Gudi enya Roma 14:1-23
14 Yambenu muthu udi nu gutshigina gualeba, uvi musophesago athu adi nu matangi a gudisha nu enu.*
2 Muthu muko udi nu gutshigina guakola, udi mudia genji ima yagasue. Uvi muthu muko udi nu gutshigina gualeba, udi mudia phamba mayiji.
3 Muthu udi mudia ima yagasue gashigo naye gusegulula muthu gashigo mudia ima yagasue. Muthu gashigo mudia ima yagasue, gashigo naye nji gusophesa muthu udi mudia ima yagasue, handaga Nzambi watshiginyile* gale muthu muene.
4 Aye udi nanyi ha gusophesa muenya mudimo wa muthu muko? Gula muene wabua nga wamagana, idi mulonga wa fumi’enji. Yadiago muene mbawumagana, handaga Yehowa wajiya gumukuatesa ha gumagana.
5 Athu ako adi mutangiza egi lusugu lumoshi ludi nu ndando yavula gubalega masugu ako. Uvi ako adi mutangiza egi masugu agasue akhala luholo lumoshi. Muthu wagasue atshigine diago egi ndaga idi muzuela muene idi yabonga.
6 Muthu udi munemesa lusugu, udi gulunemesa mukunda nu Yehowa. Muthu udi mudia, udi mudia nji mukunda nu Yehowa, handaga udi muhana Nzambi mersi. Muthu gashigo mudia, gashigo mudia nji mukunda nu Yehowa, uvi udi muhana Nzambi mersi.
7 Yadiago, gushigo nga muthu mumoshi mukatshi dietu wakhala nu monyo phamba mukunda nu muene hakhenji. Gushigo nga muthu wana gufua nji phamba mukunda nu muene hakhenji.
8 Handaga gula tudi nu monyo, tudi nu monyo mukunda nu Yehowa. Gula tuafua, tudi mufua nji mukunda nu Yehowa. Hene ikhale tudi nu monyo nga tuafua, tudi athu a Yehowa.
9 Gishina giene Klisto wafile nu wafuzumugile gu gufua hagula wajiya gukhala Fumu wa athu a gufua nu wa athu adi nu monyo.
10 Uvi mukunda natshi udi musophesa phangi’aye? Nga ndo, mukunda natshi udi musegulula phangi’aye? Handaga mukut’etu agasue mbatusophesewa gudi Nzambi.*
11 Handaga mukanda wa Nzambi udi muzuela gamba: “Yehowa udi muzuela egi, ‘ngudi gudiloga egi athu* agasue mbaafugama gutuama diami. Athu* agasue mbaangutumbuisa nu mbaazuela egi ngudi Nzambi.’”
12 Gishina giene, muthu wagasue mukatshi dietu mbawudisophela gutuama dia Nzambi.
13 Hene tubembenu gusophesa athu, uvi tutshitenu ngolo hagula tukalagalago ndaga yajiya gulebesa gutshigina gua phangi’etu nga gumubuisa mu gubola.*
14 Ngudi mujiya, ngudi nji nu gutshigina mu Fumu Yesu egi gima tuana gudia gianago gudibuisa gia usala giene hakhenji. Uvi giana gubua gia usala phamba gula muthu hakhenji wamona egi gidi gia usala mukunda nu muene.
15 Gula phangi’aye udi gudisagesa mukunda nu ima udi mudia, ushigo mumonesa luko guzumba. Ulebesago* gutshigina guenji mukunda nu ima yaye ya gudia, handaga Klisto wafile mukunda nu phangi’aye.
16 Muhanyigo athu njila ha guzuela ndaga jiabola mukunda nu ndaga jiabonga mudi mukalagala.
17 Handaga hagula muthu angine mu Ufumu wa Nzambi, ishigo mutoga egi adie nga ndo anue, uvi udi naye gukhala nu makalegelo abonga, udi naye gukhala mu guhuima nu athu ako, udi naye nji gukhala nu gusuanguluga handaga nyuma ya Nzambi idi gumukuatesa.
18 Muthu udi mukalegela Klisto mudimo luholo elu gifua muhiga, Nzambi mbawumutshigina, athu nji mbaamutshigina.
19 Gishina giene tukalagalenu ndaga jidi gutukuatesa ha gukhala mu guhuima nu athu ako nu ha gudikolesa.
20 Bemba gushiya mudimo wa Nzambi mukunda nu ima ya gudia. Yadiago, ima yagasue yakhala ya phelegeta. Uvi idi ndaga yabola gula muthu wadia gima gidi mutuma muthu muko ha gubua mu gubola.*
21 Idi ndaga yabonga gula watuna gudia mbiji nga gunua matombe, nga gukalagala ndaga itshi yajiya gutuma phangi’aye ha gubua mu gubola.
22 Gutshigina udi nago, bamba gutshigina guene mukunda nu aye nu mukunda nu Nzambi. Muthu gashigo gudifuisa milonga mukunda nu ndaga idi mukalagala muene, mbawukhala nu gusuanguluga.
23 Gula muthu udi gudihula mihu yavula mukunda nu ima ya gudia, gula wadia ima yene, udi gudifuisa milonga. Handaga udi mudia uvi ashigo nu gutshigina gula ndaga idi mukalagala muene idi yabonga. Yadiago gima giagasue gidi mukalagala muthu, gula muene gashigo nu gutshigina idi gubola.
Mbimbi goshi'a diyiji
^ Nga ndo yajiya gukhala egi, “athu adi gudihula mihu mu matangi.”
^ Nga “wayambele.”
^ Nga “mukut’etu agasue mbatumagana gutuama dia fundo dia gusophesela dia Nzambi.”
^ Mu Greke: “mabongo.”
^ Mu Greke: “makano.”
^ Mu Greke: “tuhagigo gikhakhushilo nga gibunji gutuama dia phangi’etu.”
^ Nga “ubolesago.”
^ Mu Greke: “gidi mukhakuisa.”
