Mukanda wa Matayo 28:1-20
28 Gungima dia Lusugu lua Guhuluguga, mu gimenegena gia lusugu lua thomo lua phoso, hakhalele mutshia guma, Madiya wa gu Magadala nu Madiya muko ayile mutala malumba.
2 Mavu adigitshile mangololo handaga muanjelo wa Yehowa wakatugile mu dilu, wajile wakatuile seso, wakhalele holu dia seso diene.
3 Muene wakhalele mungedima gifua guhenya gua mvula. Milele yenji yakhalele yaphega diago.
4 Masuta anyi atumiwe ha gutalela malumba avuile woma wavula, asendesele gudigita, abuile gifua athu a gufua.
5 Uvi muanjelo wawambelele akhetu ene egi: “Muvuigo woma, handaga ngudi mujiya egi mudi mukamba Yesu washiyiwe ha mutshi.
6 Muene gashigo haha, handaga wafuzumuga gale gifua muazuelele muene. Izenu mutale fundo diakhalele muila wenji.
7 Henyaha ndenu phushi muwambela alandudi enji egi muene wafuzumuga gale gu gufua, wadiangela gale guya gutuama dienu gu Galilea. Guene mbamumumona. Ndaga ngakhadi naye ha gumiwambela yinyinyi.”
8 Hene akatugile gatshididi gu malumba* nu woma nu gusuanguluga guagasue, ayile muphushi ha guwambela alandudi ndaga yene.
9 Yesu wataganele nawo, waawambelele egi: “Moyo wenu!” Ene ayile gudi muene, afugamene gutuama dienji, amukuatele gu malu.
10 Gungima Yesu waawambelele gamba: “Muvuigo woma! Ndenu mutele aphangi’ami lumene hagula aye gu Galilea, guene mbaangumona.”
11 Hakhalele ene muya, masuta anyi amutumiwe ha gutalela malumba anginyile mu dimbo, awambelele mafumu a nganga-nzambi ndaga jiagasue jiabuile.
12 Mafumu a nganga-nzambi adibungishile nu malemba a athu ha guzuelela ndaga yene. Gungima ahanele masuta ene falanga jiavula jia utadi wa siliva.
13 Awambelele masuta ene egi: “Zuelenu gamba, ‘Alandudi enji aji mukuya kimbi gienji mu phipha tangua tuakhadi agubanda.’
14 Gula guvelenele wavua ndaga yene, esue mbatumukotelesela ndaga jiagasue,* enue mbamukhadigo nu gima gia guvuila woma.”
15 Azanguile falanga jia utadi wa siliva, azuelele gifua muaawambelele ene. Uvi lumene elu luamuanganene mukatshi dia enya Yuda uu nu mangino.
16 Uvi, apostolo 11 ayile gu Galilea ha mulundu waadijigile Yesu ha gudimona nawo.
17 Tangua amonele Yesu, afugamene gutuama dienji, uvi ako mukatshi diawo akhalele musha giphapha.*
18 Yesu wasuenele gudi ene, waawambelele egi: “Nzambi wanguhanele ufumu wa ndaga jiagasue mu dilu nu ha mavu.
19 Hene, ndenu gudi athu a ifutshi yagasue, muaabuise alandudi ami, muaabatize mu jina dia Tata nu dia Mona nu dia nyuma ya Nzambi.
20 Muaalongese ha gutumagela ndaga jiagasue ngamiwambelele. Talenu! Mbangukhala n’enu masugu agasue uu nu gu gisugishilo gia mavu awa.”*
Mbimbi goshi'a diyiji
^ Nga “malumba a guwunguluga.”
^ Mu Greke: “mbatumutshiginyisa.”
^ Nga “akhalele mumba maya.”
^ Nga “gindongo egi.” Tala Ukoteleshi wa Mbimbi.
