Mukanda wa Matayo 25:1-46
25 “Ufumu wa mu dilu wajiya gufuanesewa nu tundongo kumi tuazanguile mienda yato ha guya mutagana nu yala udi naye guzula mukhetu mu ulo.
2 Tundongo thano tuakhalele tuaheya, uvi tuko thano tuakhalele tuatema.*
3 Tundongo tuaheya tuazanguile mienda yato uvi tuabembele maji,
4 uvi tundongo tuatema tuazanguile mienda yato nu maji mu milondo.
5 Luholo yala wakhalele naye guzula mukhetu mu ulo washiphile, tundongo tuagasue tuavuile tulo, tuabandele.
6 Mukatshi dia phipha mulolo wadidile egi: ‘Yala udi naye guzula mukhetu mu ulo muenyowu! Ndenu mumutagane.’
7 Hene tundongo tuagasue tuazugile, tualondele mienda yato.
8 Tundongo tuaheya tuawambelele tundongo tuatema egi, ‘Tuhanenu ndambo ya maji enu, handaga mienda yetu idi mutshigina gujima.’
9 Tundongo tuatema tuaawambelele egi: ‘Tudi mumona gifua maji ene ashigo avula ha gututagana enue nu esue. Ndenu mudisumbile gudi athu adi musumbisa maji.’
10 Hakhalele ene muya musumba maji, yala wakhalele naye guzula mukhetu mu ulo wajile. Tundongo tuakhalele hehi tuanginyile n’enji mu wano wa ulo, gungima akangele mufulo.
11 Gungima tundongo tuko tunu tuajile, tuasendesele guzuela egi, ‘Fumu, Fumu, tukanguile mufulo!’
12 Muene wawambelele egi, ‘Ngudi gumiwambela giamatshidia egi ngushigo gumijiya.’
13 “Hene temienu handaga mushigo mujiya lusugu nu tangua.
14 “Idi gifua muthu mumoshi watamegene enya mudimo enji, waahana ima yenji, gungima muene waya gu dimbo dia gualeha.
15 Wahanele muthu muko talanta* jitano, muko talanta mbadi, muko talanta imoshi. Wahanele muthu nu muthu gifua muakhalele ndunge jienji, gungima muene wayile gu dimbo dia gualeha.
16 Nu dishimbu ndo, muenya mudimo wazanguile talanta jitano wayile gujikalegela mudimo, wahetele talanta jiko jitano.
17 Muenya mudimo munu wazanguile talanta mbadi wahetele jiko mbadi.
18 Uvi muenya mudimo munu wazanguile talanta imoshi wayile muhaga wina mu mavu, wavumbigile falanga* jia fumi’enji.
19 “Gungima dia masugu avula, fumu wa enya mudimo wajile ha gutala midimo akalegele nu falanga jienji.
20 Muenya mudimo munu wahanewe talanta jitano, wajile gudi fumi’enji nu talanta jiko jitano, wazuelele egi ‘Fumu, wanguhanele talanta jitano, uvi tala, ngaheta jiko jitano.’
21 Fumi’enji wamuwambelele egi: ‘Kiawaha, udi muenya mudimo wabonga nu wagujinginyina! Wakhadi wagujinginyina gu ima yazonda, mbanguguhana ginemo gia gutala ima yami iko yavula. Iza usuanguluge hamoshi nu fumi’aye.’
22 Gungima muenya mudimo munu wahanewe talanta mbadi wajile gudi fumi’enji, wamuwambelele egi, ‘Fumu, wanguhanele talanta mbadi, uvi tala, ngaheta talanta jiko mbadi.’
23 Fumi’enji wamuwambelele egi: ‘Kiawaha, udi muenya mudimo wabonga nu wagujinginyina! Wakhadi yagujinginyina gu ima yazonda. Mbanguguhana ginemo gia gutala ima yami iko yavula. Iza usuanguluge hamoshi nu fumi’aye.’
24 “Gu gisugishilo, muenya mudimo munu wahanewe talanta imoshi wajile, wazuelele egi: ‘Fumu, ngudi mujiya egi wakhala muenya ndaga jiakola, aye wana katula mbuto jinyi wakunyinego, wana bungisa mbuto jinyi wasuwilego.
25 Hene ngavuile woma, ngayile muvumbiga talanta yaye mu mavu. Yenyeyi, izangule.’
26 Fumi’enji wamuwambelele egi: ‘Aye udi muenya mudimo wabola, udi gimonya. Aye wajiyile egi ngana katula mbuto jinyi ngakunyilego, ngana bungisa mbuto jinyi ngasuwilego,
27 mukunda natshi watunyile gumba makuta* ami mu banke hagula tangua mbanguza nguzangula nu ako holu?
