Gudi enya Roma 5:1-21
5 Henyaha luholo Nzambi watutamega egi tudi athu abonga gu meso enji mukunda nu gutshigina guetu, tukhalenu mu guhuima* nu Nzambi mu njila ya Fumi’etu Yesu Klisto.
2 Gutshigina guetu mukunda nu Yesu guana gutukuatesa ha gusuena hehi nu Nzambi nu hagula muene atuvile khenda jiavula. Tusuangulugenu* handaga tudi nu felela egi mbatuheta lutumbu lua Nzambi.
3 Tusuangulugenu* nji ikhale tudi mutagana nu malamba, handaga tudi mujiya egi malamba ana gutukuatesa ha gukolesela.
4 Gukolesela guana gutukuatesa hagula Nzambi atutshigine. Gula Nzambi watutshigina, tuana heta felela.
5 Felela dianago gukuatesa musonyi, handaga Nzambi wazalesele guzumba guenji mu mitshima yetu mu njila ya nyuma yenji yatuhanele muene.
6 Uvi tangua tuakhalele athu aguleba, Klisto wafuile mu tangua diatagana mukunda nu athu abola.
7 Yakhala lamba hagula muthu atshigine gufua mukunda nu muthu udi mutshita ndaga jiabonga. Uvi matangua ako muthu wajiya gutshigina gufua mukunda nu muthu wabonga.
8 Uvi Nzambi wana monesa egi wana gutuzumba, handaga Klisto wafuile mukunda nu esue tangua tuakhalele enya gubola.
9 Henyaha luholo mahatshi a Klisto ana gutukuatesa ha gubua athu abonga gu meso a Nzambi, tudi musha mutshima egi Nzambi mbawutuhuluisa mu lusugu lua khabu jienji.
10 Tuakhalele thomo mbalagaji jia Nzambi. Uvi gufua gua Mun’enji guatukuatesele ha gudivua n’enji. Ndaga yene idi gutukuatesa ha gusha mutshima egi Nzambi mbawutuhuluisa mu njila ya monyo wa Yesu, handaga henyaha tudi mafuta a Nzambi.
11 Ndaga yakalegele Nzambi mu njila ya Fumi’etu Yesu Klisto idi gutusuanguluisa nji, handaga mu njila ya Yesu tudi nu ufuta wabonga nu Nzambi.*
12 Gishina giene, gubola guanginyine ha mavu agasue mu njila ya muthu mumoshi. Gubola guabatele gufua, hene gufua guana kuata athu agasue, handaga mukut’awo agasue atshitshile gubola.
13 Handaga gutuama egi Mikhuala ihanewe, gubola guakhalele ha mavu. Uvi gula mukhuala ushigo guene, ajiyilego guwambela muthu egi wakalagala gubola.
14 Ikhale ngenyi, gufua guahinyine athu sendese gudi Adama uu nu gudi Moize. Guana guhinyina nji athu anyi akalegelego gubola gifua gunu guakalegele Adama. Adama wakhalele luholo lumoshi nu muthu wakhalele naye guza.
15 Uvi guhana gua Nzambi gudi gua gudisha nu gubola guakalegele Adama, handaga athu avula afuile mukunda nu gubola gua muthu mumoshi. Uvi khenda jiavula jia Nzambi nu guhana guenji gua khenda guatuhanele muene mu njila ya khenda jiavula jia Yesu Klisto, guabatele athu avula gubonga.*
16 Luholo lumoshi nji, guhana gua Nzambi gua khenda gudi gua gudisha nu gubola guakalegele muthu mumoshi, handaga gubola gua muthu mumoshi guabatele athu agasue ndola. Uvi guhana gua khenda guahanele Nzambi mukunda nu athu avula, guakuatesele athu avula ha gubua athu abonga gu meso enji.
17 Mukunda nu gubola gua muthu mumoshi, gufua guahinyine athu agasue. Uvi tudi musha diago mutshima egi athu mbaaheta monyo nu mbaahinyina gifua mafumu mukunda nu muthu mumoshi, Yesu Klisto. Handaga Nzambi waavidile khenda jiavula nu waabuishile athu abonga gu meso enji. Ndaga yene idi guhana gua khenda gua Nzambi.
18 Athu a maluholo agasue ana gufua mukunda nu gubola gua muthu mumoshi. Luholo lumoshi nji, athu a maluholo agasue mbaatamegewa egi adi athu abonga nu mbaaheta monyo mukunda nu ndaga yabonga yatshitshile muthu mumoshi.
19 Athu avula abuile enya gubola mukunda nu gushaga gua muthu mumoshi. Luholo lumoshi nji, mukunda nu gutumaga gua muthu mumoshi, athu avula mbaabua athu abonga gu meso a Nzambi.
20 Nzambi wahanele Mukhuala ha gumonesa athu egi akalegele gubola guavula. Uvi tangua athu akalegele gubola guavula, Nzambi waavidile nji khenda jiavula diago gubalega.
21 Mukunda natshi? Handaga gubola nu gufua guahinyine athu. Luholo lumoshi nji, khenda jiavula jia Nzambi jiahinyine athu hagula abue athu abonga gu meso enji. Ngenyi, athu ajiya guheta monyo wa ivo nu ivo mukunda nu Fumi’etu Yesu Klisto.
Mbimbi goshi'a diyiji
^ Nga ndo yajiya gukhala egi, “tudi mu guhuima.”
^ Nga ndo yajiya gukhala egi, “tudi nu gusuanguluga.”
^ Nga ndo yajiya gukhala egi, “tukhale nu gusuanguluga.”
^ Nga “tudi mu gudivua guabonga nu Nzambi.”
^ Nga “gudi guaguzala.”
