Gudi enya Roma 7:1-25
7 Aphangi, mushigo mujiya egi Mukhuala wana guhinyina muthu hadi muene nu monyo ba? Handaga ngudi muwambela athu anyi adi mujiya mukhuala.
2 Ha gufezegesa, mukhuala udi muzuela egi mukhetu wazudiwe gale mu ulo, udi wagujitshiga gudi mulumi’enji gula mulumi’enji udi nu monyo. Uvi gula mulumi’enji wafua, gashigo luko wagujitshiga gu mukhuala wakhalele gumubungisa nu yala muene.
3 Gishina giene hadi mulumie’enji nu monyo, gula wadizula mu ulo nu yala muko, muene wakalagala uthambi. Uvi gula mulumi’enji wafua, gashigo luko wagujitshiga gu mukhuala wakhalele gumubungisa n’enji. Hene gula wadizula mu ulo nu yala muko, gakalegelego uthambi.
4 Enue nji aphangi, muakhalele a gujitshiga gu Mukhuala wa Moize.* Uvi mulambu* wa Klisto wamijituluile gu mukhuala wene. Hene muabuile athu a Klisto wafuzumuiwe gu gufua hagula tuajiya gutshita ndaga jidi musuanguluisa Nzambi.
5 Tangua tuakhalele mulandula nzala jia mila yetu, Mukhuala watukuatesele ha gujiya egi nzala jiene jiabola jiakhalele mutuma muila* wetu ha gubua mu gubola. Gubola guene guakhalele gututuala gu gufua.
6 Uvi henyaha tuakudiwa mu uhiga wa Mukhuala, handaga tuafile gu ndaga yakhalele gutubuisa enya bologo. Ngenyi tushigo luko ahiga mu luholo lukulu, adi mutuamezewa gu mikhuala yasonegewe. Uvi tuabua ahiga mu luholo luhe-luhe handaga nyuma idi gututuameza.
7 Tuzuela itshi giwa? Egi Mukhuala wana tshita gubola ba? Ndo sha! Yadiago, gula nga Mukhuala wakhalelego guene, nga ngajiyilego egi gubola guakhala guene. Ha gufezegesa, gula nga Mukhuala ndo, nga ngajiyilego egi guvua nzala ya ima yangane gudi ndaga yabola, handaga Mukhuala udi muzuela egi: “Uvuigo nzala ya ima yangane.”
8 Uvi mukhuala wangukuatesele ha gujiya gula gubola gudi diago itshi. Wangukuatesele nji ha gujiya egi ngudi nu nzala jia maluholo agasue jia ima yangane. Handaga gula nga mikhuala yakhalelego guene, nga gubola guakhalele gua gufua.
9 Gutuama egi mikhuala ihanewe, ngakhalele nu monyo. Uvi tangua mikhuala yahanewe ngakotelesele giwa egi ngakhalele muenya gubola nu ngafuile.
10 Ngakhalele mutangiza egi mikhuala yene idi gungubata gu monyo, uvi yangubatele gu gufua.
11 Handaga mukhuala wangukuatesele ha gujiya gula gubola gudi diago itshi. Hene, gubola guanguhuigile nu guangushiyile.
12 Gishina giene, Mikhuala ya Moize idi ya gijila. Ndaga jidi muzuela Mikhuala yene jidi nji jia gijila, jiabonga nu jiatagana.
13 Idi mukotelesa egi ndaga jiabonga jiene jiangushiyile ba? Ndo sha! Gubola guangushiyile. Mukhuala udi wabonga, uvi wangukuatesele ha gujiya haphelo egi gubola guakhalele gungubatela gufua. Mukhuala wangukuatesele ha gujiya gula gubola gudi diago itshi.
14 Handaga tudi mujiya egi Mukhuala wakatugile gudi Nzambi mu njila ya nyuma yenji. Uvi mulonga udi egi ame ngudi muthu waleba, angusumbishile* gifua muhiga moshi’a uhinyinyi wa gubola.
15 Ngushigo mukotelesa ndaga ngudi mukalagala. Handaga ndaga ngudi mutshigina, jishigo jiene ngana tshita. Uvi ndaga ngana gutuna, jiene ngudi mutshita.
16 Ngudi mujiya egi Mukhuala udi wabonga, uvi ngudi mulandula gutshita ndaga jinyi ngushigo mutshigina.
17 Ishigo ame ngudi mukalagala ndaga jiene jiabola, uvi gubola gudi mukatshi diami, guene gudi mutshita ndaga jiene.
18 Handaga ngudi mujiya egi gushigo nga gima gimoshi giabonga mukatshi diami, yakotelesa egi mu muila wami wa gubola. Ngana tshigina gutshita ndaga jiabonga, uvi ngushigo nu ngolo jia gujikalagala.
19 Handaga ndaga jiabonga jinyi ngana tshigina gutshita, nganago gujikalagala. Uvi ndaga jiabola ngana gutuna, jiene ngana gutshita.
20 Hene gula ngakalagala ndaga ngushigo mutshigina gutshita, ishigo ame ngudi gujikalagala, uvi gubola gudi mukatshi diami guene gudi gujitshita.
21 Ngudi mumona mukhuala owu mu mutshima wami: Tangua ngudi mutshigina gukalagala ndaga jiabonga, matangi a gukalagala ndaga jiabola adi gungujila.
22 Ngana suanguluga muavula nu mikhuala ya Nzambi mu mutshima wami.
23 Uvi ngudi mumona egi mu muila wami* mudi nu mukhuala uko udi muluisa mukhuala wana tuameza matangi ami. Mukhuala wene wana gungubuisa muenya bologo wa mukhuala wa gutshita gubola udi mu muila wami.*
24 Ngudi muenya malamba avula! Nanyi giwa mbawunguhuluisa gu muila owu udi gungutuala gu gufua?
25 Ngudi muhana Nzambi mersi handaga wanguhuluisa mu njila ya Fumi’etu Yesu Klisto. Gishina giene, mu matangi’ami ngudi muhiga wa mukhuala wa Nzambi, uvi mu muila ngudi muhiga wa mukhuala wa gubola.
Mbimbi goshi'a diyiji
^ Mu Greke: “ha gutadila mukhuala wa Moize muafuile.”
^ Mu Greke: “muila.”
^ Mu Greke: “itshinyi ya muila.”
^ Nga “angudigile.”
^ Mu Greke: “itshinyi ya muila wami.”
^ Mu Greke: “itshinyi ya muila wami.”
