Mukanda wa Matayo 5:1-48
-
DISKUR HOLU DIA MULUNDU (1-48)
-
Yesu wasendesa gulongesa holu dia mulundu (1, 2)
-
Ndaga 9 jiana batela athu gusuanguluga (3-12)
-
Mungua wa ha mavu nu muenda wa ha mavu (13-16)
-
Yesu watagenesa ndaga jiazuelele Mukhuala (17-20)
-
Malongo atadila khadilo dia guvua khabu (21-26), uthambi (27-30), gushiya ulo (31, 32), gudiloga (33-37), guvutula gubola mu gubola (38-42), guzumba mbalagaji (43-48)
-
5 Tangua diamonele muene athu avula, wakandugile holu dia mulundu; wakhalele hashi, alandudi enji ajile gudi muene.
2 Wasendesele gualongesa egi:
3 “Gusuanguluga gudi nu athu adi mujiya egi adi nu funu ya utuameji wa Nzambi,* handaga Ufumu wa mu dilu udi wawo.
4 “Gusuanguluga gudi nu athu adi mudila, handaga mbaaheta ukuateshi.
5 “Gusuanguluga gudi nu athu ahuima,* handaga mbaaheta mavu.
6 “Gusuanguluga gudi nu athu anyi adi nu nzala nu luhungu lua* ndaga jiabonga, handaga nzala jiawo mbajitagenesewa.
7 “Gusuanguluga gudi nu enya khenda, handaga mbaavila nji khenda.
8 “Gusuanguluga gudi nu athu adi nu mitshima yaphelegeta, handaga mbaamona Nzambi.
9 “Gusuanguluga gudi nu athu ana kamba guhuima,* handaga mbaatamegewa egi an’a Nzambi.
10 “Gusuanguluga gudi nu athu adi mumonesewa lamba mukunda nu ndaga jiabonga, handaga Ufumu wa mu dilu udi wawo.
11 “Khalenu nu gusuanguluga gula athu adi gumishinga, adi gumisagesa nu adi gumimbila mambo a luholo nu luholo mukunda nu ame.
12 Suangulugenu, khalenu nu gusuanguluga guavula handaga gishimbigo gienu gidi giavula mu dilu. Handaga baprofete akhalele gutuama dienu, amonesewe nji lamba dia luholo lumoshi.
13 “Enue mudi mungua wa ha mavu; uvi gula mungua wasumunuga,* luholo lutshi wajiya guvutula luko gufula* guawo? Ushigo luko nu ndando, udi naye gubishidiwa hanze hagula athu awudiate.
14 “Mudi muenda wa ha mavu. Dimbo diajiyilego gusuegewa gula didi holu dia mulundu.
15 Gula athu alemesa muenda, anago guwuhaga moshi’a kinda,* uvi ana guwuhaga holu dia gihagelo gia muenda hagula uphelegetese inzo mukunda nu athu agasue adi muene.
16 Enue nji, muanya wenu uleme gu meso a athu, hagula ene amone midimo yenu yawaha nu atumbuise Tata wenu udi mu dilu.
17 “Mutangizago egi ngajile ha gushiya Mukhuala nga ndaga jiasonegele Baprofete. Ngajilego ha guyishiya, uvi ngajile ha guyitagenesa.
18 Giamatshidia ngudi gumiwambela egi dilu nu mavu mbayibalega. Uvi nga gagisona gamoshi gazonda ga Mukhuala mbagakatudiwago uu nu tangua ndaga jiagasue mbajitagenesewa.
19 Hene, muthu wagasue washiya mukhuala wazonda wa mu mikhuala eyi, nu walongesa athu ako ha guwushiya, mbawutamegewa egi muthu wazonda mu Ufumu wa mu dilu. Uvi muthu wagasue wayitumagela nu walongesa athu ako ha guyitumagela, mbawutamegewa egi muthu wakoma mu Ufumu wa mu dilu.
20 Ngudi gumiwambela egi gula makalegelo enu ashigo abonga gubalega a alongeshi a mikhuala nu a Afalese, mbamushigo mungina mu Ufumu wa mu dilu.
21 “Muavile luholo awambelele athu a mu tangua dikulu egi: ‘Ushiyigo muthu. Muthu wagasue washiya muthu udi naye gusophesewa gutuama dia manzuji.’
22 Uvi ame ngudi gumiwambela egi muthu wagasue udi mulandula gubambela phangi’enji khabu, mbawusophesewa gutuama dia manzuji. Luko, muthu wagasue udi muwambela phangi’enji mbimbi jiabola ha gumusegulula, mbawusophesewa gu Tribinale Yakoma. Uvi muthu wagasue wawambela phangi’enji egi ‘udi waheya diago!’ mbawumbiwa mu tshuya tua Gehena.*
23 “Gula wabata mulambu waye gu giwotshielo, uvi tangua waheta guene watangiza egi udi nu ndaga nu phangi’aye,
24 bemba mulambu waye gutuama dia giwotshielo, nda thomo ukambe guhuima nu phangi’aye, gungima vutuga uhane mulambu waye.
25 “Gula muthu wagufunda, divuenu n’enji muphushi tangua mudi muya n’enji gu tribinale, gula ndo muene mbawuguhana ha mago a nzuji, nzuji mbawuguhana ha mago a mubambi wa bologo nu mbawumbiwa mu bologo.
