Gudi enya Roma 15:1-33
15 Esue tudi nu ngolo, tudi naye gukuatesa athu adi aguleba hagula akolesele. Uvi tushigo naye gutshita ndaga jidi gutusuanguluisa esue hakhetu.
2 Muthu wagasue mukatshi dietu, akalagale ndaga jiabonga jidi musuanguluisa athu ako ha gukolesa gutshigina guawo.
3 Handaga Klisto nji gatshitshilego ndaga ha gudisuanguluisa hakhenji. Uvi wakalegele gifua luholo mukanda wa Nzambi udi muzuela egi: “Mashingo a athu adi gugushinga, adi mubua ha muto wami.”
4 Handaga ima yagasue yasonegewe mu tangua dikulu,* yasonegewe mukunda nu gutulongesa. Tudi nu felela handaga mbimbi ya Nzambi yana gutuhana ngolo nu yana gutukuatesa ha gukolesela.
5 Henyaha Nzambi amikuatese ha gukolesela, amihane nji ngolo. Ngudi mutoga egi amikuatese hagula mukut’enu agasue mukhale nu matangi akhalele nawo Klisto Yesu.
6 Ngenyi mukut’enu agasue mbamukhala nu gudivua guabonga mukatshi dienu ha gutumbuisa Nzambi, sh’a Fumi’etu Yesu Klisto.
7 Tshiginenu* athu ako gifua luholo luamitshiginyile Klisto. Ngenyi Nzambi mbawutumbuishiwa.
8 Ngudi gumiwambela egi Klisto wabuile muenya mudimo wa enya Yuda* ha gumonesa egi Nzambi wana guzuela giamatshidia, nu ha gutshiginyisa egi ndaga jialayile muene gudi akhakh’awo jidi nji jia giamatshidia;
9 hagula egi athu a ifutshi iko atumbuise nji Nzambi mukunda nu khenda jienji. Idi gifua luholo yasonegewe egi: “Gishina giene, mbangugutumbuisa mukatshi dia athu a ifutshi iko. Mbanguyimba nji ngimbo mukunda nu gutumbuisa jina diaye.”
10 Mukanda wa Nzambi udi muzuela luko egi: “Enue athu a ifutshi iko, suangulugenu hamoshi nu athu enji.”
11 Luko: “Enue ifutshi yagasue, nu athu agasue, tumbuisenu Yehowa.”
12 Yeshaya udi muzuela luko egi: “Mujigulu* wa Yese mbawuza; muene mbawuzoga ha guhinyina athu a ifutshi iko. Ene mbaadifelela gudi muene.”
13 Nzambi yago wana guhana athu felela, amihane gusuanguluga guavula nu guhuima guavula handaga muana gusha mutshima gudi muene. Ngenyi mbamukhala nu gudifelela guavula,* mbamuzalesewa nji nu ngolo jia nyuma yenji.
14 Aphangi, henyaha ngudi nu gutshigina egi enue nji mudi muatagana ha gutshita ndaga jiabonga, mudi nu ujiyi wagasue. Mudi muatagana nji ha guditemesa.*
15 Uvi ngudi gumisonegela ha gumiwambela haphelo ndaga jiko, ha gumiwunguluisa* luko najio, mukunda nu khenda jiavula jianguvidile Nzambi.
16 Ngudi muenya mudimo wa Klisto Yesu mukunda nu athu a ifutshi. Ngudi mukalagala mudimo wa gijila wa gulongesa lukuma luabonga lua Nzambi, hagula athu awa a ifutshi iko abue mulambu watagana wabuishiwe wa gijila mu njila ya nyuma ya Nzambi.
17 Ngudi nu gusuanguluga ha gukhala mulandudi wa Klisto Yesu, nu ha gukalagala mudimo wa Nzambi.
18 Mbangushigo muzuelela nga ndaga imoshi ngatshitshile ame hakhami. Uvi mbanguzuelela phamba ndaga jiakalegele Klisto nu jiazuelele muene mu njila yami, ha gukuatesa athu a ifutshi iko ha gumutumagela.
19 Atumagele handaga amonele ijiyishilo nu ndaga jia gushimana jiakalegewe mu ukuateshi wa nyuma ya Nzambi. Ngenyi ngalongesele muavula lukuma luabonga luatadila Klisto, sendese gu Yelusalema uu nu gu provense ya Ilili.
20 Felela diami diakhalele egi ngulongesago lukuma luabonga mu mafundo anyi athu akhalele alongesa gale jina dia Klisto, hagula ngutungigo holu dia fondasio yatungile gale muthu muko.
21 Idi gifua luholo yasonegewe egi: “Athu anyi alongesewego ndaga jiamutadila, mbaamumona. Uvi anyi avilego, mbaakotelesa.”
22 Gishina giene, angukangele luko njila mbala jiavula hagula ngujigo gumbo dienu.
23 Uvi henyaha, ngushigo luko nu terituare gu khanda eji idi khenji ngulongesa galego. Ngudi gale ivo yavula,* ngana khala nu uhote wa guza gumitala.
24 Hene ngudi gudifelela egi tangua mbanguya gu Espanye, mbangumimona. Gungima dia gubalegesa n’enu matangua azonda, ngudi gudifelela egi tangua mbangukatuga gu Espanye, mbamuya gungushinjigila mu njila.
25 Uvi henyaha ngudi muya gu Yelusalema ha gukuatesa athu a gijila.
26 Aphangi a gu Maseduane nu a gu Akaya, asuangulugile ha guhana ima* yawo ha gukuatesa athu a gijila anyi akhalele gu Yelusalema.
27 Aphangi ene asuangulugile ha gutshita ngenyi, handaga akhalele nu mukudi wa aklisto a gu Yelusalema. Aklisto a gu Yelusalema akhaphele umonyi wawo wa mu nyuma nu athu a ifutshi iko. Hene, athu a ifutshi iko akhalele naye gukuatesa aklisto a gu Yelusalema nu ima yawo.
28 Gula ngamanesela guahana ima* yaatumina aphangi, mbangubalegela gumbo dienu ha guya gu Espanye.
29 Ngudi mujiya luko egi tangua mbanguza gumbo dienu, mbanguza nu gusuanguluga guavula gudi mukatuga gudi Klisto.
30 Aphangi, mukunda nu gutshigina muana gusha gudi Fumi’etu Yesu Klisto, nu mu guzumba guana guhana nyuma ya Nzambi, ngudi gumibubila ha gukombelela Nzambi muavula mukunda nu ame gifua luholo ngana guyikalagala.
31 Kombelelenu Nzambi hagula anguhuluise ha mago a athu a gu Yudea anyi anago gusha gutshigina. Kombelelenu nji hagula athu a gijila ngudi mubatela mukungo gu Yelusalema, awutshigine.
32 Hene gula Nzambi watshigina, mbanguza gumbo dienu nu gusuanguluga guagasue hagula tudikolese mu nyuma.
33 Nzambi yonu wana hana athu guhuima, akhale n’enu mukut’enu agasue. Amen.
Mbimbi goshi'a diyiji
^ Nga “mu ginono.”
^ Nga “yambenu.”
^ Mu Greke: “athu ambiwe gu mukanda.”
^ Mu Greke: “muji.”
^ Nga “mbamuzalesewa nu gudifelela.”
^ Nga “gudilongesa.”
^ Nga “gumiyabuluisa.”
^ Nga ndo yajiya gukhala egi, “ndambo ya ivo.”
^ Nga “mukungo.”
^ Nga “mukungo.”
