Gudi enya Roma 4:1-25
4 Itshi tuajiya guzuela giwa mukunda nu khakh’etu Abalahama? Isthi yahetele muene?
2 Gula nga Abalahama watamegewe egi muthu wabonga gu meso a Nzambi mukunda nu midimo yenji, nga wadisunzuile mukunda nu midimo yene, uvi gu meso a Nzambi ndo.
3 Mukanda wa Nzambi udi muzuela itshi? Udi muzuela egi “Abalahama washile gutshigina gudi Yehowa, hene watangewe egi udi muthu wabonga gu meso enji.”
4 Gishimbigo ana guhana muthu udi mutshita mudimo gishigo gabalu ga khenda, uvi gidi gima adi naye gumuhana.*
5 Uvi gula muthu gashigo mutshita mudimo, uvi udi musha gutshigina gudi Nzambi, Nzambi wana gumumona egi udi muthu wabonga gu meso enji, handaga muene wajiya gutamega enya gubola egi adi athu abonga gu meso enji.
6 Davidi nji udi muzuelela gusuanguluga guakhala nago muthu wana tamegewa gudi Nzambi egi udi muthu wabonga gu meso enji, ikhale midimo ya muthu muene ishigo gudivua diago nu mukhuala. Wazuelele egi:
7 “Gusuanguluga gudi nu athu anyi Nzambi waatotesele gubola guawo nu watshuigile masumu awo.
8 Gusuanguluga gudi nu muthu Yehowa mbagashigo mutangiza luko gubola guenji.”
9 Gusuanguluga guene gudi phamba mukunda nu athu ambiwe gale gu mukanda ba? Nga ndo, gudi nji mukunda nu athu anyi khenji ambiwe galego gu mukanda? Handaga tuazuelele egi: “Abalahama washile gutshigina gudi Nzambi hene watangewe gifua muthu wabonga gu meso enji.”
10 Tangua ditshi diazuelele Nzambi egi Abalahama udi muthu wabonga gu meso enji? Tangua diambiwe muene gu mukanda nga ndo tangua diakhalele muene khenji ambiwa galego gu mukanda? Yakhalele mu tangua diakhalele muene khenji ambiwa galego gu mukanda.
11 Gungima amumbile gu mukanda. Gumbiwa guenji gua gu mukanda guakhalele gifua njimbu* yamuhagele Nzambi ha gumonesa egi wabua muthu wabonga gu meso enji, handaga washile gutshigina gudi muene. Ngenyi, wabuile tata wa athu agasue adi musha gutshigina gudi Nzambi ikhale ene ambiwego gu mukanda, hagula ene nji atamegewe egi athu abonga gu meso a Nzambi.
12 Abalahama wabuile nji tata wa athu ambiwe gu mukanda. Muene gashigo phamba tata wa athu adi jigi-jigi gu mukhuala wa gumba athu gu mukanda, uvi udi nji tata wa athu adi nu gutshigina gifua guakhalele nago muene gutuama egi ambiwe gu mukanda.
13 Nzambi galayelego Abalahama nu ajigulu* enji egi mbaheta mavu ahe-ahe handaga wakhalele munemesa mukhuala, uvi wamulayile handaga wakhalele muthu wabonga gu meso enji luholo ashile gutshigina gudi muene.
14 Uvi gula nga ndaga jialayele Nzambi jidi phamba mukunda nu athu ana tumagela mukhuala, nga gutshigina gushigo luko nu ndando nga hazonda. Luko, nga laji diahanele Nzambi gudi Abalahama didi dia githuhu.
15 Mu guzuela guabonga, gushiya Mikhuala guana tuma Nzambi ha guhana athu ndola.* Uvi gula mukhuala ushigo, athu ajiyilego nji gushiya mikhuala.
16 Gishina giene, Nzambi wahanele Abalahama laji handaga washile gutshigina gudi muene. Laji diene diakhalele mumonesa khenda jiavula jia Nzambi. Ngenyi ajigulu* agasue a Abalahama ahete nji gubonga gua laji diene. Ishigo phamba athu ana gutumagela Mikhuala, uvi nu gudi athu adi nu gutshigina gifua guakhalele nago Abalahama, handaga muene udi tata wa mukut’etu agasue.
17 (Ndaga eyi idi gudivua nu ndaga yasonegewe egi: “Ngagutombele ha gukhala tata wa ifutshi yavula.”) Abalahama wamonesele gutshigina gua luholo elu gudi Nzambi wana hana monyo gudi athu agufua nu wana zuela ndaga jidi khenji jibua galego gifua jiabuile gale.*
18 Abalahama gakhalelego mutangiza egi mbawuvuala ana. Uvi wakhalele nu felela nu gutshigina egi mbawubua tata wa ifutshi yavula gifua luholo luazuelele Nzambi egi: “Ajigulu* aye mbakhala nji avula ngenyi.”
19 Abalahama wakhalele mujiya egi muila wenji wakhalele gifua wafui gale, (handaga wakhalele nu ivo hehi nu 100). Sara wakhalele nji gisula,* uvi gutshigina gua Abalahama gualebelego.
20 Tangua Nzambi wamuhanele laji, Abalahama gashilego giphapha* handaga wakhalele nu gutshigina. Hene, wahetele ngolo mukunda nu gutshigina guene. Ngenyi, watumbuishile Nzambi
21 nu washile diago mutshima egi Nzambi mbawutaganesa ndaga jialayele muene.
22 Gishina giene, mukunda nu gutshigina guenji, “Nzambi wamutangele egi udi muthu wabonga gu meso enji.”
23 Uvi mbimbi jidi muzuela egi “Nzambi wamutangele egi udi muthu wabonga gu meso enji,” jiasonegewego phamba mukunda nu muene.
24 Uvi jiasonegewe nji mukunda nu esue, handaga Nzambi mbawututanga egi tudi athu abonga gu meso enji luholo tuana gusha gutshigina gudi muene, yago wafuzumuine Fumi’etu Yesu.
25 Yesu wafuile mukunda nu gubola guetu, uvi Nzambi wamufuzumuine gu gufua hagula esue tubue athu abonga gu meso enji.
Mbimbi goshi'a diyiji
^ Nga “mukudi wenji.”
^ Nga “gijiyishilo.”
^ Mu Greke: “vungu.”
^ Mu Greke: “guana gubata khabu jia Nzambi.”
^ Mu Greke: “vungu.”
^ Nga ndo yajiya gukhala egi, “wana zuela ima yana khalago guene gifua idi guene.”
^ Mu Greke: “vungu.”
^ Nga “gikunya; vumo dia Sara diakhalele gifua diafui gale.”
^ Nga “gambilego maya.”