26 Ngudi guguwambela giamatshidia egi mbawushigo muzoga mu bologo gula wafutshilego makuta enji agasue.*
27 “Muavile luholo yazuelewe egi: ‘Ukalagalago uthambi.’
28 Uvi ame ngudi gumiwambela egi muthu wagasue udi mulandula gutala mukhetu nu matangi a gubungisa n’enji muila, wakalagala gale n’enji uthambi mu mutshima wenji.
29 Gula diso diaye dia madia didi gugubuisa mu gubola, dikatule udibishile gualeha. Handaga idi yabonga egi utotese gitshinyi giaye gimoshi gia muila, hafundo egi muila waye wagasue umbiwe mu Gehena.*
30 Luko, gula koko diaye dia madia didi gugubuisa mu gubola, dibatule udibishile gualeha. Handaga idi yabonga egi utotese gitshinyi giaye gimoshi gia muila, hafundo egi muila waye wagasue umbiwe mu Gehena.*
31 “Yazuelewe nji luko egi: ‘Muthu wagasue washiya ulo nu mukaji’enji, udi naye gumuhana mukanda wa gushiya ulo.’
32 Uvi ame ngudi gumiwambela egi, muthu wagasue washiya ulo nu mukaji’enji, uvi mukhetu muene gakalegelego uthambi,* udi gumutuma ha gubua mu uthambi. Muthu wagasue wadizula mu ulo nu mukhetu washiyile gale ulo, wakalagala uthambi.
33 “Luko, muavile luholo awambelele athu a mu tangua dikulu egi: ‘Ushigo naye gudiloga, gungima utunyi gutagenesa ndaga yene. Udi naye gutagenesa ndaga walayele Yehowa.’
34 Uvi ame ngudi gumiwambela egi: Mudilogigo nga hazonda mu jina dia dilu, handaga dilu didi nguasa ya Ufumu ya Nzambi,
35 nga mu jina dia mavu, handaga ene adi fundo dienji dia guhagela malu. Nga mu jina dia Yelusalema, handaga didi dimbo dia Fumu wakoma.
36 Udilogigo mu jina dia muto waye, handaga wajiyilego gubalumuna sanga diaye dilaphe nga diabuita.
37 Mbimbi yenu ‘Ayi’ ikhale ayi, ‘Ndo’ ikhale ndo, handaga mbimbi jianaza gungima jiana katuga gudi muthu wabola.
38 “Muavile luholo yazuelewe egi: ‘Diso dite diso diko, dizo dite dizo diko.’
39 Uvi ame ngudi gumiwambela egi’: Mudiluishigo nu muthu wabola, uvi gula muthu wagubeta mbanda gu butu dia madia, mubalumuine nji butu diko.
40 Gula muthu udi mutshigina gugubata gu tribinale ha gugutambula mulele waye wa mukatshi, muhane nji mulele waye wa holu.
41 Gula muthu udi nu ufumu, wagutuma gu ngolo ha gumubatela ginemo mu njila ya kilometre imoshi, nda n’enji bakilometre mbadi.
42 Gula muthu wagutoga gima, muhane; utunyigo guhana muthu udi mutshigina gusomba* gima gudi aye.
43 “Muavile luholo yazuelewe egi: ‘Udi naye guzumba muthu na muku’enu, uvi udi naye gutuna mbalagaji waye.’
44 Uvi ame ngudi gumiwambela egi: Landulenu guzumba mbalagaji jienu nu gukombelela mukunda nu athu adi gumimonesa lamba.
45 Ngenyi, mbamumonesa diago egi mudi ana a Tata wenu udi mu dilu, handaga muene wana zola muanya gudi athu abola nu gudi athu abonga, wana nogesa mvula gudi athu abonga nu athu abola.
46 Gula mudi muzumba phamba athu anyi ana gumizumba, gishimbigo gitshi mbamuheta? Afutshishi a gitadi nji anago gukalagala ngenyi ba?
47 Gula mudi mumenega phamba aphangi’enu, ndaga itshi yabonga mudi mutshita gubalega athu ako? Aphaganu nji anago gukalagala ngenyi ba?
48 Hene, mudi naye gukhala athu atagana, gifua mudi Tata wenu wa mu dilu.
Mbimbi goshi'a diyiji
^ Nga “athu adi nu nzala ya ndaga jia mu nyuma.”
^ Nga “athu agudibulumuisa.”
^ Nga “phuila ya.”
^ Nga “athu aguhuima.”
^ Nga “watotesa ngolo jiawo.”
^ Nga “gutobola.”
^ Nga “kinda gia guzongela ima.”
^ Shita akhalele mumba ima ya majilo tshuya, hanze ya dimbo dia Yelusalema. Tala Ukoteleshi wa Mbimbi.
^ Nga “nga dikuta dimoshi diazonda gusala ndo.”
^ Tala Ukoteleshi wa Mbimbi.
^ Tala Ukoteleshi wa Mbimbi.
^ Mu Greke: porneya. Tala Ukoteleshi wa Mbimbi.
^ Yakotelesa egi gusomba, gutoga ndo egi mbaaguvutudile nu iko holu.
