Mukanda wa Matayo 27:1-66
-
Yesu wahanewa ha mago a Philato (1, 2)
-
Yudasa wadijitshiga shinga (3-10)
-
Yesu wamagana gutuama dia Philato (11-26)
-
Masuta adi mulela Yesu ha meso a athu avula (27-31)
-
Yesu wakhokhewa ha mutshi gu Gologota (32-44)
-
Gufua gua Yesu (45-56)
-
Gufundjiwa gua Yesu (57-61)
-
Atuma masuta ha gubamba malumba a Yesu muabonga (62-66)
27 Mu gimenegena, mafumu agasue a nganga-nzambi nu malemba a athu ayile giphungi ha gukamba luholo lua gushiya Yesu.
2 Amujitshigile, ayile n’enji, amuhanele gudi guvelenele Philato.
3 Tangua Yudasa munu wadigile Yesu wamonele egi Yesu wakuatewa ha gushiyiwa, wavile gikenene giavula. Hene, wayile gudi mafumu a nganga-nzambi nu malemba a athu ha guavutuila makuta 30 a utadi wa siliva.
4 Waawambelele egi: “Ngakalagala gubola luholo ngadigi muthu gatshitshilego genji gubola.” Uvi ene amuwambelele egi: “Na esue udi mulonga wetu ba? Idi gugutalela aye!”*
5 Muene wabishidile makuta a utadi wa siliva mu tempelo, wazogele, wayile, wadijitshigile shinga, wafuile.
6 Uvi mafumu a nganga-nzambi anonele makuta ene, azuelele egi: “Ishigo yatagana egi tumbe makuta awa mu mushete wa gijila, handaga ene adi ndando ya mahatshi a muthu.”
7 Ayile giphungi, azanguile makuta ene, a asumbile dihia gudi mubumbi wa nzungu hagula akhale mufundjila ngenji.
8 Gishina giene uu nu mangino dihia diene diana tamegewa egi Dihia dia Mahatshi.
9 Yatagenesele mbimbi jiadiangele guzuela profete Yelemiya egi: “Azanguile makuta 30 a utadi wa siliva, ndando yahagewe mukunda nu muthu. Ndando yene yahagewe gudi ana ako a enya Isalele.
10 Ene a ahanele ha gusumba dihia dia mubumbi wa nzungu, gifua muanguwambelele Yehowa.”
11 Yesu wakhalele wa gumagana gutuama dia guvelenele, muene wamuhudile egi: “Aye udi Fumu wa enya Yuda ba?” Yesu wamuvutudile gamba: “Aye hakhaye wayizuela.”
12 Uvi tangua mafumu a nganga-nzambi nu malemba a athu akhalele gumufunda, muene gazuelelego nga gima.
13 Gungima Philato wamuhudile egi: “Aye ushigo muvua ndaga jiagasue adi muzuela ha gugufunda ba?”
14 Uvi muene wahenele tedie, gamuwambelelego nga mbimbi imoshi, hene guvelenele wadihudile muavula.
15 Mu sungi yagasue ya wano, guvelenele wakhalele nu khadilo dia guzola muenya bologo mumoshi, munu athu akhalele mutshigina.
16 Mu tangua diene, guakhalele nu muthu mumoshi mu bologo wakhalele mujiyiwa muavula, jina dienji Barabase.
17 Tangua athu adibungishile, Philato waahudile egi: “Nanyi muatshigina egi nguzole mu bologo? Barabase nga Yesu wana tamegewa egi Klisto?”
18 Handaga Philato wakhalele mujiya egi giphi giaatumine ha guhana Yesu ha mago enji.
19 Luko, tangua diakhalele muene ha nguasa yenji ya gusophesa, mukaji’enji watumine muthu mumoshi ha gumuwambela egi: “Unginyigo mu ndaga ya muthu yonu wabonga, handaga mangino ngalotshi nzoji yangusagesa mukunda nu muene.”
20 Uvi mafumu a nganga-nzambi nu malemba a athu akhalele mushinjiga athu ha gutoga egi abembe Barabase, uvi ashiye Yesu.
21 Hene guvelenele waahudile egi: “Mukatshi dia athu awa mbadi, muatshigina egi nguzole nanyi mu bologo?” Ene azuelele egi: “Barabase.”
