Gudi enya Roma 3:1-31
3 Gubonga gutshi muthu wajiya guheta gula udi muenya Yuda nga wambiwa gu mukanda?
2 Gubonga gudi guavula. Nzambi wahanele thomo mbimbi yenji gudi enya Yuda.
3 Uvi itshi tuajiya guzuela mukunda nu enya Yuda anyi akhalelego nu gutshigina? Luholo amoneselego gutshigina, idi mukotelesa egi athu ako ajiyilego gusha gutshigina gudi Nzambi ba?
4 Ndo sha! Nzambi wana zuela giamatshidia ikhale athu agasue adi enya mambo. Gifua luholo yasonegewe egi: “Mbawumonesa mu mbimbi jiaye egi udi muthu wabonga, mbawubinga tangua mbaagusophesa.”
5 Uvi gula ndaga jiabola tudi mutshita jidi mumonesa haphelo egi Nzambi udi muthu wabonga, na itshi tuajiya guzuela? Nzambi udi muthu wabola luholo ana monesa khabu jienji ba? (Ngudi muzuela gifua luholo athu ana zuela.)
6 Ndo sha! Gula idi ngenyi, luholo lutshi Nzambi mbawusophesa athu a ha mavu?
7 Uvi gula ngudi muenya mambo nu mambo ngudi mumba adi mumonesa egi Nzambi wana zuela giamatshidia, adi nji mutuma athu ha gumutumbuisa, mukunda natshi Nzambi adi gungutamega egi ngudi muenya gubola?
8 Mukunda natshi tuajiyilego guzuela gifua luholo athu ako ana gutumbila mambo egi tuana zuela egi: “Tutshitenu ndaga jiabola hagula ndaga jiabonga jimonege”? Athu awa adi naye gusophesewa.
9 Esue enya Yuda, tuabalega athu ako ba? Ndo sha! Tangua diagasue tuana gumiwambela haphelo egi ikhale enya Yuda nga enya Greke, mukut’awo agasue adi enya gubola.
10 Gifua luholo yasonegewe egi: “Gushigo nga nu muthu mumoshi udi wabonga, nga mumoshi ndo.
11 Gushigo nga nu muthu udi mukotelesa ndaga muabonga; gushigo nji nga nu muthu udi mukamba Nzambi.
12 Athu agasue ajimbidile gale njila ya giamatshidia, mukut’awo agasue abuile gale athu a githuhu. Gushigo nga nu muthu mumoshi udi mumonesa mutshima wabonga, nga mumoshi ndo.”
13 “Miminyo yawo idi gifua malumba a gukangula; madimi awo ana gumba mambo.” “Ndaga ana zuela mu makano awo jidi gifua lengo-lengo dia nioga.”
14 “Makano awo adi azala pha nu mikumbu nu ndaga jialula.”
15 “Malu awo adi nu phushi jiabala ha guya mushiya athu.”
16 “Ana guluisa athu tangua diagasue nu ana guabatela malamba avula.
17 Anago gujiya njila ya guhuima.”
18 “Anago gunemesa Nzambi.”
19 Henyaha tudi mujiya egi ndaga jiagasue jidi mu Mukhuala jidi mukunda nu athu anyi ana tumagela Mukhuala, hagula nga muthu mumoshi adibingisago, nu hagula athu agasue a ha mavu asophesewe gutuama dia Nzambi nu ahanewe ndola.
20 Gishina giene, gushigo nga nu muthu mumoshi* mbawutamegewa egi muthu wabonga gu meso a Nzambi mukunda nu ndaga jidi muzuela mukhuala, handaga mukhuala wana gutukuatesa ha gujiya muabonga egi tudi enya gubola.
21 Uvi henyaha idi mumonega haphelo egi tuajiya gukhala athu abonga gu meso a Nzambi ikhale tushigo munemesa mukhuala gifua luholo ndaga jidi mu Mukhuala nu jinyi jiasonegele Baprofete jidi guyimonesa.
22 Yadiago, athu agasue anyi ana gusha gutshigina gudi Yesu Klisto, Nzambi wana guabuisa athu abonga gu meso enji, handaga gushigo nu gifutshi giabalega gifutshi giko.*
23 Gushigo nga muthu wajiya guheta gutumbuga gua Nzambi, handaga athu agasue atshitshile gubola.
24 Uvi Nzambi mu khenda jienji jiavula, wana guabuisa athu abonga gu meso enji mu njila ya gibawu giafutshile Klisto Yesu ha guakatula mu uhiga wa gubola. Ndaga yene idi gabalu ga khenda ga Nzambi.
25 Nzambi wahanele Yesu gifua mulambu ha gututotesela gubola* gula tuasha gutshigina mu mahatshi enji. Nzambi wakalegele ngenyi ha gumonesa egi wana gutshita ndaga mu luholo luabonga, handaga mu khenda jienji watotesele gubola guakalegele athu mu tangua dikulu.
26 Nzambi wahanele Yesu gifua mulambu ha gumonesa egi luenyelu nji wana tshita ndaga mu luholo luabonga, luholo ana tamega athu ana gusha gutshigina gudi Yesu egi adi athu abonga gu meso enji.
27 Athu adi luko nu gishina gia gudihala ba? Ndo sha. Adi naye gudihala mukunda nu mukhuala udi mumonesa ndaga athu adi naye gukalagala ba? Ndo sha. Uvi adi naye gudihala mukunda nu mukhuala udi mumonesa gula athu adi nu gutshigina.
28 Handaga tudi mujiya egi gima giana gubuisa muthu, muthu wabonga gu meso a Nzambi gidi gutshigina guenji, uvi ishigo ndaga jidi mutshita muene ha gutumagela mukhuala.
29 Muene udi phamba Nzambi wa enya Yuda ba? Gashigo nji Nzambi wa athu a ifutshi iko ba? Yadiago, muene udi nji Nzambi wa athu a ifutshi iko.
30 Nzambi udi phamba mumoshi. Athu ambiwe gale gu mukanda nu anyi khenji ambiwego gu mukanda, Nzambi mbawamona egi adi athu abonga gu meso enji gula adi musha gutshigina.
31 Yakotelesa egi luholo tudi nu gutshigina, tudi mukatula mikhuala ba? Ndo sha! Tudi guyijigamesa diago.
Mbimbi goshi'a diyiji
^ Mu Greke: “muila.”
^ Mu Greke: “Nzambi anago gukhaphumuna.”
^ Nga “ha gudivua luko n’enji.”
