Gudi enya Roma 13:1-14
13 Muthu* wagasue udi naye gutumagela mafumu a leta, handaga gushigo nga ufumu umoshi wajiya gukhala guene gula Nzambi ahanelego njila. Mafumu adi muhinyina mu mafundo awo mangino, adi muhinyina handaga Nzambi waahanele njila.
2 Gishina giene, muthu gashigo munemesa mafumu a leta, gashigo nji munemesa ulondegi wa Nzambi. Athu agasue ashigo munemesa ulondegi wene, mbaahanewa ndola.
3 Athu anyi ana kalagala ndaga jiabonga, anago guvuila mafumu a leta woma. Uvi athu anyi ana kalagala ndaga jiabola, ene ana guavuila woma. Hene gula watshigina egi uvuigo woma wa mafumu a leta, landula gukalagala ndaga jiabonga. Ngenyi ene mbaagutumbuisa;
4 handaga ene adi enya mudimo wa Nzambi mukunda nu gubonga guaye. Uvi gula wakalagala ndaga yabola, udi naye guaavuila woma, handaga ene ashigo mulaba gubata phogo ya khusa. Adi enya mudimo wa Nzambi ha guhana ndola* gudi athu adi mukalagala ndaga jiabola.
5 Idi nu ndando egi mutumagele mafumu a leta. Mushigo naye guatumagela phamba mukunda nu gulenga ndola. Uvi mudi naye guatumagela hagula mukhale nu mutshima waphelegeta gu meso a Nzambi.
6 Gishina giene enue nji muana futa itadi, handaga mafumu a leta adi enya mudimo wa Nzambi.* Ana kalagala mudimo wene tangua diagasue.
7 Hanenu athu agasue ima mudi naye guahana: muthu udi mutoga gitadi, muhanenu gitadi. Muthu udi mutoga mulambu, muhanenu mulambu. Muthu udi mutoga egi mumuvuile woma, muvuilenu woma. Muthu udi mutshigina egi mumunemese, munemesenu.
8 Mukhadigo nu mukudi nga wa muthu mumoshi. Uvi mudi naye gukhala nu mukudi phamba wa gudizumba mukatshi dienu; handaga muthu udi muzumba muthu n’a muko, udi mutagenesa mukhuala.
9 Mikhuala idi muzuela egi, “Ukalagalago uthambi, ushiyigo muthu, ukuyigo, uvuigo nzala ya ima yangane.” Mikhuala eyi nu mikhuala iko yinyi yagasue, yabungishiwa mu mukhuala umoshi udi muzuela egi: “Zumba muthu n’a muku’enu gifua luholo wana zumba muila waye.”
10 Muthu udi nu guzumba, ganago gukalegela athu ako gubola. Hene muthu udi muzumba athu ako, udi mutumagela mukhuala muabonga.
11 Kalagalenu ndaga eji handaga mudi mujiya sungi tudi. Tangua diatagana hagula enue muzuge gu tulo, handaga henyaha guhuluishiwa guetu guasuena diago hehi gubalega tangua tuabuile alandudi a Klisto.
12 Phipha idi mutshigina guhua; gisugu nji gidi mutshigina gutshia. Hene, tubembenu midimo ya phipha, uvi tusudigenu iluilo ya muanya.
13 Tukhalenu nu makalegelo abonga gifua athu adi muwenda mu muanya. Tukalagalago mawano anyi athu ana gutshita ndaga jiabola, tukuatewago matombe, tuwendjigo uthambi, tudihanyigo gu ndaga jia musonyi,* tukhadigo nu khadilo dia gumana nga dia gudivila gijiongo.*
14 Uvi sudigenu Fumu Yesu Klisto. Mutangizago gutshita ndaga ha gusuanguluisa nzala jia mila yenu.
Mbimbi goshi'a diyiji
^ Nga “monyo.”
^ Nga “ha gumonesa khabu jia Nzambi.”
^ Nga “adi enya mudimo wa Nzambi mukunda nu athu agasue.”
^ Mu Greke: “aselgeya.” Tala Ukoteleshi wa Mbimbi.
^ Nga “fuwa.”
