Gudi enya Roma 16:1-27
-
Phaula udi mujiyisa Aklisto a gu Roma egi phangi Febe udi muenya mudimo wa Klisto (1, 2)
-
Phaula udi mutumina Aklisto a gu Roma moyo (3-16)
-
Phaula udi muwambela Aklisto a gu Roma ha gutemena athu adi muzola ukhaphumunyi (17-20)
-
Mafuta a Phaula adi mutumina aphangi a gu Roma moyo (21-24)
-
Gisuegi gia gijila giajiyiwa (25-27)
16 Ngudi gumitumina* phangi’etu wa mukhetu Febe, udi muenya mudimo wa mu hungu dia Sanekelea.
2 Muyambenu muabonga mu gudivua nu Fumu gifua luholo athu a gijila adi naye guyambewa. Muhanenu ukuateshi wagasue udi nawo muene funu, handaga muene nji wakuatesele aphangi avula, nu ame nji.
3 Menegenu Priska nu Akila, mafut’ami a mudimo mu Klisto Yesu.
4 Ene atshiginyile gutotesa mionyo yawo mukunda nu ame. Hene ame, nu mahungu agasue a athu ashigo enya Yuda, tudi guahana mersi.
5 Menegenu nji aphangi a mu hungu diana gudibungisa monzo yawo. Menegenu phangi Ephanete ngana guzumba muavula. Ephanete udi mukatshi dia athu a thomo* abuile alandudi a Klisto gu Azi.
6 Menegenu Madiya, wakadigile mudimo wakola mukunda nu enue.
7 Menegenu Androkinuse nu Jiniase, ene adi aphangi’ami. Tuakhalele nawo nji mu bologo. Ajiyiwe muabonga gudi apostolo, nu adiangele gubua alandudi a Klisto gutuama diami.
8 Menegenu Ampiliato, futa diami mu Fumu.
9 Menegenu Ulubene, futa dietu wa mudimo mu Klisto. Menegenu nji Stakise, phangi’ami ngana guzumba muavula.
10 Menegenu Aphele, yago watshiginyiwe gudi Klisto. Menegenu Alisetobulo nu athu a monzo yenji.
11 Menegenu phangi’ami Helodina. Menegenu nji Narsise nu alandudi a Fumu a monzo yenji.
12 Menegenu Trifene nu Trifoze. Akhetu awa adi mukalagala mudimo wakola mukunda nu Fumu. Menegenu nji Persise, phangi’etu tuana guzumba muavula, handaga watshitshile mudimo wakola mukunda nu Fumu.
13 Menegenu Lufuse, muthu watombewe gudi Fumu. Menegenu nji gin’enji handaga muene udi nji mama wami.
14 Menegenu Asinkilite nu Filegeona, nu Helemese, nu Patrobase, nu Helemase nu aphangi ako anyi adi nawo.
15 Menegenu Filologe nu Jili, nu Nele nu phangi’enji wa mukhetu, nu Olimpase nu athu agasue a gijila anyi adi nawo.
16 Dimenegenu nu beze* ya gijila. Mahungu agasue a Klisto amitumina moyo.
17 Aphangi, ngudi gumiwambela ha gutemena athu adi muzola ukhaphumunyi, nu adi mukalagala ndaga jidi mutuma athu ako ha gubua mu gubola, nu athu anyi adi mukalagala ndaga jishigo gudivua nu malongo amilongesele. Tunenu athu a luholo elu.
18 Handaga athu a luholo elu ashigo ahiga a Fumi’etu Klisto, uvi adi ahiga a nzala jiawo jia muila.* Ana guzuela mbimbi jidi jiafula gu matshui nu ba diskur a mulebo, ha guhuiga mitshima ya athu aheya.
19 Athu agasue adi mujiya egi muana gutumagela Nzambi. Gishina giene ngudi musuanguluga mukunda nu enue. Uvi ngudi mutshigina egi mukhale athu atema mu ndaga jiabonga. Uvi mujiyigo ndaga jiabola.
20 Gualeha ndo, Nzambi wana guhana athu guhuima mbawutshiongonona Satana goshi’a ikanzo yenu. Fumi’etu Yesu amivile khenda jiavula.
21 Timote, futa diami wa mudimo, wamitumina moyo. Aphangi’ami awa: Lusiuse nu Yazoni nu Sosiphate amitumina nji moyo.
22 Ame Teletuse, ngasonega mukanda owu, ngamitumina nji moyo mu jina dia Fumu.
23 Gayuse, fumi’a inzo ngana khala nu yana gudibungisa hungu diagasue, wamitumina lumene. Erasto, mubambi* wa makuta a dimbo, nu phangi’enji Kuato, amitumina nji lumene.
24 ——
25 Lukuma luabonga ngudi mulongesa, nu ndaga jiatadila Yesu Klisto, jidi mumonesa egi Nzambi wajiya gumihana ngolo. Lukuma elu luabonga ludi gudivua nu ukoteleshi wa gisuegi gia gijila giamonesele Nzambi. Gisuegi egi giasuegewe sendese mualeha.
26 Uvi henyaha gisuegi giene giasologa,* nu atujiyisa nagio mu njila ya ndaga jiasonegele baprofete. Nzambi wetu wa ivo nu ivo wazuelele egi gisuegi giene gidi naye gujiyishiwa gudi athu a ifutshi yagasue hagula athu ene amonese gutshigina gudi muene nu amutumagele.
27 Phamba Nzambi wakhala nu ndunge; muene udi naye gutumbuishiwa mayilago mu njila ya Yesu Klisto. Amen.
Mbimbi goshi'a diyiji
^ Nga “ngudi gumidijiga.”
^ Mu Greke: “mabundu a thomo.”
^ Aklisto akhalele nu khadilo dia gudimenega nu beze tangua akhalele gudibungisa.
^ Nga “a mavumo awo.”
^ Nga “muenya mudimo.”
^ Nga “giajiyiwa.”
