbaashigo muhanewa mu ulo, uvi mbaakhala gifua anjelo mu dilu.
31 Mukunda nu gufuzumuga gua athu a gufua, khenji muatangelego ndaga jiazuelele Nzambi mukunda nu enue egi:
32 ‘Ame ngudi Nzambi wa Abalahama, Nzambi wa Isaka nu Nzambi wa Yakoba’ ba? Muene gashigo Nzambi wa athu a gufua, uvi Nzambi wa athu a monyo.”
33 Athu avula anyi akhalele gumutegelela adihudile muavula mukunda nu malongo enji.
34 Havuile Afalese egi Yesu wakangele Asadoke makano, ene ajile ha gudibungisa nawo.
35 Muthu mumoshi mukatshi diawo wakhalele mujiya Mukhuala muabonga, wamuhudile muhu ha gumutela muheto egi:
36 “Mulongeshi, mukhuala utshi udi wakoma gubalega Mikhuala iko?”
37 Muene wamuwambelele egi: “‘Zumba Yehowa Nzambi waye nu mutshima waye wagasue nu monyo* waye wagasue nu matangi aye agasue.’
38 Owu wene mukhuala wa thomo wabalega gukoma.
39 Wa mbadi wadifuana nawo wenyowu: ‘Zumba muthu na muku’enu gifua luholo wana zumba muila waye.’
40 Mikhuala yagasue ya Moize nu ndaga jiasonegele Baprofete yazoga mu mikhuala eyi mbadi.”
41 Hamonele Yesu egi Afalese akhalele hene, waahudile egi:
42 “Itshi mudi mutangiza mukunda nu Klisto? Muene udi mun’a nanyi?” Ene amuvutudile egi: “Mun’a Davidi.”
43 Muene waahudile egi: “Mukunda natshi giwa Davidi wamutamegele mu njila ya nyuma ya Nzambi egi Fumu hazuelele muene egi:
44 ‘Yehowa wawambelele Fumi’ami egi: “Khala gu koko diami dia madia uu nu tangua mbanguhaga mbalagaji jiaye goshi’a ikanzo yaye”’?
45 Gula Davidi wamutamega egi Fumu, na luholo lutshi giwa muene wajiya gukhala mun’enji?”
46 Nga muthu mumoshi gamuhanelego mvutu. Sendese lusugu luene, gushigo nga muthu mumoshi wamuhudile luko muhu.
Mbimbi goshi'a diyiji
^ Nga “ha gumba.”
^ Nga “gudia gu mesa.”
^ Nga “idi ndaga yabonga.”
^ Tala Ukoteleshi wa Mbimbi.
