Gudi enya Roma 8:1-39
-
Nyuma ya Nzambi yana hana athu monyo nu yana guakatula mu uhiga (1-11)
-
Nyuma ya Nzambi yana gututshiginyisa egi tudi ana a Nzambi (12-17)
-
Ima yafugile Nzambi idi munenga tangua ana a Nzambi mbaakudiwa mu uhiga (18-25)
-
“Nyuma ya Nzambi yana guzuela ha fundo dietu” (26, 27)
-
Nzambi wadiangele gujiya athu mbatomba muene (28-30)
-
Guzumba gua Nzambi guana gutukuatesa ha gubinga (31-39)
8 Athu adi mu gudivua guabonga nu Klisto Yesu anago gufuishiwa milonga.
2 Handaga mukhuala wa nyuma ya Nzambi wunu wana hana monyo, wagukudile mu uhiga wa mukhuala wa gubola nu wa gufua, handaga aye udi mulandudi wa Klisto Yesu.
3 Mukhuala wa Moize wakhalelego nu ngolo jia gugukatula mu gubola handaga athu adi aleba nu adi enya gubola. Uvi Nzambi wagukudile mu uhiga tangua diatumine muene Mun’enji nu muila gifua wa athu* hagula akatule gubola. Ngenyi Nzambi wafuishile gubola gua athu milonga
4 hagula tutshite ndaga jiabonga jidi muzuela Mukhuala, tubembigo egi muila wetu wa gubola utuhinyine, uvi tubembe egi nyuma ya Nzambi itutuameze.
5 Handaga athu ana tumagela nzala jia mila yawo, ana gusha matangi’awo mu ndaga jia muila. Uvi athu ana tumagela nyuma, ana gusha matangi’awo mu ndaga jia nyuma.
6 Gusha matangi mu ndaga jia muila, guana gubata gu gufua. Uvi gusha matangi mu ndaga jia nyuma, guana gubata monyo nu guhuima;
7 gusha matangi mu ndaga jia muila mbagutubuisa mbalagaji jia Nzambi, handaga muila wanago gutumagela mukhuala wa Nzambi nu wajiyilego nji guwutumagela.
8 Athu ana tumagela nzala jia mila yawo, ajiyilego gusuanguluisa Nzambi.
9 Aphangi, enue muanago gutumagela nzala jia mila yenu, uvi muana tumagela nyuma ya Nzambi. Gula nyuma ya Nzambi idi diago mukatshi dienu, idi mumonesa egi muana guyitumagela. Uvi gula muthu gashigo nu nyuma ya Klisto, muene gashigo muthu wa Klisto.
10 Gula mudi nu gudivua guabonga nu Klisto, nyuma ya Nzambi idi gumihana monyo handaga mudi athu abonga gu meso enji, ikhale mila yenu idi ya gufua* mukunda nu gubola.
11 Gula nyuma ya Nzambi wafuzumuine Yesu gu gufua idi mukatshi dienu, Nzambi muene wafuzumuine Klisto Yesu gu gufua mbawuhana nji mila yenu ya gufua monyo mu njila ya nyuma yenji idi mukatshi dienu.
12 Hene aphangi, tushigo naye gutumagela nzala jia mila yetu ya gubola;
13 handaga gula muatumagela nzala jia mila yenu mbamufua. Uvi gula muabemba egi ngolo jia nyuma ya Nzambi jimikuatese ha gushiya nzala jia mila yenu, mbamukhala nu monyo.
14 Handaga athu agasue adi mutuamezewa gudi nyuma ya Nzambi, adi diago ana a Nzambi.
15 Muahetelego nyuma idi gumibuisa ahiga nga gumivuisa luko woma; uvi muahetele nyuma idi gumibuisa an’a Nzambi. Mu njila ya nyuma yene, tudi muzuela mu dijui diakola egi: “Abba,* Tata!”
16 Nyuma ya Nzambi idi muzuela hamoshi nu nyuma yetu* egi tudi ana a Nzambi.
17 Gula tudi ana a Nzambi, tudi nji ahinganyi. Yadiago tudi ahinganyi a Nzambi, uvi mbatuhinyina hamoshi nu Klisto. Uvi tudi naye thomo gumona malamba hamoshi nu Klisto, hagula tutumbuishiwe n’enji hamoshi.
18 Ngudi mumona egi tuajiyilego gufuanesa malamba agasue tudi mumona mangino nu gubonga mbatuheta. Nzambi mbawumonesa gubonga guene;
19 handaga ima yagasue yafugile Nzambi idi munengena gumonega gua ana a Nzambi nu mitshima zaga-zaga.
