Gudi enya Roma 10:1-21
10 Aphangi, ndaga ngudi gudifelela mu mutshima wami nu ngudi mutoga Nzambi mukunda nu enya Isalele idi egi ahuluishiwe.
2 Ngudi muzuela mukunda nu ene egi ana gudihana ha gukombelela Nzambi, uvi anago gumujiya muabonga.
3 Handaga anago gujiya ndaga jidi jiabonga gu meso a Nzambi. Uvi ana gulandula mikhuala yawo hakhawo. Ngenyi anago gutumagela mikhuala ya Nzambi yatadila ndaga jiabonga.
4 Handaga Klisto udi gisugishilo gia Mukhuala, hagula muthu wagasue udi musha gutshigina gudi muene abue muthu wabonga gu meso a Nzambi.
5 Moize wasonegele ndaga jidi naye gutshita muthu ha gubua muthu wabonga gu meso a Nzambi gifua luholo Mukhuala udi muzuela. Wasonegele egi: “Muthu wagasue udi mutshita ndaga eji, mbawukhala nu monyo mukunda nu ndaga jiene.”
6 Uvi mukanda wa Nzambi udi mumonesa egi hagula muthu atamegewe egi udi muthu wabonga gu meso a Nzambi, udi naye gusha gutshigina. Udi muzuela egi: “Uzuedigo mu mutshima waye egi, ‘Nanyi mbawukanduga mu dilu,’ yakotelesa egi ha gubulumuisa Klisto?
7 Nga ndo, ‘Nanyi mbawubulumuga mu wina dishigo nu gisugishilo,’ yakotelesa egi ha guzola Klisto gu gufua?”
8 Uvi mukanda wa Nzambi udi muzuela itshi? Udi muzuela egi: “Mbimbi ishigo gualeha nu aye, idi mu kano diaye, idi nji mu mutshima waye.” Yakotelesa egi “mbimbi” ya gutshigina itudi mulongesa.
9 Handaga gula udi muzuela mu kano diaye ha meso a athu avula egi Yesu udi Fumu, gula nji udi musha gutshigina mu mutshima waye egi Nzambi wamufuzumuine gu gufua, mbawuhuluishiwa.
10 Handaga hagula muthu abue muthu wabonga gu meso a Nzambi, udi naye gusha gutshigina mu mutshima wenji. Uvi hagula muthu ahuluishiwe, udi naye guzuelela gutshigina guene mu kano dienji ha meso a athu avula.
11 Handaga mukanda wa Nzambi udi muzuela mukunda nu Klisto egi: “Muthu wagasue udi musha gutshigina gudi muene, mbashigo muvua musonyi.”
12 Gushigo nu gudisha mukatshi dia muenya Yuda nu muenya Greke, handaga mukut’awo agasue adi nu Fumu mumoshi. Athu agasue ana gumutoga ukuateshi, wana guakuatesa nu gisemo giagasue.
13 Handaga “muthu wagasue udi mutamega jina dia Yehowa mbawuhuluishiwa.”
14 Uvi luholo lutshi athu mbaamutamega gula ashigo musha gutshigina gudi muene? Luholo lutshi mbaasha gutshigina gudi muene gula ashigo gumujiya? Luholo lutshi mbaamujiya gula muthu gaalongeselego?
15 Luholo lutshi mbaalongesa gula muthu gaatuminego? Idi gifua luholo yasonegewe egi: “Malu a athu adi mulongesa lukuma luabonga lua ndaga jiawaha adi abonga.”
16 Uvi mukut’awo agasue atumagelego lukuma luabonga. Yeshaya wazuelele egi: “Yehowa, nanyi washile gutshigina mu ndaga jiavile muene gudi esue?”*
17 Gishina giene, gutshigina guana guza mu ndaga jidi muvua muthu. Uvi muthu wana guvua ndaga jiene gula muthu muko wamulongesa ndaga jiatadila Klisto.
18 Uvi ngudi muhula mukunda nu enya Isalele egi, ahetele luendu lua guvua ba? Ayi, ahetele diago luendu. Uvi mukanda wa Nzambi udi muzuela egi: “Athu a ha mavu agasue avile dijui diawo. Lukuma luawo luayile uu nu gu gisugishilo gia mavu.”
19 Ngudi muhula luko egi, enya Isalele akoteleselego ba? Thomo Moize wazuelele egi: “Mbangumituma ha guvua giphi* mukunda nu athu ashigo enya Isalele. Mbangumituma ha guvuila gifutshi giaheya khabu.”
20 Uvi Yeshaya wazuelele nu ngolo jiagasue egi: “Athu anyi akhalelego gungukamba, angumonele. Athu anyi akhalelego gunguzuelesa, angujiyile.”
21 Uvi wazuelele mukunda nu enya Isalele egi: “Lusugu lua mudidi ngudi musununa mago ami gudi athu ashaga nu a mito yakola.”