28 “‘Mutambulenu talanta yinyi adi nayo, muyihane gudi muenya mudimo munu udi nu talanta kumi.
29 Handaga muthu udi nu gima, mbaamuhana gima giko, muene mbawubua nayo yavula. Uvi muthu gashigo nu gima, nu giene gidi nagio muene, mbaamutambula nagio.
30 Bishilenu muenya mudimo owu wa githuhu hanze fundo didi phipha. Guene mbaakhala mudila nu gudidia mazo.’
31 “Tangua mbadiza Mun’a muthu mu lutumbu luenji nu anjelo enji agasue, muene mbawukhala ha nguasa yenji ya lutumbu ya ufumu.
32 Ifutshi yagasue mbayibungishiwa gutuama dienji, muene mbawukhaphumuna athu gifua luholo mubambi wa shitu wana khaphumuna imeme nu khombo.
33 Muene mbawuhaga imeme gu koko dienji dia madia,* uvi mbawuhaga khombo gu koko dienji dia mahidi.*
34 “Gungima Fumu mbawuwambela athu mbaakhala gu koko dienji dia madia egi: ‘Enue muashimbigiwe gudi Tata, izenu muzangule Ufumu walondewe mukunda nu enue sendese gu gisendeselo gia mavu.
35 Handaga ngakhalele nzala, enue muanguhanele ima ya gudia; ngakhalele nu luhungu,* muanguhanele meya a gunua. Ngakhalele ngenji, muanguyambele muabonga.
36 Ngakhalele thowa,* enue muangusudigile milele. Ngakhalele nu misongo, enue muangukuatesele. Ngakhalele mu bologo, enue muajile gungutala.’
37 Athu abonga mbaamuhula egi: ‘Fumu, tangua ditshi tuagumonele nzala hene tuaguhanele ima ya gudia? Tangua ditshi tuagumonele luhungu hene tuaguhanele meya a gunua?
38 Tangua ditshi tuagumonele ngenji hene tuaguyambele muabonga? Tangua ditshi tuagumonele thowa hene tuagusudigile milele?
39 Tangua ditshi tuagumonele nu misongo nga mu bologo hene tuajile gugutala?’
40 Fumu mbawaavutuila egi: ‘Ngudi gumiwambela giamatshidia egi luholo muayikalegele gudi mumoshi mukatshi dia aphangi’ami awa azonda, muayikalegele gudi ame.’
41 “Gungima muene mbawuwambela athu mbaakhala gu koko dienji dia mahidi egi: ‘Katugenu gu meso ami, enue muatewe mukumbu, ndenu mu tshuya tua ivo nu ivo tualondewe mukunda nu Diabulu nu anjelo enji.
42 Handaga ngakhalele nzala, uvi enue muanguhuilego ima ya gudia; ngakhalele nu luhungu, uvi enue muanguhanelego meya a gunua.
43 Ngakhalele ngenji, uvi enue muanguyambelego; ngakhalele thowa, uvi enue muangusudigilego milele; ngakhalele nu misongo nu ngakhalele mu bologo, uvi enue muangukuateselego.’
44 Ene nji mbaamuhula egi: ‘Fumu, tangua ditshi tuagumonele nzala nu luhungu nga ngenji nga thowa nga nu misongo nga mu bologo hene tuatunyile gugukuatesa?’
45 Muene mbawaavutudila egi: ‘Giamatshidia ngudi gumiwambela egi, luholo muatunyile guyikalagala gudi mumoshi mukatshi dia aphangi’ami awa azonda, gudi ame muatunyile guyikalagala.’
46 Ene mbaafua gufua gua mayilago,* uvi athu abonga mbaheta monyo wa mayilago.”
Mbimbi goshi'a diyiji
^ Nga “nu ndunge.”
^ Talanta imoshi ya enya Greke yakhalele gunema 20,4 kg.
^ Mu Greke: “utadi wa siliva.”
^ Mu Greke: “utadi wa siliva.”
^ Nga “koko dienji dia utata.”
^ Nga “koko dienji dia umama.”
^ Nga “phuila.”
^ Nga “ngakhalelego diago nu milele.”
^ Mu Greke: “mbaabatudiwa mayilago gifua muana batudiwa thango jia mutshi.”