20 Handaga ima yafugiwe, Nzambi wayibuishile yagithuhu mu gutshigina guenji, uvi ishigo mu gutshigina guayo hakhayo. Tangua diayibuishile muene ya githuhu, watuhuile felela egi
21 ima yafugile muene mbayikatudiwa nji mu uhiga wa muila udi mufua nu mbayikudiwa mu uhiga nu lutumbu luagasue gifua luholo ana a Nzambi mbakudiwa mu uhiga.
22 Handaga tudi mujiya egi uu nu mangino ima yagasue yafugile Nzambi idi mudila hamoshi, idi mumona nji lamba hamoshi.
23 Ishigo phamba yene; uvi esue nji tuahetele gitshinyi gia thomo gia gishimbigo, yakotelesa egi nyuma ya Nzambi. Tudi mudila hatudi munenga egi Nzambi atubuise an’enji. Nzambi udi nu ngolo jia guyikalagala handaga Klisto wahanele gibawu ha guhuluisa muila wetu wa gubola.
24 Tuahetele felela edi tangua tuahuluishiwe. Uvi felela dinyi didi mumonega, dishigo luko felela handaga gula muthu wamona gima giakhalele muene gudifelela, wajiya gudifelela luko gima giene ba?
25 Uvi gula tuadifelela mu ima tushigo mumona, tuana gulandula guyinengena nu mutshima zaga-zaga nu gukolesela guagasue.
26 Luholo lumoshi nji, nyuma ya Nzambi yana gutukuatesa tangua tuana khala aguleba; handaga matangua ako tuanago gujiya ndaga tuajiya gutoga mu gisambu. Uvi mu tangua diene tudi mudila nu tushigo nu luholo lua guzuela, nyuma ya Nzambi yana guzuela ha fundo dietu.
27 Uvi Nzambi wana gutala mitshima ya athu, udi mujiya ndaga jidi muzuela nyuma handaga nyuma yene yana gutoga mu gudivua nu gutshigina guenji mukunda nu athu a gijila.
28 Tudi mujiya egi Nzambi wana kalagala hagula midimo yenji yagasue itshite hamoshi mukunda nu gubonga gua athu ana gumuzumba, athu anyi atamegele muene mu gudivua nu felela dienji.
29 Handaga sendese gu gisendeselo, wajiyile athu anyi mbaatomba muene. Wadiangele nji guzuela egi ene mbaakhala mu gifuanesa gia Mun’enji. Ngenyi mun’enji mbawukhala mona wa somi wa aphangi avula.
30 Luko athu adiangele muene gutomba, waatamegene nji. Athu anyi atamegene muene, waabuishile nji athu abonga gu meso enji. Gu gisugishilo, athu anyi abuishile abonga gu meso enji, waatumbuishile nji.
31 Itshi tuajiya guzuela giwa mukunda nu ndaga eji? Gula Nzambi udi nu esue, nanyi mbawutuluisa?
32 Nzambi gatunyilego egi Mun’enji mumoshi ha mumoshi amone lamba, uvi wamuhanele mukunda nu mukut’etu agasue. Muene mbagashigo gutuhana nji ima iko yagasue nu mutshima umoshi ba?
33 Nanyi mbawufunda athu atombewe gudi Nzambi? Gushigo nga muthu, handaga Nzambi hakhenji muene wana guamona egi adi athu abonga gu meso enji.
34 Nanyi mbawafuisa milonga? Gushigo nga muthu, handaga Klisto Yesu wafuile mukunda nu ene. Nzambi wamufuzumuine. Henyaha udi gu koko dia madia* dia Nzambi, udi gutuzuelela.
35 Itshi mbayitukhaphumuna mu guzumba gudi nago Klisto mukunda nu esue? Malamba nga gikenene, nga usageshi, nga nzala, nga uphutu,* nga ndaga jidi mukuatesa woma, nga phogo ya khusa ba?
36 Idi gifua luholo yasonegewe egi: “Athu adi gutushiya tangua diagasue handaga tudi akombeledi aye. Athu adi gutumona gifua imeme idi mutshigina gushiyiwa.”
37 Uvi tuana gubinga ndaga eji jiagasue, handaga muthu yonu watuzumbile wana gutukuatesa.
38 Ngudi nu gutshigina egi ikhale gufua nga monyo, nga anjelo, nga ba guvernema, nga ima idi guene mangino, nga ima mbayiza, nga ahinyinyi,
39 nga ima idi gosa, nga ima idi goshi’a mavu, nga gima giko gitshi giafugiwe, yajiyilego gutukhaphumuna mu guzumba guatumonesele Nzambi mu njila ya Fumi’etu Klisto Yesu.
Mbimbi goshi'a diyiji
^ Mu Greke: “muila wa gubola.”
^ Nga “yagufuishiwa milonga.”
^ Mu zuelelo dia Hebelu nga dia araméen yakotelesa egi “O Tata!”
^ Nga “idi gututshiginyisa.”
^ Nga “koko dia utata.”
^ Mu Greke: “thowa.”
