Mukanda wa Matayo 8:1-34
8 Hakatugile muene holu dia mulundu, athu avula amulanduile.
2 Muenya hute mumoshi wajile gutuama dienji, wamufugamene, wazuelele egi: “Fumu, gula watshigina, wajiya gungusaga.”
3 Yesu wasunuine koko dienji, wamukuatele, wazuelele egi: “Ngatshigina! Vua muabonga.” Mu tangua diene, misongo yenji ya hute yahuile.
4 Gungima, Yesu wamuwambelele egi: “Tala, uwambelago nga muthu mumoshi, uvi nda udimonese gudi nganga-nzambi, uhane mulambu wazuelele Moize ha gumonesa egi wasagewa.”
5 Tangua dianginyile Yesu gu Kaphelenauma, fumu mumoshi wa masuta wayile gudi muene, wamububidile
6 nu wazuelele egi: “Fumu, muenya mudimo wami udi wagubanda monzo, udi nu misongo ya khonzo, udi mukata muavula.”
7 Yesu wamuwambelele egi: “Ngudi muza gumusaga tangua nguza muheta gumbo diaye.”
8 Fumi’a masuta wamuwambelele egi: “Fumu, ngushigo ngatagana hagula aye ungine monzo yami. Uvi zuela khuta mbimbi, ngenyi muenya mudimo wami mbawusagewa.
9 Handaga ame nji ngudi nu mafumu ngana gutumagela. Gungima diami ngudi nu masuta ana gungutumagela. Gula ngawambela suta mungoshi egi, ‘Nda!’ wana guya. Gula ngawambela muko egi, ‘Iza!’ wana guza. Gula ngawambela muenya mudimo wami egi, ‘Tshita ndaga eyi!’ wana guyikalagala.”
10 Havile Yesu ndaga eyi, wadihudile, wawambelele athu akhalele gumulandula egi: “Ngudi gumiwambela giamatshidia egi, khenji ngumona muthu gu Isalele udi nu gutshigina guakoma luholo elu.
11 Uvi ngudi gumiwambela egi athu avula mbaakatuga gu khanda ya mazogelo a kumbi nu gu mayilo a kumbi, mbaaza mukhala mesa amoshi nu Abalahama nu Isaka nu Yakoba mu Ufumu wa mu dilu.
12 Uvi ana a Ufumu mbaabishidiwa hanze, fundo didi phipha. Guene mbaakhala mudila nu gudidia mazo.”
13 Gungima, Yesu walezele fumu wa masuta egi: “Vutuga gumbo diaye. Ndaga watogi nu gutshigina guagasue igukalegewe ngenyi.” Muenya mudimo wenji wasagewe mu tangua diene.
14 Tangua dianginyile Yesu monzo ya Phetelo, wasangele giwaji gia Phetelo gia mukhetu wagubanda, handaga wakhalele nu tshuya gu muila.*
15 Yesu wamukuatele gu koko, tshuya tuene tuahuile. Gungima wazugile, wasendesele gulondela Yesu ima ya gudia.
16 Mu ngueze, ajile nu athu avula akhalele nu bademo. Yesu wazolele ivule yabola gudi athu ene nu mbimbi yenji, wasagele athu agasue akhalele nu misongo.
17 Yatshitshiwe ngenyi ha gutagenesa ndaga jiazuelele profete Yeshaya egi: “Muene wazanguile guleba guetu, wabatele nji misongo yetu.”
18 Tangua Yesu wamonele athu avula hehi n’enji, wawambelele alandudi enji ha guya ha sambua diko dia muta.
19 Mulongeshi mumoshi wa mikhuala wajile gudi muene, wamuwambelele egi: “Mulongeshi, mbangugulandula guagasue mbawuya.”
20 Uvi Yesu wamulezele egi: “Mikenge idi nu mawina ayo, tunjila tudi nu yanzu yato, uvi Mun’a muthu gashigo nu fundo dia gubandesa muto wenji.”
21 Gungima mulandudi muko wamuwambelele egi: “Fumu, ngubembe nguye thomo ngufunde gale tata.”
22 Uvi Yesu wamuwambelele egi: “Landula gunguhata, bemba mvumbi jifunde mvumbi jiawo.”
23 Yesu wanginyine mu wato, alandudi enji amulanduile.
24 Gungima, funji yakola yabundjile mu kianga, matshipha-tshipha akhalele mutshuiga wato; uvi Yesu wakhalele wagubanda.
25 Alandudi enji amuzugishile gu tulo, amuwambelele egi: “Fumu, tuhuluise, tudi mutshigina gufua!”
26 Uvi muene waawambelele egi: “Itshi mudi muvila woma ngenyi, enue enya gutshigina guazonda?” Gungima wazugile, wabalele funji nu kianga. Funji yahuile, kianga giahenele tedie.
27 Alandudi enji adihudile mangololo, azuelele egi: “Yowu muthu wa luholo lutshi? Nu funji nu kianga idi gumuvila.”
28 Tangua diahetele muene ha sambua dia kianga, mu mavu a enya Gadala, mala mbadi akhalele nu bademo akatugile gu malumba,* ajile gumutagana. Akhalele enya khuta, hene athu akhalele muvua woma ha gubalega mu njila yene.
29 Akalugile egi: “Mun’a Nzambi, mulonga utshi udi nawo nu esue? Aye waza haha ha gutusagesa gutuama egi tangua diatombele Nzambi ditagane ba?”
30 Guakhalele nu ngulu jiavula jiakhalele mudia hehi nu fundo diakhalele ene.
31 Bademo ene asendesele gumububila egi: “Gula watuzola, tutume tungine getu mu ngulu.”
32 Yesu waawambelele egi: “Ndenu!” Hene azogele gudi athu, anginyile mu ngulu. Ngulu jiagasue jiakatugile muphushi mu mulundu, jiadimbile mu kianga, jiafile.
33 Uvi abambi a ngulu alengele, anginyile mu dimbo; atele lumene lua ndaga jiagasue nu ndaga yabuidile athu anyi akhalele nu bademo.
34 Athu agasue a mu dimbo diene azogele ha gutagana Yesu. Tangua amumonele, amuwambelele ha gukatuga mu dimbo diawo.
