Mukanda wa Matayo 4:1-25
4 Gungima, nyuma yatuamezele Yesu mu mavu a luselenga hagula alolewe gudi Diabulu.
2 Hatshitshile muene masugu 40 nu phipha 40 gudia ndo nga gima, wavuile nzala.
3 Diabulu wajile gumulola egi: “Gula udi mun’a Nzambi, wambela maseso awa abue mapha.”
4 Uvi muene wamuwambelele gamba: “Yasonegewe egi: ‘Muthu gashigo naye gukhala nu monyo phamba mukunda nu mapha, uvi mukunda nu mbimbi jiagasue jidi muzoga mu kano dia Yehowa.’”
5 Hangima, Diabulu wayile n’enji mu dimbo dia gijila, wamuhagele holu dia tempelo,
6 wamuwambelele egi: “Gula udi mun’a Nzambi, dibembe gosa ubue hashi, handaga yasonegewe egi: ‘Muene mbawutuma anjelo enji ha guguyamba ha mago awo hagula malu aye adikumigo gu seso.’”
7 Yesu wamulezele egi: “Yasonegewe luko gamba: ‘Ushigo naye gulola Yehowa Nzambi waye.’”
8 Diabulu wamubatele luko holu dia mulundu waleha, wamulezele ufumu wagasue wa ha mavu nu gutumbuga guawo.
9 Gungima, wamuwambelele egi: “Mbanguguhua ima eyi yagasue gula wangufugamena nu wangukombelela.”
10 Uvi Yesu wamuwambelele egi: “Satana, katuga! Handaga yasonegewe egi: ‘Udi naye gukombelela phamba Yehowa Nzambi waye, muene hakhenji udi naye gukalegela mudimo wa gijila.’”
11 Gungima, Diabulu wamubembele. Mu tangua diene, anjelo ajile, asendesele gumukuatesa.
12 Havuile Yesu egi Yone wakuatewa gale, wakatugile, wayile gu Galilea.
13 Gungima, wakatugile gu Nazaleta, wayile mukhala gu Kaphelenauma gu khulo ya Kianga gia Galilea, mu membo a Zabulona nu Nefetali.
14 Ngenyi, yatagenesele ndaga jiazuelele profete Yeshaya egi:
15 “Oo mavu a Zabulona nu Nefetali, mu njila ya Kianga, ha sambua diko dia muta wa Yordani, gu Galilea ga ifutshi!
16 Athu akhalele mukhala mu phipha, amuenene muanya wakoma, athu akhalele mu fundo dia givule-vule gia gufua, muanya waazogelele.”
17 Sendese mu tangua diene, Yesu wasendesele gulongesa egi: “Balumunenu mitshima, handaga Ufumu wa mu dilu wasuena hehi.”
18 Hakhalele Yesu muwenda gu khulo ya Kianga gia Galilea, wamonele mala muyadi, Simona wakhalele mutamegewa egi Phetelo, nu phangi’enji Andele. Akhalele muta wanda mu kianga, handaga akhalele alowi a jishui.
19 Yesu waawambelele egi: “Ngulandulenu, mbangumibuisa alowi a athu.”
20 Abembele mawanda awo gatshididi, amulanduile.
21 Hayile muene gutuama, wamonele mala ako mbadi, Yakoba mun’a Zebedayo nu phangi’enji Yone. Akhalele mulondega mawanda awo mu wato nu sh’awo Zebedayo. Yesu waatamegene.
22 Nu dishimbu ndo, abembele wato nu sh’awo, alanduile Yesu.
23 Gungima, Yesu wawendele mu membo agasue a gu Galilea, walongesele mu sinagoga jiawo, wamuangele lukuma luabonga lua Ufumu, wasagele athu akhalele nu misongo ya maluholo agasue, nu ukhashi wa maluholo agasue.
24 Lukuma luenji luawendele mu membo agasue a gu Siliya. Amubatelele athu agasue akhalele mukata misongo ya luholo nu luholo, nu athu akhalele musagesewa gudi bademo, nu enya gikonyi, nu athu akhalele nu misongo ya khonzo; muene waasagele agasue.
25 Hene, athu avula akatugile gu Galilea nu gu Dekapholi* nu gu Yelusalema nu gu Yudea nu ha sambua dia Muta wa Yordani, akhalele gumulandula.
Mbimbi goshi'a diyiji
^ Nga “gu Membo Kumi.”