22 Philato waahudile egi: “Itshi ngukalagala giwa mukunda nu Yesu wana gutamegewa egi Klisto?” Mukut’awo agasue azuelele egi: “Akhokhewe ha mutshi!”*
23 Muene waahudile egi: “Mukunda natshi? Ndaga itshi yabola yakalagala muene?” Uvi mukut’awo agasue akhalele mukaluluga mangololo egi: “Akhokhewe ha mutshi!”
24 Philato wamonele egi gajiyilego gutshita nga ndaga imoshi; wajiyile nji egi yajiya guzola matululu avula. Wazudile meya, wawevele mago enji gutuama dia athu agasue, wazuelele egi: “Mahatshi a muthu owu ashigo ha muto wami, idi gumitalela enue.”
25 Athu agasue azuelele egi: “Mahatshi enji akhale ha mito yetu nu ya an’etu.”
26 Wazolele Barabase mu bologo, uvi wahanele njila egi Yesu abetewe nu akhokhewe ha mutshi.
27 Gungima masuta a guvelenele ayile nu Yesu gu inzo ya guvelenele, adibungishile mukut’awo agasue, amujietele.
28 Amukatuile milele yenji, amusudigile mulele wabenga.
29 Gungima alondele gifulu* gia miya, amusudigile nagio gu muto, amuhanele muhango gu koko dia madia. Gungima afugamele gutuama dienji, asendesele gumulela egi: “Moyo Fumu wa enya Yuda!”
30 Amufitshile mate, gungima azanguile muhango, asendesele gumubeta nawo mu muto.
31 Gu gisugishilo, habembele ene gumulela, amukatuile mulele unu amusudigile, amuvutuile milele yenji ya holu. Gungima ayile n’enji ha gumukhokha ha mutshi.
32 Tangua akhalele muzoga mu dimbo, amonele yala mumoshi, jina dienji Simona, muenya gu dimbo dia Silene. Amukuatele gu ngolo ha gubatela Yesu mutshi wa lamba.*
33 Tangua ahetele ha fundo diana tamegewa egi Gologota, yakotelesa egi Fundo dia Gibozo-bozo gia Muto,
34 amuhanele vinyo yakhalele yagubungisa nu ima yalula* ha gunua. Uvi tangua ayilolele, watunyile gunua.
35 Amukhokhele gu mutshi, atele mubela* ha gudikhaphela milele yenji ya holu,
36 gungima akhalele hashi ha gumutalela.
37 Ahagele isona holu dia muto wenji yakhalele mumonesa ndaga akhalele gumufundila egi: “Yowu Yesu, Fumu wa enya Yuda.”
38 Akhokhele nji nzangi mbadi ha mutshi hamoshi nu Yesu, muko gu koko dienji dia madia, muko gu koko dienji dia mahidi.
39 Athu akhalele mubalega mu njila akhalele gumushinga nu gukundula mito yawo.
40 Akhalele muzuela egi: “Aye wakhalele mutshigina gumuanga tempelo ha guyitunga mu masugu thathu, dihuluise hakhaye! Gula udi mun’a Nzambi, tuluga gu mutshi wa lamba!”*
41 Mafumu a nganga-nzambi nu alongeshi a mikhuala nu malemba a athu asendesele nji gumulela egi:
42 “Muene wahuluishile athu ako, gajiyilego gudihuluisa hakhenji! Gula muene udi Fumu wa Isalele, atuluge gu mutshi wa lamba* henyaha hagula tutshigine.
43 Muene washile gutshigina guenji gudi Nzambi, amuhuluise giwa tutale gula wamuzumba, handaga wakhalele muzuela egi, ‘Ame ngudi Mun’a Nzambi.’”
44 Nu jiene nzangi jiakhokhewe ha mitshi hehi n’enji jiakhalele gumushinga.
45 Hahetele kumbi dia midi,* phipha yabuile mu gifutshi giagasue uu nu mu kumbi dia thathu gungima dia midi.*
46 Mu tangua dia thathu, Yesu wakalugile mu dijui diakola egi: “Eli, Eli, lema sabakatani?” yakotelesa egi, “Nzambi wami, Nzambi wami, mukunda natshi wangubemba?”
