Mukanda wa Matayo 26:1-75
-
Nganga-nzambi jiaya giphungi ha gushiya Yesu (1-5)
-
Mukhetu mumoshi wamba Yesu mananashi mu muto (6-13)
-
Yesu wadia Pake ya gisugishilo nu apostolo enji; Yudasa wadiga Yesu (14-25)
-
Yesu wasendesesa Gudia gua Fumu gua mu Ngueze (26-30)
-
Yesu wadianga guzuela egi Phetelo mbawumutuna (31-35)
-
Yesu udi mukombelela gu Getesemane (36-46)
-
Yesu wakuatewa (47-56)
-
Aya nu Yesu gudi enya Sanedrene (57-68)
-
Phetelo watuna Yesu (69-75)
26 Hamanesele Yesu guzuela ndaga eji, wawambelele alandudi enji egi:
2 “Mudi mujiya egi guasala masugu mbadi hagula Wano wa Pake ukalegewe. Mun’a muthu mbawuhanewa ha mago a athu hagula ashiyiwe ha mutshi.”
3 Mafumu a nganga-nzambi nu malemba a athu adibungishile mu luphango lua nganga-nzambi wakoma Kayifa.
4 Ene ayile giphungi ha gutela Yesu muheto nu gutema guagasue ha gumukuata hagula amushiye.
5 Uvi akhalele muzuela egi: “Tumukuatshigo mu lusugu lua wano, gula ndo athu ajiya guzola matululu.”
6 Tangua diakhalele Yesu gu Betaniya monzo ya Simona muenya hute,
7 mukhetu mumoshi wajile gudi muene, wakhalele nu mulondo wa alabasita wa guzala nu mananashi a ndando yakola. Wasendesele gumba Yesu mananashi ene mu muto tangua diakhalele muene mudia.*
8 Tangua alandudi amonele ndaga yene, avuile gubola. Azuelele egi: “Mukunda natshi adi muzangela mananashi ngenyi?
9 Mananashi awa ajiya gudigiwa mu ndando yakola ha guhana phutu falanga.”
10 Yesu wajiyile matangi’awo hene waahudile egi: “Mukunda natshi mudi musagesa mukhetu owu? Muene wakalagala ndaga yabonga mukunda nu ame.
11 Handaga phutu mbamukhala najio tangua diagasue, uvi ame mbangushigo mukhala n’enu tangua diagasue.
12 Hangumba muene mananashi awa mu muila, wangulondega mukunda nu gufundjiwa guami.
13 Ngudi gumiwambela giamatshidia egi fundo diagasue athu mbaalongesa lukuma luabonga ha mavu a mudidi, athu mbaata lumene lua ndaga yakalagala mukhetu owu ha gumutangiza.”
14 Gungima, mumoshi mukatshi dia apostolo 12, wakhalele mutamegewa egi Yudasa Isakaliote, wayile mumona mafumu a nganga-nzambi.
15 Wazuelele egi: “Itshi mbamunguhana gula ngamihana n’enji?” Adivuile n’enji ha gumuhana utadi wa siliva 30.
16 Sendese mu tangua dinyi, Yudasa wasendesele gukamba luholo lua guhana Yesu ha mago awo.
17 Mu lusugu lua thomo lua Wano wa Mapha Ashigo nu Levire, alandudi ayile muhula Yesu egi: “Fundo ditshi watshigina egi tugulondele Wano wa Pake?”
18 Muene waawambelele egi: “Ndenu mu dimbo gudi muthu mumoshi mumuwambele egi, ‘Mulongeshi umuzuela gamba: “Tangua diami diasuena hehi; nguza mutshita Wano wa Pake nu alandudi ami gumbo diaye.”’”
19 Alandudi atshitshile gifua muaawambelele Yesu, alondele Wano wa Pake.
20 Hahetele kumbi dia ngueze, Yesu wakhalele gu mesa nu apostolo 12.
21 Tangua diakhalele ene mudia, Yesu waawambelele gamba: “Ngudi gumiwambela giamatshidia egi mumoshi mukatshi dienu uza gungudiga.”*
22 Ndaga yene yaasagesele muavula, muthu nu muthu wasendesele gumuhula egi: “Fumu, ame ba?”
23 Muene waavutudile egi: “Muthu udi mumba nu ame koko ha longa dimoshi, muene mbawungudiga.
24 Giamatshidia Mun’a muthu udi muya genji gifua luholo yasonegewe mukunda nu muene, uvi mukumbu gudi muthu udi mudiga Mun’a muthu. Yakhalele naye gukhala ndaga yabonga gula nga muthu muene gavalewego.”
