Mukanda wa Matayo 9:1-38
-
Yesu wasaga muenya khonzo (1-8)
-
Yesu watamega Matayo (9-13)
-
Muhu watadila gutuna gudia mukunda nu gukombelela (14-17)
-
Mun’a Yayilo wa mukhetu. Mukhetu mumoshi wakuata songi ya mulele wa Yesu (18-26)
-
Yesu wasaga gifofo nu mbobo (27-34)
-
Mbuto jia gukatula mu dihia jidi jiavula, uvi enya mudimo adi azonda (35-38)
9 Yesu wanginyine mu wato, wazawugile, wayile gu dimbo diawo.
2 Amubatelele muenya misongo ya khonzo wakhalele wagubanda ha gitanda. Hamonele Yesu gutshigina guawo, wawambelele muenya khonzo egi: “Mun’ami! Khala nu gikhesa, gubola guaye guatotesewa.”
3 Alongeshi ako a mikhuala akhalele gudizuelela ene hakhawo egi: “Muthu yowu udi mushingana Nzambi.”
4 Yesu wajiyile matangi’awo, hene waahudile egi: “Mukunda natshi mudi mutangiza ndaga jiabola ngenyi mu mitshima yenu?
5 Mulonga utshi udi waleba ha guzuela? Guzuela egi: ‘Gubola guaye guatotesewa,’ nga guzuela egi: ‘Zuga, wenda’?
6 Uvi hagula mujiye egi Mun’a muthu udi nu ngolo ha mavu jia gutotesela athu gubola... ” Hene wawambelele muenya khonzo egi: “Zuga, zangula gitanda giaye, nda gumbo diaye.”
7 Yala muene wazugile mu molu, wayile gumbo dienji.
8 Tangua athu amonele ndaga eyi, avile woma wavula, atumbuishile Nzambi luholo luahanele muene athu ngolo jia luholo elu.
9 Hakatugile Yesu ha fundo diene, wamonele yala mumoshi, jina dienji Matayo wagukhala mu biro dia afutshishi a gitadi. Wamuwambelele egi: “Iza ungulandule.” Matayo wazugile, wamulanduile.
10 Gungima, hakhalele Yesu mudia* monzo, afutshishi a gitadi avula nu enya gubola ajile. Asendesele gudia* n’enji nu alandudi enji.
11 Uvi tangua Afalese amonele ndaga eyi, ahudile alandudi a Yesu egi: “Mukunda natshi mulongeshi wenu udi mudia nu afutshishi a gitadi nu enya gubola?”
12 Yesu waavile, hene wawambelele egi: “Athu adi muabonga, ana kambago munganga, uvi athu adi mukata, ene ana kamba munganga.
13 Ndenu mukambe ukoteleshi wa mbimbi eji: ‘Ngana tshigina khadilo dia khenda, uvi milambu ndo.’ Handaga ame ngajilego ha gutamega athu abonga, uvi ngajile ha gutamega enya gubola.”
14 Gungima, alandudi a Yone ajile gudi muene, amuhudile egi: “Mukunda natshi esue nu Afalese tuana tuna gudia ha gukombelela, uvi alandudi aye ndo?”
15 Yesu waawambelele egi: “Mafuta a yala udi muzula mukhetu mu ulo ana khalago nu gikenene gula yala muene udi mukatshi diawo. Uvi lusugu yala muene mbawukatudiwa mukatshi diawo, ene mbaatuna giwa ima ya gudia.
16 Gushigo muthu wajiya gutunga gibanji gia mulele uhe-uhe holu dia mulele ukulu, handaga gibanji gia mulele uhe-uhe mbaginana mulele ukulu, ngenyi mbawutawuga muavula.
17 Matombe ahe-ahe anago gumbiwa mu milondo ya ilema ikulu. Gula ndo, milondo ya ilema yana budiga, matombe ana bunduga, milondo ibodi. Uvi matombe ahe-ahe ana gumbiwa mu milondo ya ilema ihe-ihe ha gubamba milondo nu matombe.”
18 Hakhalele Yesu guawambela ndaga eji, fumu mumoshi wajile gudi muene, wafugamene nu wamuwambelele egi: “Idi naye gukhala egi mun’ami wa mukhetu wafi gale, iza umukuate nu koko diaye hagula avue monyo.”
19 Yesu wazugile, walanduile fumu muene. Alandudi enji ayile n’enji.
20 Mukhetu mumoshi wakhalele muzoga mahatshi ivo 12, wayile gungima dia Yesu, wakuatele songi ya mulele wenji wa holu,
21 handaga wakhalele muzuela egi: “Gula ngakuata gami phamba mulele wenji wa holu, ngudi musagewa.”
22 Yesu wabalumugile, wamonele mukhetu muene, wamuwambelele egi: “Mun’ami, khala nu gikhesa! Gutshigina guaye guagusaga.” Sendese mu tangua diene, mukhetu muene wavile muabonga.
23 Tangua diahetele Yesu gu inzo ya fumu muene, wamonele athu akhalele mushiga miziki nu athu avula akhalele mudila mangololo,
24 Yesu wazuelele egi: “Zogenu, handaga mona yowu wa mukhetu gafuilego, uvi udi mubanda tulo.” Athu asendesele gumulela.
25 Hazogele athu ene monzo, Yesu wanginyine. Wakuatele mona muene gu koko, hene mona muene wazugile.
26 Lukuma lua ndaga eyi luamuanganele mu membo agasue a gitshinyi ginyinyi.
27 Tangua diakatugile Yesu ha fundo diene, ifofo mbadi yamulanduile. Yakhalele mukaluga egi: “Mun’a Davidi, tuvuile khenda.”
28 Hanginyile Yesu monzo, ifofo yene mbadi yamulanduile. Yesu waahudile egi: “Mudi musha gutshigina egi ngajiya gumisaga ba?” Ene azuelele egi: “Ayi Fumu.”
29 Yesu wakuatele meso awo, wazuelele egi: “Luholo muamonesa gutshigina, meso enu akanguge.”
30 Meso awo akangugile. Yesu waalezele gamba: “Muwambelago nga muthu mumoshi ndaga eyi.”
31 Uvi tangua azogele hanze, amuangele lumene lua ndaga yene mu membo agasue a gitshinyi ginyi.
32 Hakhalele ene muya, amubatelele mbobo* imoshi yakhalele nu demo.
33 Hazolele Yesu demo diene, mbobo yene yasendesele guzuela. Athu avula akhalele hene ashimanele, azuelele egi: “Khenji tuamonele galego ndaga ya luholo elu gu Isalele.”
34 Uvi, Afalese azuelele egi: “Udi mukaya bademo mu ngolo jia fumu wa bademo.”
35 Yesu wakhalele muwenda mu membo agasue akoma nu azonda. Wakhalele mulongesa mu sinagoga jiawo, wakhalele mumuanga lukuma luabonga lua Ufumu nu wakhalele musaga misongo nu ukhashi wa maluholo agasue.
36 Tangua diamonele muene athu avula, waavidile khenda handaga ene akhalele mumona lamba nu guwungagana gifua imeme ishigo nu mubambi.
37 Hene, Yesu wawambelele alandudi enji egi: “Mbuto jia gukatula mu dihia jidi jiavula, uvi enya mudimo adi azonda.
38 Hene, togenu Fumi’a dihia, hagula atume enya mudimo ha gukatula mbuto mu dihia.”
