Mukanda wa Matayo 3:1-17
3 Mu masugu ene, Yone Mubatiji wajile mulongesa mu mavu a luselenga a gu Yudea.
2 Wazuelele egi: “Balumunyenu mitshima, handaga Ufumu wa mu dilu wasuena hehi.”
3 Profete Yeshaya wazuelele mukunda nu muthu yowu egi: “Muthu mumoshi udi muta mukanda mu mavu a luselenga egi: ‘Londenu njila ya Yehowa! Londenu njila jienji muabonga.’”
4 Yone wakhalele musudiga milele yalondewe nu uvuji wa shamo, wakhalele nu mukaba wa gilema gia shitu ha kete. Wakhalele mudia matulu nu wigi wa mu foto.
5 Enya gu Yelusalema nu athu a gu Yudea yagasue nu a membo agasue akhalele hehi nu Muta wa Yordani, akhalele muya gudi muene.
6 Wakhalele guabatiza* mu Muta wa Yordani, akhalele muzuela gubola guawo ha meso a athu agasue.
7 Tangua diamonele muene Afalese nu Asadoke avula muza ha gubatijiwa, waahudile egi: “Enue ana mavambu, nanyi wamitemesa ha gulenga khabu jia Nzambi jidi muza?
8 Kalagalenu ndaga jidi mumonesa egi muabalumuna mitshima.
9 Mutangizago mu mitshima yenu egi: ‘Esue tudi ana a Abalahama.’ Handaga ngudi gumiwambela egi Nzambi wajiya gukalagala egi seso eji jibue ana a Abalahama.
10 Giphangu gidi gale hehi ha gubatula miji ya mitshi. Hene, mutshi wagasue ushigo muhaga mabundu awaha, udi naye gukokewa, umbiwa ha tshuya.
11 Ame ngudi gumibatiza nu meya, handaga muabalumuna mitshima. Uvi muthu udi muza gungima diami wangubalega ngolo, ngushigo ngatagana ha gumukatula saphata gu malu. Muene mbawumibatiza nu nyuma ya Nzambi nu tshuya.
12 Udi nu mbango ya gusuwila ha mago enji, mbawuweva muabonga fundo dienji dia gusuwila, mbawubungisa mbuto mu mukala, uvi isusu, mbawuyimba tshuya tunu tuajiyilego gujimiwa.”
13 Gungima, Yesu wakatugile gu Galilea, wajile gudi Yone gu Muta wa Yordani hagula amubatize.
14 Uvi Yone wasendesele gutuna egi: “Ame ngudi naye gubatijiwa gudi aye, na aye waza luko gudi ame.”
15 Yesu wamuwambelele egi: “Luenyelu tutshite gale ngenyi, handaga gutshita ngenyi guza gutukuatesa ha gutagenesa gutshigina gua Nzambi.” Havile muene ngenyi, wabembele gumutunyisa.
16 Habatijiwe Yesu, tangua diazogele muene mu meya, nu dishimbu ndo, dilu diakangugile. Yone wamonele nyuma ya Nzambi mubulumuga holu dia muto wa Yesu gifua yembe.
17 Luko, dijui diakatugile mu dilu, diazuelele egi: “Yowu Mun’ami ngana guzumba muavula, wana gungusuanguluisa.”
Mbimbi goshi'a diyiji
^ Nga “guavuwa mu meya.”
