Gudi enya Roma 6:1-23
6 Itshi tudi naye guzuela? Yakotelesa egi tudi naye gulandula gukalagala gubola hagula Nzambi atuvile khenda jiavula diago ba?
2 Ndo sha! Handaga esue tuafuile gale getu mu gubola. Henyaha luholo lutshi tuajiya gulandula gutshita luko gubola?
3 Nga ndo, mushigo mujiya egi esue tuabatijiwe mu Klisto Yesu, mukut’etu agasue tuabatijiwe nji mu gufua guenji ba?
4 Hene tangua tuabatijiwe, tuafundjiwe n’enji mu gufua guenji, hagula luholo Tata wafuzumuine Klisto mu gutumbuga guenji, esue nji tuwende mu monyo uhe-uhe.
5 Gula tuabungishiwa n’enji hamoshi mu gufua gifua guafuile muene, giamatshidia mbatubungishiwa luko n’enji hamoshi mu gufuzumuga gifua guafuzumugile muene.
6 Handaga tudi mujiya egi umuthu wetu ukulu wakhokhewe ha mutshi hamoshi nu muene, hagula nzala jiabola jiana tuma muila wetu ha gutshita gubola jituhinyinago. Ngenyi tuajiyilego gukhala luko ahiga a gubola.
7 Handaga gula muthu wafua, wana futa* mukudi wa gubola guenji.
8 Gula tuafua nu Klisto, tudi nu gutshigina egi mbatukhala n’enji luko nu monyo.
9 Tudi mujiya egi Klisto mbagashigo luko mufua, handaga wafuzumugile gale gu gufua. Hene gufua guajiyilego gumuhinyina luko nga hazonda.
10 Handaga gufua guafile muene, wafuile mbala imoshi ha gukatula gubola. Muene mbagashigo mufua luko, uvi monyo adi nawo mangino udi mukunda nu gukalagala gutshigina gua Nzambi.
11 Luholo lumoshi nji, mu ndaga yatadila gutshita gubola, mudi naye gudizula gifua athu afuile gale, uvi adi nu monyo ha gukalagala gutshigina gua Nzambi handaga mudi alandudi a Klisto Yesu.
12 Mubembigo egi gubola gulandule gumihinyina hagula gumitume ha gutumagela nzala jia mila yenu ya gufua.
13 Muhanyigo mila yenu* gu disumu ha gukalagala ndaga jiabola* gifua athu afuile gale, uvi henyaha adi nu monyo. Hanenu mila yenu* gudi Nzambi gifua iluilo ya gukalegela ndaga jiabonga.
14 Gubola gushigo naye gumihinyina, handaga enue mushigo mu uhinyinyi wa mikhuala ya Moize. Uvi Nzambi wamividile khenda jiavula.
15 Itshi tuajiya guzuela? Luholo Nzambi watuvidile khenda jiavula, tudi naye gulandula gukalagala gubola handaga tushigo mu uhinyinyi wa mikhuala ya Moize ba? Nga hazonda ndo!
16 Enue mushigo mujiya egi gula muadihana ha gutumagela muthu mumoshi gifua ahiga enji, muadibuisa enue hakhenu ahiga a muthu muene ba? Hene gula mudi ahiga a gubola, mbagumibata gu gufua. Uvi gula mudi ahiga a Nzambi nu mudi gumutumagela, mbamukhala athu abonga gu meso enji.
17 Tudi muhana Nzambi mersi avula handaga muakhalele thomo ahiga a gubola. Uvi henyaha muana tumagela Nzambi luholo muana landula ndaga jiamilongesele muene.
18 Yadiago, luholo muakudiwe mu uhiga wa gubola, henyaha muabua ahiga a ndaga jiabonga.
19 Ngudi mukalegela mbimbi athu ana kotelesa muabonga mukunda nu guleba gua muila wenu. Thomo muabembele egi nzala jia mila yenu jimibuise ahiga a ndaga jiabola nu jia usala. Uvi henyaha hanenu mila yenu gifua ahiga a ndaga jiabonga, ha gutshita ndaga jia gijila.
20 Tangua muakhalele ahiga a gubola, akhalelego gumishinjiga ha gutshita ndaga jiabonga.
21 Ndaga jitshi muakhalele mukalagala mu tangua diene? Muakhalele mutshita ndaga mudi muvuila musonyi mangino. Ndaga jiene jidi mubata gu gufua.
22 Uvi henyaha, amikudile gale mu uhiga wa ndaga jiabola. Muabuile gale nji ahiga a Nzambi. Tshitenu ndaga jia gijila, ngenyi mbamuheta monyo wa mayilago.
23 Handaga gishimbigo gia gubola gidi gufua. Uvi guhana gua khenda gua Nzambi gudi monyo wa ivo nu ivo mu njila ya Fumi’etu Klisto Yesu.
Mbimbi goshi'a diyiji
^ Nga “wana gutshuiga; gutotesela.”
^ Mu Greke: “itshinyi yenu ya muila.”
^ Mu Greke: “gifua iluilo ya gukalegela ndaga jiabola.”
^ Mu Greke: “itshinyi yenu ya muila.”