47 Havuile ene ndaga eyi, athu ako akhalele hene asendesele guzuela egi: “Muthu owu udi mutamega Eliya.”
48 Mu tangua diene, muthu mumoshi mukatshi diawo wayile phushi, wazanguile ephonje,* wayimbile mu vinyo ilakhua,* wayijitshigile gu muhango, wayihanele Yesu ha gunua.
49 Uvi athu ako azuelele egi: “Mubembe gale! Tutale gula Eliya umuza gumuhuluisa.”
50 Yesu wakalugugile luko mu dijui diakola, gungima wafuile.
51 Mu tangua diene, rido yakhalele mu tempelo yatawugile itshinyi mbadi, sendese gosa uu nu hashi. Mavu adigitshile, maseso abudigile.
52 Malumba* akangugile, mvumbi jiavula jia akombeledi a Nzambi anyi afuile jiazogele hanze.
53 (Athu anyi azogele mu malumba gungima dia gufuzumuga guawo anginyile mu dimbo dia gijila), athu avula a amonele.
54 Tangua fumu wa masuta nu athu anyi akhalele mutalela Yesu amonele gudigita gua mavu nu ndaga eji jiakalegewe, avuile woma wavula, azuelele egi: “Giamatshidia muthu owu wakhalele Mun’a Nzambi.”
55 Guakhalele nji nu akhetu avula akhalele gumutalela gualeha. Akhetu ene akatugile gu Galilea, akhalele gumulandula ha gumukuatesa;
56 Mukatshi diawo guakhalele nu Madiya wa gu Magadala nu Madiya gin’a Yakoba nu Yose; nu mukaji’a Zebedayo gin’a Yakoba nu Yone.*
57 Mu ngueze yala mumoshi wajile, wakhalele muenya umonyi wa gu dimbo dia Alimataya, jina dienji Yozefe; muene nji wabuile mulandudi wa Yesu.
58 Yala muene wayile mutoga Philato egi amuhane kimbi gia Yesu. Philato wahanele njila egi amuhane nagio.
59 Yozefe wazanguile kimbi giene, wagilangele mulele wa linene wabonga.
60 Wahagele kimbi gia Yesu mu malumba ahe-ahe abudile muene mu seso. Wahagele seso yakoma gu mufulo wa malumba* ene, gungima wayile genji.
61 Uvi Madiya wa gu Magadala nu Madiya muko yonu asalele guene hashi gutuama dia malumba.
62 Mu lusugu lualanduile, yakotelesa egi lusugu lua Gudilondega mukunda nu Lusugu lua Guhuluguga, mafumu a nganga-nzambi nu Afalese adibungishile, ayile mumona Philato,
63 amuwambelele egi: “Fumu, tuawunguluga luko ndaga yazuelele muenya mambo munu, tangua diakhalele muene nu monyo. Wazuelele egi: ‘Gungima dia masugu thathu mbangufuzumuga.’
64 Hene tudi gugutoga ha gutuma athu ha guya mutalela malumba enji uu nu mu lusugu lua thathu, hagula alandudi enji ajigo ha gukuya kimbi gienji ha guwambela athu egi, ‘Muene wafuzumuga gu gufua!’ Gula ndo mambo awa mbakhala akoma gubalega a thomo.”
65 Philato waawambelele egi: “Zangulenu masuta muye nawo ha gutalela malumba gifua luholo muatshigina.”
66 Hene ayile, akangele seso gu malumba, ahagele masuta ha guatalela.
Mbimbi goshi'a diyiji
^ Nga “idi mulonga waye!”
^ Nga “ashiyiwe ha mutshi!”
^ Nga “gipho.”
^ Tala Ukoteleshi wa Mbimbi.
^ Meya alula.
^ Nga “njieke.”
^ Tala Ukoteleshi wa Mbimbi.
^ Tala Ukoteleshi wa Mbimbi.
^ Mu Greke: kumbi dia samano.
^ Mu Greke: kumbi dia divua.
^ Nga “sasula.”
^ Nga “vinyo ya nganyi.”
^ Nga “malumba a guwunguluga.”
^ Mu Greke: gin’a ana a Zebedayo.
^ Nga “malumba a guwunguluga.”
