Gudi enya Roma 1:1-32
1 Ame Phaula, muhiga wa Klisto Yesu. Angutamegele ha gukhala mupostolo, ngatombewe nji ha gulongesa lukuma luabonga lua Nzambi,
2 lualayele muene mu Mbimbi yenji ya gijila sendese mualeha mu njila ya baprofete enji.
3 Lukuma luene ludi mutadila Mun’enji wavalewe mu giphuta* gia Davidi.
4 Yadiago, Fumi’etu Yesu Klisto udi diago Mun’a Nzambi, handaga Nzambi wamufuzumuine gu gufua mu ngolo jia nyuma yenji.
5 Nzambi wanguvidile* khenda jiavula mu njila ya Yesu. Wangutombele* ha gukhala mupostolo hagula ngukuatese enya ifutshi yagasue ha gusha gutshigina gudi Yesu, amutumagele nu anemese jina dienji.
6 Enue nji mudi mukatshi dia enya ifutshi anyi atamegewe ha gukhala alandudi a Yesu Klisto.
7 Ngudi musonegela athu agasue adi gu Roma anyi Nzambi wana zumba, atamegewe ha gukhala athu a gijila egi:
Tata Nzambi nu Fumu Yesu Klisto amivile khenda jiavula, amihane nji guhuima.
8 Ngudi muhana thomo Nzambi mersi mu njila ya Yesu Klisto mukunda nu mukut’enu agasue, handaga athu a ha mavu agasue adi muzuelela gutshigina guenu.
9 Nzambi ngana kalegela mudimo wa gijila nu mutshima wagasue tangua ngana longesa lukuma luabonga luatadila Mun’enji, udi mujiya muabonga egi ngana tanga majina enu mu isambu yami tangua diagasue.
10 Ngudi mutoga Nzambi egi gula luholo ludi guene, gula idi nji gutshigina guenji, ngajiya guza gumitala henyaha.
11 Handaga ngudi muvua uhote* wa gumimona hagula ngumikuatese mu nyuma, ngenyi muajiya gukhala nu gutshigina guakola.
12 Ngudi mutshigina nji gumimona hagula tudikolese hamoshi, ngenyi gutshigina guami gumikuatese, guenu nji gungukuatese.
13 Uvi aphangi, ngudi mutshigina mujiye egi sendese mualeha, ngana tshigina guza gumitala hagula ngajiya gulongesa athu a gumbo dienu hagula abue alandudi gifua luholo ngatshitshile mu ifutshi iko. Uvi gudi nu gima giana gungukanga njila uu nu mangino.
14 Ngudi nu ginemo gia* gulongesa athu a maluholo agasue, enya Greke nu ngenji;* athu atema nu athu aheya.*
15 Ngudi nu nzala ya gulongesa nji lukuma luabonga gudi enue mudi gu Roma.
16 Ngushigo muvua musonyi ha gulongesa lukuma luabonga, handaga lukuma luene ludi ngolo jia Nzambi mukunda nu guhuluisa athu agasue adi nu gutshigina, thomo enya Yuda, hangima enya Greke.
17 Handaga mu njila ya lukuma luene, Nzambi wana monesa mutshima wenji wabonga gudi athu adi nu gutshigina. Gutshita ngenyi guana gukolesa gutshigina guawo gifua luholo mukanda wa Nzambi udi muzuela egi: “Muthu wabonga mbawukhala nu monyo mukunda nu gutshigina guenji.”
18 Handaga Nzambi mu dilu udi mumonesa khabu jienji gudi athu agasue anago gumunemesa nu gudi athu ana kalagala ndaga jiagasue jiabola nu jia khuta, ana kanga athu ako njila ha gujiya giamatshidia.
19 Handaga a alongesele muabonga ndaga jiagasue jiatadila Nzambi. Nzambi waamonesele ndaga jiene haphelo.
20 Sendese hafugile Nzambi mavu, makalegelo enji anyi ajiyilego gumonewa nu meso, nu ngolo jienji jia ivo nu ivo nu Unzambi wenji yana monega muabonga mu ima yafugile muene. Ngenyi athu ajiyilego guzuela egi tuakhalelego mujiya.
21 Handaga ene ajiyile Nzambi uvi amutumbuishilego, amuhanelego nji mersi. Matangi’awo abuile a githuhu, mitshima yawo yaheya* yabuile phipha.
22 Ene ana gudimona gifua adi athu atema, uvi adi athu aheya.
23 Ha fundo dia gutumbuisa Nzambi yonu gajiyilego gufua, ene adi mutumbuisa gifuanesa gia muthu wana gufua, nu gifuanesa gia tunjila nu gia shitu jia idiatelo nguana nu gia ima yana guwenda vumo mu mavu.
24 Gishina giene Nzambi waabemba ha gukalagala ndaga jia usala, gifua mudi nzala jia mitshima yawo hagula ahane mila yawo musonyi.
25 Ene adi musombegesa giamatshidia gia Nzambi nu mambo. Adi mukombelela ima yafugile Nzambi nu adi guyikalegela mudimo wa gijila, ha fundo dia gukombelela muene Mufugi udi naye gutumbuishiwa mayilago. Amen.
26 Gishina giene Nzambi waabembele nu nzala yakola ya gubungisa muila, handaga akhetu a mukatshi diawo asombegesele gale luholo lua gubungisa muila gifua mualondele Nzambi. Adi mubungisa muila mu luholo lushigo luatagana.
27 Mala nji abembele gale luholo lua gubungisa muila nu akhetu gifua mualondele Nzambi. Adi aguzala pha nu nzala yakola ya gubungisa muila mala nu mala, adi mutshita ndaga jia musonyi, ngenyi adi muheta ndola* yatagana mukunda nu gubola guawo.
28 Luholo atunyile gutshigina Nzambi,* Nzambi waabembele ha gulandula matangi’awo abola, ha gukalagala ndaga jinyi athu ajiyilego gutshita.
29 Ene adi aguzala nu ndaga jiagasue jishigo jiatagana: ndaga jia khuta, nzala ya ima yangane* nu ndaga jiabola. Adi aguzala nu giphi nu khadilo dia gushiya athu nu dia gumana nu mambo nu masunga nu itobo-tobo.*
30 Adi enya lufeto, mbalagaji jia Nzambi, enya ginaga, enya lulendo, ana gudihala, ana tangijila athu ndaga* ha guatshita gubola, anago gutumagela mvuaji jiawo,
31 adi aheya, anago gutagenesa mbimbi jiawo, ashigo nu guzumba gua athu nu khenda.
32 Athu awa ana jiya muabonga mukhuala wa Nzambi udi muzuela egi athu adi mukalagala ndaga jia luholo elu adi naye gushiyiwa, uvi ene adi mulandula gujitshita nu adi mutshigina athu ana kalagala ndaga jiene.
Mbimbi goshi'a diyiji
^ Mu Greke: “vungu.”
^ Nga “watuvidile.”
^ Nga “watutombele.”
^ Nga “nzala.”
^ Mu Greke: “ngudi nu mukudi wa.”
^ Nga “athu ashigo enya Greke.”
^ Nga “nu athu anginyilego makhalasa.”
^ Nga “yahuya.”
^ Nga “lufuto.”
^ Nga “atunyile guheta ujiyi watagana wa Nzambi.”
^ Nga “lukhala.”
^ Nga “lufeto.”
^ Nga “ana mbila athu mambo.”
