Mukanda wa Matayo 7:1-29
7 “Bembenu gusophesa athu hagula enue nji musophesewago;
2 handaga luholo mudi musophesa athu ako, luene mbaamisophesa nji. Gizongelo mudi muzongela athu ako, giene mbaamizongela nji.
3 Mukunda natshi udi mutala gamulenge gadi mu diso dia phangi’aye, uvi ushigo mumona mutshi wakoma udi mu diso diaye?
4 Nga ndo, luholo lutshi wajiya guwambela phangi’aye egi: ‘Iza ngugukatule gamulenge gadi mu diso diaye,’ uvi aye hakhaye nu mutshi wakoma mu diso diaye?
5 Muenya mambo! Katula thomo mutshi wakoma udi mu diso diaye, gungima mbawumona giwa muabonga luholo lua gukatula gamulenge gadi mu diso dia phangi’aye.
6 “Muhanyigo ima ya gijila gudi jimbua, muhanyigo nji misanga yenu ya ndando gudi ngulu, gula ndo, mbajiyidiata gungima jimibalumugila nu jiminamenesa.*
7 “Landulenu gutoga, mbaamihana; landulenu gukamba, mbamuheta; landulenu gukokola, mbaamizuluila;
8 handaga muthu wagasue udi mutoga, mbaamuhana. Muthu wagasue udi mukamba, mbawuheta. Muthu wagasue udi mukokola, mbaamuzuluila.
9 Nanyi mukatshi dienu, gula mun’enji wamutoga dipha, muene amuhanyi seso?
10 Nga ndo, gula wamutoga ishui, muene amuhanyi nyoga?
11 Gula enue athu abola muana jiya guhana an’enu ima idi yabonga, jiyenu egi Sh’enu udi mu dilu, mbawuhana ima yabonga gudi athu adi gumutoga nayo!
12 “Hene, ndaga jiagasue mudi mutshigina egi athu amikalegele, enue nji mudi naye guakalegela najio. Yadiago, Mukhuala nu Mikanda ya Baprofete yana longesa ngenyi.
13 “Nginenu mu mufulo wazonda, handaga mufulo wakoma nu njila yakoma, idi mutuameza gu gufua; athu avula adi mungina muene.
14 Uvi mufolo wazonda nu njila yakama, idi mubata gu monyo; athu azonda ana guyimona.
15 “Temenenu baprofete a mambo adi gumijila gifua imeme, uvi mukatshi ene adi gifua mbulu jidi nu nzala yakola.
16 Mbamuajiya gu mabundu awo. Athu anago guhela nga hazonda mabundu a vinyo nga a figi gu mitshi ya miya, ishigo ngenyi ba?
17 Luholo lumoshi nji, mutshi wagasue wabonga wana guhaga mabundu abonga, uvi mutshi wagasue wabola wana guhaga mabundu abola.
18 Mutshi wabonga wajiyilego guhaga mabundu abola, mutshi wabola nji wajiyilego guhaga mabundu abonga.
19 Mutshi wagasue ushigo muhaga mabundu abonga, udi naye gukokewa umbiwa ha tshuya.
20 Hene, mbamujiya athu ene gu mabundu awo.
21 “Ishigo muthu wagasue udi gungutamega egi: ‘Fumu, Fumu,’ mbawungina mu Ufumu wa mu dilu, uvi phamba muthu udi mukalagala gutshigina gua Tata wami udi mu dilu.
22 Mu lusugu luene, athu avula mbaanguwambela egi: ‘Fumu, Fumu, tualongeselego mu jina diaye ba? Tuakayelego bademo mu jina diaye ba? Tuatshitshilego ndaga jiavula jia gushimana mu jina diaye ba?’
23 Uvi ame mbanguavutuila egi: ‘Ngushigo gumijiya nga hazonda! Katugenu gutuama diami, enue ashiyi a mikhuala!’
24 “Hene, muthu wagasue udi muvua mbimbi jiami nu udi gujitumagela, mbawukhala gifua muthu watema watungile inzo yenji holu dia seso.
25 Mvula yakola yanogele, mita yazalele, gikudi giakola giajile giabundjile inzo, uvi inzo yene yabuilego, handaga yatungiwe holu dia seso.
26 Uvi muthu wagasue udi muvua mbimbi eji ngazuela, uvi muene nu gujitumagela ndo, mbawukhala gifua muthu waheya watungile inzo yenji ha gishegele.
27 Mvula yakola yanogele, mita yazalele, gikudi giakola giajile giabundjile inzo yene, yabuile nu yamuanganele yagasue.”
28 Hamanesele Yesu guzuela ndaga eji, athu avula adihudile mukunda nu luholo luenji lua gulongesa,
29 handaga gakhalelego mulongesa gifua alongeshi a mikhuala, uvi wakhalele mulongesa gifua muthu udi nu ufumu.
Mbimbi goshi'a diyiji
^ Nga “jiminemega.”
