Gudi enya Roma 11:1-36
11 Ngudi muhula egi, Nzambi watunyine athu enji ba? Ndo sha! Handaga ame nji ngudi muenya Isalele, mujigulu* wa Abalahama, wa mu giphuta gia Benyamine.
2 Nzambi atunyinego athu enji anyi adiangele muene gutomba. Enue mushigo mujiya ndaga jidi muzuela mukanda wa Nzambi mukunda nu Eliya, tangua diafundjile muene enya Isalele gudi Nzambi ba?
3 Wazuelele egi: “Yehowa, ashiya baprofete aye, amuanga nji iwotshielo yaye, ngasala ame hakhami. Henyaha adi mukamba nji gungushiya.”
4 Uvi itshi yamuwambelele Nzambi? Wamulezele egi: “Gudi nu athu ami 7 000 asala, afugamelego gutuama dia gisongo gia Bale ha gugikombelela.”
5 Mangino nji gudi nu athu asala anyi atombewe gudi Nzambi mukunda nu khenda jienji jiavula.
6 Henyaha gula atombewe mukunda nu khenda jiavula jia Nzambi, idi mumonesa egi ishigo mukunda nu midimo yawo. Gula ndo, khenda jiavula jia Nzambi jishigo luko nu ndando.
7 Itshi tuajiya guzuela giwa? Enya Isalele ahetelego gima akhalele mukamba diago, uvi athu anyi atombewe agihetele. Athu ako anyi asalele, abuile enya mito yakola.
8 Idi gifua luholo yasonegewe egi: “Uu nu mangino Nzambi waabandesele tulo tuakola hagula meso awo amonyigo nu matshui awo avuigo.”
9 Davidi wazuelele nji egi: “Ima yawo ya gudia ibue gifua wanda nga muheto, hagula ene abue nu ahanewe ndola.
10 Meso awo abuite hagula amonyigo luko. Mitanda yawo ifuguge tangua diagasue.”
11 Hene ngudi muhula egi, tangua enya Yuda akhakhugile, abuile hashi mayilago ba? Ndo sha! Uvi gubua guawo guahanele athu a ifutshi iko luendu lua guhuluishiwa. Ndaga yene yahanele enya Yuda ginjiongo.
12 Henyaha gula gushiya guawo gua mikhuala guabatele athu a ha mavu agasue gubonga, luko, gula guzonda gua mutango wawo guabatele nji athu a ifutshi iko gubonga, idi mumonesa egi tangua mutango wawo mbawuvula ha gubua watagana, mbaabatela athu gubonga guavula gubalega!
13 Henyaha ngudi gumiwambela enue athu a ifutshi iko, handaga ame ngudi mupostolo wa athu a ifutshi. Ngudi mutumbuisa mudimo wami
14 ha gujiya gula ngajiya gutuma enya gifutshi giami* ha guvua ginjiongo. Ngenyi ngajiya guhuluisa athu ako mukatshi diawo.
15 Handaga luholo Nzambi waatunyine, luahanele athu ako a ha mavu luendu lua gudivua n’enji. Uvi henyaha gila Nzambi waatshigina luko, mbayikhala gifua athu afuzumuga gu gufua.
16 Luko, gula gitshinyi gia dipha gidi muhanewa gifua mulambu wa mbuto jia thomo gidi gia gijila, dipha diagasue nji didi dia gijila. Gula muji udi wa gijila, thango jia mutshi nji jidi jia gijila.
17 Thango jiko jia mutshi wa olive jiabatuiwe, uvi jiko jiasalele gu mutshi wene. Uvi enue, ikhale mudi gifua mitshi ya olive ya mu foto, amijitshigile gu mutshi wene wa olive ha gukhala mukatshi dia thango jiasalele gu mutshi wene. Mudi muheta nji gubonga gudi mukatuga gu miji ya mutshi wene.
18 Uvi mutangizago egi mudi nu ndando yavula gubalega thango jiko. Gula muatangiza egi mudi nu ndando yavula, mujimbilago egi ishigo enue mudi mukuatesa miji, uvi miji idi gumikuatesa.
