Mukanda wa Matayo 24:1-51
-
GIJIYISHILO GIDI MUMONESA TANGUA DIA GUVUTUGA GUA KLISTO (1-51)
24 Hazogele Yesu mu tempelo, alandudi enji ayile gudi muene ha gumudijiga tempelo yagasue.
2 Yesu waawambelele egi: “Mudi mumona ima eyi yagasue? Giamatshidia ngudi gumiwambela egi mbagushigo musala nga seso imoshi holu dia iko, jiagasue mbajimuangewa.”
3 Hakhalele muene hashi holu dia Mulundu wa Mitshi ya Olive, alandudi ajile gudi muene mu gisuegi,* amuhudile egi: “Tuwambele, tangua ditshi ndaga eji jiagasue mbajikalegewa nu gijiyishilo gitshi mbagimonesa tangua dia guvutuga guaye* nu dia gisugishilo gia mavu awa?”*
4 Yesu waawambelele egi: “Temienu hagula nga muthu mumoshi gamihuigigo,
5 handaga athu avula mbaaza mu jina diami muzuela egi: ‘Ame ngudi Klisto,’ ene mbaahuiga athu avula.
6 Mbamuvua ita idi muluiwa nu mene jia ita idi mukamba guluiwa. Hene, muvuigo woma handaga ndaga eji jidi naye gukalegewa, uvi gisugishilo khenji giza galego.
7 “Handaga gifutshi mbagiluisa gifutshi giko, ufumu mbawuluisa ufumu uko. Nzala yabala mbayikhala, mavu mbaadigita khanda nu khanda.
8 Ndaga eji jiagasue jidi gisendeselo gia malamba akola.*
9 “Athu mbaamimonesa lamba nu mbaamishiya. Ifutshi yagasue mbayikhala n’enu umbalagaji mukunda nu jina diami.
10 Athu avula nji mbaatotesa gutshigina guawo. Mbaadibalumugila, mbaadihagela umbalagaji.
11 Baprofete avula a mambo mbaazoga, mbaahuiga athu avula.
12 Luholo athu mbaakhala mushiya mikhuala muavula, guzumba gua athu avula mbaguleba.
13 Uvi muthu mbawukolesela uu nu gu gisugishilo, muene mbawuhuluishiwa.
14 Lukuma elu luabonga lua Ufumu mbalulongesewa nji ha mavu agasue gifua gijiyishilo gudi ifutshi yagasue, gungima gisugishilo mbagiza.
15 “Tangua mbamumona gima gia usala gidi mubata gufua, ginyi giazuelele profete Danyele, mumagana ha fundo dia gijila (muthu udi mutanga ateme gukotelesa ndaga eyi),
16 athu adi gu Yudea alenge ha guya gu milundu.
17 Muthu udi holu dia inzo, gasambulugago ha guzula ima idi monzo yenji,
18 muthu udi gu mahia gavutugago ha guzula mulele wenji wa holu.
19 Lamba diavula gudi akhetu a mavumo nu anyi mbaakhala muwamuesa ana mu masugu ene!
20 Landulenu gukombelela hagula lusugu luene lua gulenga lukhadigo mu sungi ya guhuma nga mu Lusugu lua Guhuluguga;
21 handaga lamba diakola mbadikhala guene, sadige gu gisendeselo gia mavu lamba dia luholo elu khenji diabuile galego nu mbadibuigo luko.
22 Giamatshidia nga masugu ene ahihishiwego, nga gushigo nu muthu wakhalele naye guhuluishiwa; uvi mukunda nu athu anyi atombewe, masugu ene mbaahihishiwa.
23 “Gula muthu wamiwambela egi, ‘Talenu! Klisto udi haha nga ndo udi gunu,’ mutshiginago.
24 Handaga enya mambo avula mbaazoga ha guzuela egi ame ngudi Klisto; baprofete a mambo nji mbaazoga, mbaakalagala ndaga jiakoma nu jia gushimana ha guhuiga athu. Ajiya nji guhuiga nu athu anyi atombewe.
25 Talenu! Ngudi gumitemesa.
26 Hene gula amiwambele egi, ‘Talenu! Udi gu mavu a luselenga,’ muyigo. Nga ndo, ‘Talenu! Udi monzo,’ mutshiginago.
27 Guvutuga* gua Mun’a muthu mbagukhala gifua muana henya mvula, sendese gu mazogelo a kumbi uu nu gu mayilo a kumbi.
28 Tunjila tua khuyi mbatudibungisa fundo mbadikhala mvumbi.
29 “Gungima dia lamba diakola mu masugu anyi, nu dishimbu ndo, tangua mbadibua phipha, mbeji mbayihanyigo mueji, themua mbajibua hashi, ngolo jia mu dilu mbajidinyigisa.
