Mukanda wa Matayo 23:1-39
23 Gungima, Yesu wawambelele athu avula nu alandudi enji egi:
2 “Alongeshi a mikhuala nu Afalese adi a gukhala ha nguasa ya Moize.
3 Hene tshitenu ndaga jiagasue adi gumiwambela. Uvi mukhadigo gifua ene handaga ana kalegelago ndaga ana guzuela.
4 Ana londega inemo yanema, ana guyihaga ha phanga jia athu ako, uvi ene hakhawo anago gutshigina guyinyigisa nga nu muno wawo.
5 Ima yagasue yana tshita ene, ana guyikalagala hagula athu a amone. Ha gufezegesa, ana komesa filaketele* jiawo jinyi ana sudiga ha mbombo nu gu mago ha gudibamba. Ana lehesa nji songi jia milele yawo.
6 Mu tangua dia gudia mu ngueze ana tshigina mafundo a lutumbu,* ana tshigina nji gukhala mu mafundo a thomo mu sinagoga.
7 Ana tshigina egi athu a amenege mu mafundo a zando; ana tshigina nji egi athu a atamege egi Rabi.*
8 Uvi enue mutshiginago egi amitamege egi Rabi, handaga mudi nu Mulongeshi phamba mumoshi, mukut’enu agasue mudi aphangi.
9 Mutamegago nji nga muthu mumoshi egi sh’enu handaga mudi nu Sh’enu phamba mumoshi, yonu udi mu dilu.
10 Mutshiginago egi athu amitamege egi mafumu, handaga mudi nu Fumu phamba mumoshi, Klisto.
11 Uvi muthu wakoma mukatshi dienu udi naye gukhala muenya mudimo wenu.
12 Muthu wagasue udi gudikanduisa mbawubulumuishiwa, uvi muthu udi gudibulumuisa mbawukanduishiwa.
13 “Lamba dienu enue alongeshi a mikhuala nu Afalese, mudi enya mambo! Handaga mudi mukangela athu mufulo wa Ufumu wa mu dilu; enue hakhenu mushigo mungina muene, uvi athu adi mutshigina gungina mudi guakanga njila.
14 ——
15 “Lamba dienu enue alongeshi a mikhuala nu Afalese, mudi enya mambo! Handaga muana guwenda muagasue mu mita nu ha mavu, ha gukamba muthu muajiya gutshiginyisa* malongo enu. Uvi gula muthu muene watshigina, muana gumubuisa muthu udi naye gubishidiwa mu Gehena* mbala jiyadi gubalega enue.
16 “Lamba dienu enue atuameji a ifofo handaga muana zuela egi, ‘Gula muthu wadiloga mu jina dia tempelo, ishigo mulonga. Uvi gula muthu wadiloga mu jina dia wolo udi mu tempelo, udi naye gutagenesa laji dienji.’
17 Mudi muaheya nu mudi ifofo! Itshi idi nu ndando yavula, wolo nga tempelo idi mubuisa wolo wene gima gia gijila?
18 Muana zuela luko egi, ‘Gula muthu wadiloga mu jina dia giwotshielo, ishigo ndaga yabola; uvi gula muene wadiloga mu jina dia mulambu udi holu dia giwotshielo, udi naye gutagenesa mbimbi yenji.’
19 Mudi lume ifofo! Itshi idi nu ndando yavula gubalega? Mulambu nga giwotshielo gidi mubuisa mulambu wene gima gia gijila?
20 Hene, muthu udi gudiloga mu jina dia giwotshielo, udi gudiloga mukunda nu giwotshielo nu mulambu udi holu dia giwotshielo giene;
21 Muthu udi gudiloga mu jina dia tempelo, udi gudiloga mukunda nu tempelo yene nu mukunda nu Muthu udi muene.
22 Muthu udi gudiloga mu jina dia dilu udi gudiloga mukunda nu nguasa ya Ufumu wa Nzambi nu mukunda nu Nzambi udi ha nguasa yene.