25 Yudasa yago wakhalele naye gumudiga wazuelele egi: “Rabi, ame ba?” Yesu wamuwambelele egi: “Aye hakhaye wayizuela.”
26 Tangua diakhalele ene mudia, Yesu wazanguile dipha, wakombelele, wadibatuile, wadihanele alandudi enji, wazuelele egi: “Zangulenu mudie, didi mumonesa muila wami.”
27 Wazanguile nji khopho, wahanele Nzambi mersi, gungima wadihanele alandudi, waawambelele egi: “Nuenu mukut’enu agasue,
28 handaga didi mumonesa ‘mahatshi ami a gikotelo’ adi naye gubunduiwa mukunda nu gutotesa gubola gua athu avula.
29 Uvi ngudi gumiwambela egi: Mbangushigo luko munua n’enu vinyo eyi uu nu lusugu mbanguyinua luko n’enu ihe-ihe mu Ufumu wa Tata wami.”
30 Gu gisugishilo, hamanesele ene guyimba ngimbo ha gutumbuisa Nzambi, azogele ha guya gu Mulundu wa Mitshi ya Olive.
31 Gungima Yesu waawambelele egi: “Mu phipha eyi mukut’enu agasue muza mulenga mukunda nu ndaga jiza gungubuila, handaga yasonegewe egi: ‘Mbangubeta mubambi wa imeme, imeme mbayimuangana.’
32 Uvi gula ngafuzumuga, mbangudiangela guya gutuama dienu gu Galilea.”
33 Uvi Phetelo wamuwambelele egi: “Ikhale mukut’awo agasue agulenga mukunda nu ndaga iza gugubuila, ame mbangushigo gugulenga nga hazonda!”
34 Yesu wamuwambelele egi: “Ngudi guguwambela giamatshidia egi, mu phipha ya mangino, gutuama egi kolombolo didile, uza gungutuna mbala jitatu.”
35 Phetelo wamuwambelele egi: “Mbangushigo gugutuna, nga yatoga egi ngufue naye.” Alandudi agasue nji azuelele ngenyi.
36 Gungima Yesu wahetele nu alandudi enji ha fundo diana tamegewa egi Getesemane. Waawambelele egi: “Khalenu haha, ame ngaya gunu ha gukombelela.”
37 Yesu wayile nu Phetelo nu ana mbadi a Zebedayo, wasendesele guvua gikenene nu gudisagesa mangololo.
38 Gungima waawambelele egi: “Ngudi muvua gikenene giavula, salenu haha, mubandjigo tulo, landulenu gutala gifua ame.”
39 Yesu wayile ndambo gualeha nu ene, wafugamene phala hashi, wakombelele egi: “Tata gula watshigina, katula khopho edi gutuama diami. Ikhadigo mu gutshigina guami, uvi ikhale gifua luholo watshigina.”
40 Tangua diavutugile muene fundo diakhalele alandudi, waasangele mubanda tulo. Wahudile Phetelo egi: “Enue muajiyilego gukhala nu ame gikolekole nga kumbi dimoshi ba?
41 Khalenu gikolekole, landulenu gukombelela tangua diagasue hagula mubuigo mu gubola. Giamatshidia nyuma idi yakola,* uvi muila udi waleba.”
42 Wayile luko gualeha nu ene hugo dia mbadi, wakombelele egi: “Tata, gula luholo lushigo guene egi khopho edi dibalege ame gudinua ndo, gutshigina guaye gukalegewe.”
43 Wavutugile luko fundo diakhalele alandudi, waasangele adi mubanda handaga meso awo akhalele anema nu tulo.
44 Waabembele luko, wayile mukombelela mbala ya thathu, wazuelele ndaga yene imoshi.
45 Wavutugile fundo diakhalele alandudi, waawambelele egi: “Mu tangua dia luholo elu, enue mudi mubanda genu tulo nu guhuluguga! Talenu! Tangua diasuena hehi hagula Mun’a muthu ahanewe ha mago a athu abola.
46 Zugenu tuyenu. Talenu! Muthu udi naye gungudiga wasuena hehi.”
47 Hakhalele muene muzuela, Yudasa, mumoshi mukatshi dia apostolo 12, wajile nu athu avula akhalele nu phogo jia khusa nu mitshi. Mafumu a nganga-nzambi nu malemba atumine athu ene.
48 Muthu wamudigile waahanele gijiyishilo, wazuelele egi: “Muthu nguza muhana beze, jiyenu egi muene; mukuatenu.”
49 Yudasa wayile gudi Yesu, wamuwambelele egi: “Moyo Rabi!” Gungima wamuhanele beze nu gisemo giagasue.
50 Uvi Yesu wamuhudile egi: “Yala, itshi weza mutshita haha?” Gungima athu asuenele gudi Yesu, amukuatele.
51 Uvi muthu mumoshi wakhalele nu Yesu, wazolele phogo yenji ya khusa, wabatuile ditshi dia muenya mudimo wa nganga-nzambi wakoma.
