Gudi enya Roma 12:1-21
12 Aphangi, luholo Nzambi wamivila khenda, ngudi gumibubila ha guhana mila yenu gifua mulambu wa monyo nu wa gijila wajiya gutshiginyiwa gudi Nzambi. Ngenyi mbamumukalegela mudimo wa gijila nu matangi amoshi.
2 Mubembigo egi ndaga jia ha mavu awa* jimituameze. Uvi sombegesenu makalegelo enu nu luholo luenu lua gutangiza, hagula enue hakhenu mukambe gujiya gula gutshigina gua Nzambi gudi itshi. Handaga gutshigina guenji gudi guabonga, guatagana nu guana gumusuanguluisa.
3 Mukunda nu khenda jiavula jianguvidile Nzambi, ngudi gumiwambela mukut’enu agasue egi mutangizago egi mudi nu ndando yavula gubalega. Uvi tangizenu mu luholo luabonga mu gudivua nu guvula gua gutshigina guahanele Nzambi gudi muthu wagasue.
4 Handaga muila wakhala nu itshinyi yavula, uvi itshinyi yagasue yanago gukalagala mudimo wa luholo lumoshi.
5 Luholo lumoshi nji, esue tudi avula uvi tuakhala muila umoshi handaga tudi mu gudivua nu Klisto. Muthu wagasue mukatshi dietu udi gifua itshinyi ya muila yana kalagala mudimo hamoshi nu itshinyi iko.
6 Nzambi watuvidile khenda jiavula, watuhuile luendu lua gukalagala midimo ya gudisha. Hene gula Nzambi watuhanele luendu lua guwambela athu ndaga jidi khenji jibua galego, tulandulenu guawambela najio mu gudivua nu guvula gua gutshigina guatuhuile muene.
7 Gula Nzambi watuhuile luendu lua gukuatesa athu ako, tulandulenu guakuatesa. Gula watuhuile luendu lua gulongesa, tulandulenu gulongesa.
8 Gula Nzambi watuhuile luendu lua guhana athu ako ngolo, tulandulenu guahana ngolo. Gula watuhuile luendu lua gukaphela* athu ako ima, tulandulenu guyikalagala nu mutshima wabonga. Muthu udi nu ginemo gia gutuameza hungu, udi naye gutuameza mu luholo luabonga.* Gula Nzambi watuhuile luendu lua guvila athu ako khenda, tuyikalagalenu nu gusuanguluga guagasue.
9 Guzumba guenu gukhadigo gua mambo. Tunenu ndaga jiabola, uvi zumbenu* ndaga jiabonga.
10 Dizumbenu mangololo gifua athu a mu fami imoshi. Khalenu athu a thomo ha gunemesa athu ako.
11 Khalenu mukalagala mudimo wakola,* mukhadigo imonya. Nyuma ya Nzambi imikuatese ha gukhala nu gikhesa. Kalagalenu mudimo gifua ahiga a Yehowa.
12 Suangulugenu handaga mudi nu felela. Koleselenu mu malamba. Fubidilenu nji mu gukombelela.
13 Hanenu athu a gijila ima adi nayo funu. Khalenu nu khadilo dia guyamba ngenji.
14 Khalenu mukombelela mukunda nu athu adi gumisagesa; zuelenu ndaga jiabonga mukunda nu ene, muatshigo mukumbu.
15 Suangulugenu nu athu adi musuanguluga, dilenu nu athu adi mudila.
16 Khalenu mutadila athu ako gifua luholo muana guditadila enue hakhenu. Mukhadigo enya lulendo,* uvi khalenu athu a gudibulumuisa. Mudimonyigo egi mudi nu ndunge jiavula.
17 Gula athu amikalegela gubola, muvutulago gubola mu gubola. Uvi kalagalenu ndaga jidi jiabonga gu meso a athu agasue.
18 Gula luholo ludi guene, kalagalenu ngolo ha gukhala mu guhuima nu athu agasue.
19 Aphangi ngana guzumba muavula, muvutulago gubola mu gubola. Uvi bembenu egi Nzambi hakhenji amonese khabu jienji. Handaga mukanda wa Nzambi udi muzuela egi: “Yehowa udi muzuela egi ‘Ame mbanguvutula gubola; ame mbanguhana ndola.’”
20 Uvi “gula mbalagaji waye udi nu nzala, muhane ima ya gudia. Gula udi nu luhungu,* muhane meya a gunua. Handaga gula watshita ngenyi, mbawumuhaga makala a tshuya ha muto.”*
21 Ubembigo egi ndaga jiabola jigubinge. Uvi landula gukalagala ndaga jiabonga ha gubinga ndaga jiabola.
Mbimbi goshi'a diyiji
^ Nga “gindongo egi.” Tala Ukoteleshi wa Mbimbi.
^ Nga “guhana.”
^ Nga “mu luholo luatagana.”
^ Mu Greke: “jinginyinenu gu.”
^ Nga “atshitshi a mudimo akola.”
^ Nga “mukudisago matangi a lulendo.”
^ Nga “phuila.”
^ Yakotelesa egi gutulula muthu mutshima ha gulebesa khabu jienji.
