Gudi enya Roma 2:1-29
2 Hene ikhale udi nanyi, ushigo nu gishina gia gusophesela athu ako, handaga aye nji wana kalagala ndaga jiana tshita ene. Hene gula udi guasophesa, udi gudifuisa milonga aye hakhaye.
2 Tudi mujiya egi tangua Nzambi ana sophesa athu ana kalagala ndaga jia luholo elu, wana guasophesa nu giamatshidia giagasue.
3 Uvi udi mutangiza egi gula wasophesa athu ana kalagala ndaga jia luholo elu, uvi aye hakhaye wana gujikalagala, udi mumona egi Nzambi mbagashigo gugusophesa ba?
4 Aye udi musegulula mutshima wabonga wa Nzambi nu khenda jienji jiavula nu guhuiminyina guenji ba? Ushigo mukotelesa egi Nzambi mu mutshima wenji wabonga, udi mutshigina gugukuatesa ha gubalumuna mutshima ba?
5 Uvi luholo udi muenya muto wakola nu ushigo mubalumuna mutshima, Nzambi mbawuguhana diago ndola mu lusugu lua khabu jienji tangua mbadisophesa muene athu mu luholo luatagana.
6 Muene mbawufuta muthu wagasue gifua mudi makalegelo enji.
7 Muene mbawuhana monyo wa ivo nu ivo gudi athu adi gudihana* ha gutshita ndaga jiabonga, handaga ana kamba lutumbu nu ginemua nu monyo wa mayilago.
8 Uvi athu akhala nu khadilo dia gumana nu anago gutumagela giamatshidia, Nzambi mbawaavila khabu nu mbawaahana ndola.
9 Malamba nu gikenene mbabuila athu agasue ana gutshita ndaga jiabola. Thomo enya Yuda, gungima enya Greke.
10 Uvi athu agasue adi mutshita ndaga jiabonga, mbaaheta lutumbu nu ginemua nu guhuima. Thomo enya Yuda, gungima enya Greke.
11 Handaga Nzambi ganago gutomba-tomba.*
12 Athu agasue atshitshile ndaga jiabola uvi ene nu gujiya ndo mikhuala, mbaafua ngenyi mikhuala ndo. Uvi athu agasue atshitshile ndaga jiabola ene nu gujiya mikhuala, mbaasophesewa nu mikhuala yene.
13 Handaga ishigo athu ana guvua mukhuala adi athu abonga gu meso a Nzambi, uvi athu anyi adi mutumagela ndaga jidi muzuela mukhuala ene mbaakhala athu abonga gu meso a Nzambi.
14 Athu a ifutshi iko anago gujiya mukhuala wa Nzambi, uvi ene ana kalagala ndaga jiana zuela mukhuala. Ikhale ashigo mujiya mukhuala wene, uvi ana tshita ndaga jidi gudivua nu mukhuala.
15 Midimo yawo yana monesa egi mukhuala udi wa gusonega mu mitshima yawo. Mitshima yawo yana guawambela nji gula makalegelo awo adi abonga nga abola. Matangi awo ana guafunda nga guabingisa.
16 Ndaga eji mbajikalegewa mu lusugu Nzambi mbasophesa athu mu njila ya Klisto Yesu mukunda nu ndaga ana gutshita mu gisuegi. Ndaga jiene mbajibua mu gudivua nu lukuma luabonga ngana longesa.
17 Athu ako mukatshi dienu ana guditamega egi enya Yuda, adi jigi-jigi gu mikhuala. Adi nu lulendo* handaga ana kombelela Nzambi.
18 Mudi mujiya gutshigina gua Nzambi, mudi mutshigina nji ndaga jiabonga handaga amilongesele najio mu Mikhuala.
19 Muana gutshigina diago egi muajiya gutuameza ifofo nu guhana muanya gudi athu adi mu phipha.
20 Muana tangiza egi muajiya gubela athu aheya nu gulongesa ana azonda, handaga muana gujiya nu muana kotelesa muabonga giamatshidia gidi mu Mukhuala.
21 Uvi aye udi mulongesa athu ako, mukunda natshi ushigo mukalegela ndaga udi mulongesa? Aye udi mulongesa egi “gukuya ndo,” mukunda natshi udi mukuya?
22 Aye udi muzuela egi “guwenda ndo uthambi,” mukunda natshi udi mukalagala uthambi? Aye wana gutuna isongo, mukunda natshi udi mukuya tempelo jia aphagano?
23 Aye udi gudihala mukunda nu mukhuala, mukunda natshi udi musegulula Nzambi luholo udi mushiya Mukhuala wene?
24 Handaga mukanda wa Nzambi udi muzuela egi “athu a ifutshi adi mushinga jina dia Nzambi mukunda nu makalegelo enu.”
25 Gumbiwa gu mukanda gudi nu ndando phamba gula udi mutumagela mukhuala. Uvi gula ushigo mutumagela mukhuala, idi gifua khenji wambiwe galego gu mukanda.
26 Gula muthu udi khenji gambiwa galego gu mukanda udi mukalagala ndaga jiabonga gifua luholo luana zuela Mukhuala, Nzambi mbawumumona gifua wambiwe gale gu mukanda.
27 Gula muthu udi khenji gambiwa galego gu mukanda udi mutumagela ndaga jiana zuela mukhuala, udi gumifuisa milonga. Handaga enue muambiwe gale gu mukanda nu mudi mujiya ndaga jiana guzuela Mukhuala uvi muanago gujitumagela.
28 Handaga gukhala muenya Yuda wa giamatshidia, guanago gumonega gu meso. Gumbiwa gu mukanda gua giamatshidia, gushigo phamba gua mu muila.
29 Uvi gukhala muenya Yuda wa gimatshidia guana katuga mu mutshima. Gumbiwa gu mukanda gua giamatshidia guana katuga nji mu mutshima mu ukuateshi wa nyuma ya Nzambi. Guanago gukatuga mu ndaga jiasonegewe mu mukhuala. Lutumbu lua muthu wa luholo elu luana katuga gudi Nzambi, uvi luanago gukatuga gudi athu.
Mbimbi goshi'a diyiji
^ Nga “mukolesela.”
^ Nga “Nzambi gakhalago nu lutondo.”
^ Nga “ana gudisuta.”