30 Gungima, gijiyishilo gia Mun’a muthu mbagimonega mu dilu. Iphuta yagasue ya ha mavu mbayidibunda ha thulo nu gikenene, mbaamona Mun’a muthu muza mu matuta mu dilu nu ngolo nu lutumbu luakoma.
31 Tangua phungi yakola mbayidila, muene mbawutuma anjelo enji ha gubungisa athu agasue atombewe mu khanda jiagasue nguana jia mavu, sendese gu songi iko ya dilu uu nu gu songi iko.
32 “Zangulenu longo mu gifezegeselo egi gia mutshi wa figi: Gula thango jiasaphutshila nu mayiji ahe-ahe azoga, muana jiya egi sungi ya mvula yasuena hehi.
33 Enue nji, gula muamona ndaga eji jiagasue, jiyenu egi muene udi gale hehi ha mifulo yenu.
34 Ngudi gumiwambela giamatshidia egi gindongo egi mbagishigo muhua nu gufua gutuama egi ndaga eji jiagasue jikalegewe.
35 Dilu nu mavu mbayitota, uvi mbimbi jiami mbajitotshigo nga hazonda.
36 “Mukunda nu lusugu luene nu tangua diene, gushigo nga muthu mumoshi udi mujiya, ikhale anjelo mu dilu nga Mona, uvi phamba Tata udi mujiya.
37 Mu tangua dia guza* gua Mun’a muthu, ndaga mbajikhala gifua luholo jiakhalele mu masugu a Nowa.
38 Handaga gutuama egi Mvula Yakola inoge, athu akhalele mudia, akhalele munua, mala akhalele muzula akhetu mu ulo, akhetu nji akhalele muhanewa mu ulo uu nu lusugu luanginyile Nowa mu masuwa.
39 Akhalelego mutegelela uu nu tangua Mvula Yakola yanogele nu yaashiyile khungi’awo agasue. Guza gua Mun’a muthu mbagukhala nji ngenyi.
40 Athu mbadi mbaakhala mu dihia, mbaazangula mumoshi, muko mbaamubemba.
41 Akhetu mbadi mbaakhala mukhukha mbuto, mumoshi mbawuzudiwa, muko mbawubembewa.
42 Hene temienu, handaga mushigo mujiya lusugu mbaluza Fumi’enu.
43 “Uvi jiyenu ndaga eyi: Gula nga fumi’a inzo wajiyile tangua* diakhalele naye guza nzangi, nga wabandele gikolekole, nga gamubembelego egi muene abule inzo yenji.
44 Gishina giene, enue nji khalenu ya gudilonda, handaga Mun’a muthu mbawuza mu tangua dinyi mushigo mujiya.
45 “Nanyi udi muhiga wafubidila nu watema* wahagewe gudi fumu wenji ha gutala enya mudimo enji nu ha guahana ima ya gudia mu tangua diatagana?
46 Muhiga muene mbawukhala nu gusuanguluga gula fumi’enji waza wamusanga nu gukalagala ngenyi!
47 Giamatshidia ngudi gumiwambela egi muene mbawumuhaga mutaledi wa ima yenji yagasue.
48 “Uvi gula muhiga muene udi muthu wabola, wazuela mu mutshima wenji egi, ‘fumi’ami udi mushipha,’
49 wasendesa gubeta enya mudimo n’ako, gudia nu gunua nu athu ana kuatewa matombe,
50 fumu wa muhiga muene mbawuza mu lusugu nu mu tangua dinyi muhiga muene gashigo mujiya,
51 mbawumuhana ndola yakola nu mbawumuhaga fundo dimoshi nu enya mambo. Guene mbaakhala mudila nu gudidia mazo.
Mbimbi goshi'a diyiji
^ Nga “mafumbe; ku mateke.”
^ Tala Ukoteleshi wa Mbimbi.
^ Nga “gindongo egi.” Tala Ukoteleshi wa Mbimbi.
^ Mu Greke: “Lamba dianavua mukhetu tangua dia guvuala.”
^ Tala Ukoteleshi wa Mbimbi.
^ Tala Ukoteleshi wa Mbimbi.
^ Nga “tangua ditshi mu phipha.”
^ Nga “wa ndunge.”