19 Athu ako mukatshi dienu mbazuela egi: “Thango jiko jiabatuiwe hagula ame ngujitshigiwe ha fundo diajio.”
20 Idi ya giamatshidia! Thango jiko jiabatuiwe handaga jiakhalelego nu gutshigina. Uvi enue amijitshigile handaga mudi nu gutshigina. Gishina giene, mukhadigo nu lulendo,* uvi vuilenu Nzambi woma.
21 Handaga gula Nzambi wabatuile thango jiakudile najio mutshi wa olive, enue nji mbawumibatula.
22 Jiya egi Nzambi wakhala muenya khenda; uvi wana guhana nji ndola. Wahanele ndola gudi athu akalegele gubola handaga akhalelego nu gutshigina. Uvi aye gula walandula gunemesa mikhuala yenji, muene mbawugumonesela mutshima wabonga. Gula ndo, aye nji mbawubatudiwa.
23 Enya Yuda nji gula amonesa gutshigina, mbaajitshigiwa luko gu mutshi wa olive, handaga Nzambi udi nu ngolo jia guajitshiga luko gu mutshi wene.
24 Aye wabatudiwe gu mutshi wa olive wa mu foto, agujitshigile gu mutshi wa olive wakunyiwe hembo. Ndaga ya luholo elu yajiyilego gukalegewa. Ngenyi mbayikhala ndaga yaleba diago egi thango jiakudile najio mutshi wa olive jijitshigiwe luko gu mutshi wene!
25 Aphangi, ngatshigina mujiye gisuegi egi gia gijila hagula mutangizago egi mudi athu atema: Enya Isalele ako akolesele mitshima yawo uu nu tangua athu agasue anyi atombewe mukatshi dia ifutshi iko mbaangina.
26 Ngenyi enya Isalele agasue mbaahuluishiwa. Idi gifua luholo yasonegewe egi: “Muhuluishi mbawuzoga gu Siona, mbawukuatesa ana a Yakoba ha gubemba makalegelo awo abola.
27 Tangua mbangukota nawo gikotelo, mbanguatotesela gubola guawo.”
28 Yadiago, enya Yuda ako adi mbalagaji jia Nzambi handaga atunyine lukuma luabonga. Uvi enue ndaga yene yamibatele gubonga. Nzambi watombele ako mukatshi diawo ha gubua mafut’enji, nu wana guazumba mukunda nu ndaga yalayile muene gudi akhakh’awo.
29 Handaga Nzambi mbagashigo gudisagesa mukunda nu ima yaahanele muene, nu gutamega guatamegele muene.
30 Thomo muakhalelego mutumagela Nzambi. Uvi henyaha Nzambi wamivuila khenda mukunda nu gushaga gua enya Yuda.
31 Yadiago, Nzambi wamividile khenda mukunda nu gushaga gua enya Yuda. Uvi wajiya nji guavila khenda gifua luholo luamividile enue khenda.
32 Nzambi wabembele egi athu agasue abue ahiga a gushaga hagula muene avuile athu agasue khenda.
33 Khadilo dienji dia guhana,* nu ndunge jienji, nu ujiyi wenji, yakhalago nu gisugishilo. Gushigo nga muthu wajiya gujiya diago usopheshi wenji, nga gukotelesa milonga yana kalagala muene.*
34 Handaga, “nanyi wajiya gujiya matangi a Yehowa? Nanyi wajiya gumuhana malongo?”*
35 Nga ndo, “nanyi wadiangele guhana Nzambi gima hagula muene amuvutudile nagio?”
36 Handaga ima yagasue yafugiwe gudi Nzambi. Muene wana guyikuatesa hagula ikhale guene. Yana khala nji guene mukunda nu muene. Nzambi udi naye gutumbuishiwa ivo nu ivo. Amen.
Mbimbi goshi'a diyiji
^ Mu Greke: “vungu.”
^ Mu Greke: “muila wami.”
^ Nga “gudihala.”
^ Mu Greke: “umonyi.”
^ Mu Greke: “njila jienji.”
^ Nga “lubelo.”