52 Uvi Yesu wamuwambelele egi: “Vutula phogo yaye ya khusa ha fundo diayo, handaga athu agasue adi mukuata phogo ya khusa, mbaafua gu phogo ya khusa.
53 Aye udi mutangiza egi ame ngajiyilego gutoga Tata wami hagula angutumine mahunji gubalega 12 a anjelo mu tangua edi ba?
54 Gula ngakalagala ngenyi, luholo lutshi mbayitagenesa giwa ndaga idi muzuela Mukanda wa Nzambi egi idi naye gukalegewa ngenyi?”
55 Gungima Yesu wahudile athu anyi avula ajile gumukuata egi: “Enue muaza gungukuata nu phogo jia khusa nu mitshi gifua ngudi nzangi ba? Ngakhalele mulongesa mu tempelo lusugu nu lusugu, uvi enue muangukuatelego.
56 Uvi ndaga eji jiagasue jiabua ha gutagenesa ndaga jiadiangele guzuela* baprofete.” Gungima alandudi enji agasue amubembele, alengele.
57 Athu anyi akuatele Yesu ayile n’enji gumbo dia nganga-nzambi wakoma Kayifa, fundo diadibungishile alongeshi a mikhuala nu malemba a athu.
58 Uvi Phetelo wakhalele gualandula gualeha-leha uu nu mu luphango lua nganga-nzambi wakoma. Hanginyine muene mu luphango, wakhalele fundo diakhalele enya mudimo ha gutala ndaga yakhalele naye gukalegewa.
59 Mafumu a nganga-nzambi nu enya Sanedrene agasue akhalele mukamba ndaga ya mambo ya gufundjila Yesu hagula amushiye.
60 Athu avula ajile muta uthemua wa mambo, uvi amonelego nga ndaga imoshi ya gumufundjila. Gungima athu mbadi ajile,
61 azuelele egi: “Muthu owu wazuelele gamba, ‘Ngajiya gumuanga tempelo ya Nzambi, nguyitungi mu masugu thathu.’”
62 Gungima nganga-nzambi wakoma wazugile mu molu, wahudile Yesu egi: “Aye ushigo muzuela nga gima? Itshi udi mutangiza mukunda nu ndaga jidi gugufundjila athu awa?”
63 Uvi Yesu wahenele tedie. Hene nganga-nzambi wakoma wamuwambelele egi: “Diloge gutuama dia Nzambi wa monyo, tuwambele gula aye udi Klisto, Mun’a Nzambi!”
64 Yesu wamuwambelele egi: “Aye hakhaye wazuela. Uvi ngudi gumiwambela egi: “Sendese mangino mbamumona Mun’a muthu mukhala gu koko dia madia dia Nzambi wa ngolo, nu udi muza mu matuta mu dilu.”
65 Nganga-nzambi wakoma watawile milele yenji ya holu, wazuelele egi: “Muene udi mushinga Nzambi ngenyi, itshi tukambela luko mathemua ako? Enue hakhenu muadivila luholo ludi muene mushinga Nzambi.
66 Muamona gikuatshi?” Ene azuelele egi: “Udi naye gufua.”
67 Hangima, amufitshile mate gu phala, amubetele makhome. Ako amubetele mbanda.
68 Amuwambelele egi: “Aye Klisto, gula udi profete, tuwambele nanyi wagubeta?”
69 Phetelo wakhalele hashi hanze mu luphango, muenya mudimo mumoshi wa mukhetu wajile, wamuwambelele egi: “Aye nji wakhalele nu Yesu, muenya gu Galilea!”
70 Uvi Phetelo watunyile ha meso a athu agasue egi: “Ngushigo mujiya ndaga udi muzuela.”
71 Hakhalele muene muya gu mufulo, muenya mudimo muko wa mukhetu wamumonele, wawambelele athu akhalele hene egi: “Muthu owu wakhalele nji nu Yesu wa gu Nazaleta.”
72 Uvi Phetelo waditunyile luko, wadilogele egi: “Ngushigo mujiya muthu owu!”
73 Tangua diazonda gungima, athu anyi akhalele hene awambelele Phetelo egi: “Giamatshidia aye nji udi mukuaku’awo, handaga luholo luaye lua guzuela ludi gugufunda.”
74 Uvi muene watunyile, wadilogele egi: “Ngushigo mujiya muthu owu!” Mu tangua diene kolombolo diadidile.
75 Phetelo wawungulugile mbimbi jiamuwambelele Yesu egi: “Gutuama egi kolombolo didile, uza gungutuna mbala jitatu.” Wazogele hanze, wadidile mangololo.
Mbimbi goshi'a diyiji
^ Nga “gudia gu mesa.”
^ Nga “gungusumbisa.”
^ Nga “nyuma idi mutshigina.”
^ Nga “jiasonegele.”
