Mukanda wa Matayo 6:1-34
-
DISKUR HOLU DIA MULUNDU (1-34)
6 “Temienu hagula mukalagalago ndaga jiabonga gu meso a athu, hagula egi ene amimone. Gula ndo, Tata wenu udi mu dilu mbagashigo gumishimbiga.
2 Hene, tangua udi muhana phutu ima,* ushigigo phungi gifua muana kalagala enya mambo mu sinagoga nu mu njila, hagula athu a atumbuise. Ngudi gumiwambela giamatshidia egi ene ahetshi gale gishimbigo giawo giagasue.
3 Uvi aye tangua udi muhana phutu ima, tshita hagula egi koko diaye dia mahidi dijiyigo ndaga idi mutshita koko diaye dia madia.
4 Hana phutu ima mu gisuegi, ngenyi Tata waye udi gugutala mu gisuegi mbawugushimbiga.
5 “Luko, tangua mudi mukombelela, mukalagalago gifua enya mambo, handaga ene ana guzumba gukombelela mu molu mu sinagoga nu mu phambu jia njila jiakoma hagula athu a amone. Ngudi gumiwambela giamatshidia egi ene ahetshi gale gishimbigo giawo giagasue.
6 Uvi aye tangua udi mukombelela, ngina gu sugu yaye, jidiga gijidigo, kombelela Sh’aye udi gashigo mumonega. Ngenyi Sh’aye udi mumona iwudi mutshita mu gisuegi, mbawugushimbiga.
7 Tangua mudi mukombelela, mukhadigo muvutugila ima imoshi yene gifua muana tshita aphaganu, handaga ene ana tangiza egi Nzambi mbawategelela luholo adi muzuela mbimbi jiavula.
8 Mukhadigo gifua ene, handaga Tata wenu udi mujiya ima mudi nayo funu gutuama egi mumutoge nayo.
9 “Mudi naye gukombelela luholo elu:
“‘Tata wetu udi mu dilu, jina diaye dinemesewe.*
10 Ufumu waye uze, gutshigina guaye gukalegewe ha mavu gifua mu dilu.
11 Tuhane ima ya gudia* tudi nayo funu mangino;
12 tutotesele gubola* guetu, gifua luholo tuana gutotesela athu* ako.
13 Ubembigo egi tubue mu gubola, uvi tuhuluise* ha mago a muthu wabola.’
14 “Handaga gula mudi mutotesela athu gubola guawo, Sh’enu udi mu dilu mbawumitotesela nji gubola guenu.
15 Uvi gula mushigo mutotesela athu gubola guawo, Sh’enu udi mu dilu mbagashigo gumitotesela nji gubola guenu.
16 “Tangua mudi mutuna gudia mukunda nu gukombelela, mukhadigo hundundu gifua enya mambo, handaga ene adi mubolesa phala jiawo* hagula athu a amone egi atunyi ima ya gudia. Ngudi gumiwambela giamatshidia egi ene ahetshi gale gishimbigo giawo giagasue.
17 Uvi aye tangua watuna gudia mukunda nu gukombelela, dikunge maji mu muto, weva nji phala yaye.
18 Ngenyi mbawumonesago egi watunyi ima ya gudia mukunda nu athu, uvi wayitunyi phamba mukunda nu Sh’aye yonu ganago gumonega. Ngenyi Sh’aye udi mumona ndaga udi mutshita mu gisuegi, mbawugushimbiga.
19 “Mubambelago umonyi wenu ha mavu, fundo didi sualala muwudia nga ukelengenye guwubolesa nu hadi nzangi mubula ha guwukuya.
20 Uvi, bambelenu umonyi wenu mu dilu handaga sualala nu ukelengenye yajiyilego guwudia nu nzangi jiajiyilego gungina ha guwukuya.
21 Handaga fundo didi umonyi waye, diene mbadikhala mutshima waye.
22 “Muenda wa muila udi diso. Hene, gula diso diaye didi mutala gima gimoshi,* muila waye wagasue mbawuzala nu muanya.
23 Uvi gula diso diaye didi muvua nzala ya ima yangane,* muila waye wagasue mbawuzala nu phipha. Gula muanya udi mukatshi diaye udi phipha, idi mumonesa egi phipha yene idi diago yabalega gubuita!
24 “Muthu gajiyilego gukhala muhiga wa mafumu mbadi; handaga mbawutuna mungoshi uvi gazumbi muko, mbawujinginyina gudi muko uvi gasegulula muko. Muajiyilego gukhala ahiga a Nzambi nu a Makuta.
25 “Gishina giene ngudi gumiwambela egi: Bembenu gudisagesa mukunda nu monyo wenu egi, itshi mbatudia, itshi mbatunua nga mukunda nu mila yenu egi itshi mbatusudiga. Monyo ushigo nu ndando yavula gubalega ima ya gudia ba? Muila ushigo nu ndando yavula gubalega milele ba?
26 Talenu muabonga tunjila tua gosa; tuanago gukuna, tuanago gukatula mbuto nga gujibungisa mu mikala. Uvi Sh’enu wa mu dilu wana gutudisa. Enue mushigo nu ndando yavula gubalega tunjila ba?
27 Nanyi mukatshi dienu gula udi gudisagesa muavula, wajiya gulehesa monyo wenji nga hazonda?
28 Luko, mukunda natshi mudi gudisagesa muavula mukunda nu milele? Talenu luholo yaji ya mu mahia yana gukula, yanago gukalagala mudimo nga gutunga milele.
29 Uvi ame ngudi gumiwambela egi, nga muene Solomo mu lutumbu luenji luagasue, gasudigilego milele yabonga gifua yaji eyi.
30 Uvi gula Nzambi udi musudigisa muangu wa mu temu udi guene mangino, hamene ubishidiwa ha tshuya, muene mbagashigo gumisudigisa muavula, enue enya gutshigina guazonda ba?
31 Hene, mudisagesago nga hazonda egi ‘Itshi mbatudia?’ nga, ‘Itshi mbatunua?’ nga ndo, ‘Itshi mbatusudiga?’
32 Handaga athu a ha mavu awa ana gudisagesa muavula mukunda nu ima eyi yagasue. Uvi Sh’enu wa mu dilu udi mujiya egi mudi nu funu ya ima eyi yagasue.
33 “Hene, landulenu gukamba thomo Ufumu nu gubonga gua Nzambi, gungima muene mbawumilunda ima eyi yagasue.
34 Mudisagesago nga hazonda mukunda nu lusugu lua hamene, handaga lusugu lua hamene mbalukhala nu milonga yenji. Lusugu nu lusugu ludi nu malamba enji.
Mbimbi goshi'a diyiji
^ Nga “milambu ya khenda.” Tala Ukoteleshi wa Mbimbi.
^ Nga “dikhale dia gijila.”
^ Mu Greke: “dipha.”
^ Mu Greke: “mikudi.”
^ Mu Greke: “enya mikudi.”
^ Nga “tukatule.”
^ Nga “adi mubemba phala jiawo usala.”
^ Nga “didi mumona muabonga.” Mu Greke: “didi dialeba.”
^ Mu Greke: “didi diabola; didi dia shidi.”