23 “Lamba dienu enue alongeshi a mikhuala nu Afalese, mudi enya mambo! Handaga muana hana giakumi gia mayiji a gibo nu anete nu kuminyi, uvi muana bemba ndaga jia mikhuala jidi nu ndando yavula gifua: gukalagala ndaga jiabonga, khadilo dia khenda nu gukhala wa gujinginyina. Muakhalele naye guhana ima eyi, uvi gubemba ndo gutshita ndaga eji jiko jia ndando.
24 Enue atuameji a ifofo, mudi mukatula gatangi’a ngema mu ima yenu ya gunua, uvi mudi muminya shitu ya shamo!
25 “Lamba dienu enue alongeshi a mikhuala nu Afalese, mudi enya mambo! Handaga muana weva phamba holu dia khiopho nu holu dia longa, uvi mukatshi adi azala pha nu ngina* nu nzala jiabola.
26 Mufalese wa gifofo, weva thomo mukatshi dia khiopho nu longa, hagula hanze nji hakhale haphelegeta.
27 “Lamba dienu enue alongeshi a mikhuala nu Afalese, mudi enya mambo! Handaga mudi gifua malumba* ambiwa mukubu ulaphe, adi mumonega abonga uvi mukatshi adi azala pha nu ifuwa ya athu a gufua nu usala wa maluholo agasue.
28 Luholo lumoshi nji, mudi mumonega gifua athu abonga gu meso, uvi moshi mudi muazala pha nu mambo nu khadilo dia gushiya mikhuala.
29 “Lamba dienu enue alongeshi a mikhuala nu Afalese, mudi enya mambo! Handaga mudi mutunga malumba a baprofete nu mudi mulondega malumba* a athu abonga.
30 Muana zuela luko egi, ‘Nga tuakhalele mu sungi ya akhakh’etu, nga tuadibungishilego nawo ha gushiya baprofete.’
31 Ngenyi mudi gudifunda enue hakhenu egi mudi ana athu anyi ashiyile baprofete.
32 Maneselenu genu ndaga yasendesele akhakh’enu.
33 “Enue mudi nyoga, mudi ana a mavambu, luholo lutshi muajiya gulenga ndola ya Gehena?*
34 Gishina giene ngudi gumitumina baprofete nu enya ndunge nu alongeshi. Ako mbamuashiya, ako mbamuashiya ha mitshi uvi ako mbamuabeta mu sinagoga jienu, mbamuamonesa lamba mu dimbo nu dimbo,
35 hagula mahatshi a athu agasue abonga ashiyiwe ha mavu abue ha mito yenu, sendese nu mahatshi a muthu wabonga Abele uu nu mahatshi a Zakaliya mun’a Belakiya yonu muashiyile hakatshi dia fundo dia gijila nu giwotshielo.
36 Ngudi gumiwambela giamatshidia egi gindongo egi mbagihanewa ndola mukunda nu ndaga eji jiagasue.
37 “Yelusalema, Yelusalema, dimbo diana shiya baprofete nu diana sonona maseso gudi athu ana tumiwa guene. Iphungu guvula gutshi ngatshiginyile gubungisa an’aye gifua luholo susua yana bungisa an’enji mu muhambu. Uvi enue muatshiginyilego.
38 Talenu! Amibembela inzo yenu.*
39 Handaga ngudi gumiwambela egi, sendese mangino enue mbamushigo gungumona luko uu nu tangua mbamuzuela egi: ‘Gusuanguluga gukhale nu muthu udi muza mu jina dia Yehowa!’”
Mbimbi goshi'a diyiji
^ Nga “tumishete tuakhalele nu mbimbi jia mukanda wa Nzambi.”
^ Nga “mafundo abalega gubonga.”
^ Nga “Mulongeshi.”
^ Nga “gumubuisa gifua muenya Yuda.”
^ Tala Ukoteleshi wa Mbimbi.
^ Nga “unzangi.”
^ Nga “njinda; majamo.”
^ Nga “malumba a guwunguluga.”
^ Tala Ukoteleshi wa Mbimbi.
^ Nga ndo yajiya gukhala egi, “yasala makhulu.”
