Gudi enya Roma 9:1-33
-
Phaula wavua gikenene mukunda nu enya Isalele (1-5)
-
Ajigulu a Abalahama a giamatshidia (6-13)
-
Gula Nzambi watomba ha gutshita gima, tuajiyilego gugituna (14-26)
-
Athu anyi Nzambi wavidile khabu, nu athu anyi avidile muene khenda (22, 23)
-
-
Phamba athu anyi asala mbaahuluishiwa (27-29)
-
Enya Isalele akhakhugile (30-33)
9 Luholo ngudi mulandudi wa Klisto, ngudi muzuela giamatshidia. Ngushigo mumba mambo, handaga mutshima wami udi mutuamezewa gudi nyuma ya Nzambi udi mumonesa egi
2 ngudi nu gikenene nu lamba diavula mu mutshima wami.
3 Gula nga luholo luakhalele guene, nga ngadikhaphele nu Klisto gifua muthu watewe mukumbu ha gukuatesa aphangi’ami, nu enya giphuta giami,
4 enya Isalele. Nzambi waatombele ha gukhala an’enji, waahanele lutumbu, wakotele n’awo gikotelo, waahanele Mikhuala, waahanele luendu lua gutshita mudimo wa gijila, waalayile nji ndaga jiko jiavula.
5 Ene adi ajigulu a akhakh’etu. Klisto nji wavalewe mu giphuta giawo.* Nzambi udi holu dia ima yagasue, atumbuishiwe ivo nu ivo. Amen.
6 Uvi na yakotelesa egi mbimbi ya Nzambi yabingilego ba? Ndo sha. Handaga athu agasue avalewe gudi enya Isalele, ashigo diago “enya Isalele.”
7 Ajigulu* agasue a Abalahama ashigo diago an’enji, handaga Nzambi wawambelele Abalahama egi, “Isaka mbawuvuala ajigulu* aye.”
8 Idi mukotelesa egi ana avalele* Abalahama ashigo diago ana a Nzambi, uvi ana avalewe mu laji dia Nzambi ene adi ajigulu* a giamatshidia.
9 Handaga Nzambi wamulayile egi: “Mbanguza luko gumbo diaye mu sungi eyi. Sara mbawuvuala mona yala.”
10 Yakhalele nji luholo lumoshi tangua diavualele Rebeka ana maphasa nu yala mumoshi, khakh’etu Isaka.
11 Tangua diakhalele ana ene khenji avalewa galego nu khenji atshita galego nga ndaga imoshi yabonga nga yabola, Nzambi wadiangele guzuela gutuama nanyi mbaatomba. Handaga Nzambi watombele muthu atshiginyile muene, uvi amutombelego mukunda nu midimo yenji.
12 Hene wawambelele Rebeka egi: “Mona wa somi mbawukhala muhiga wa galenge genji.”
13 Idi gifua luholo mukanda wa Nzambi udi muzuela egi: “Ngazumbile Yakoba, uvi Esau ngamutunyine.”
14 Gula idi ngenyi, na tuzuela itshi? Tuzuela egi Nzambi udi nu khadilo dia gutomba-tomba ba? Ndo sha!
15 Handaga wawambelele Moize egi: “Mbanguzumba muthu ngatshigina guzumba, mbanguvua khenda gudi muthu ngatshigina guvuila khenda.”
16 Ndaga yene ishigo gutshigina gua muthu nga ngolo jienji,* uvi idi khenda jia Nzambi.
17 Handaga mukanda wa Nzambi udi muwambela Farao egi: “Ngagubembele nu monyo ha gumonesa ngolo jiami mu njila yaye hagula egi jina diami ditumbuishiwe ha mavu agasue.”
18 Nzambi wana guvua khenda gudi muthu atshigina muene guvuila khenda. Uvi gula muthu wakolesa mutshima wenji, Nzambi wana gumubemba egi akolese mutshima.
19 Athu ako ajiya gunguhula egi: “Mukunda natshi Nzambi wana zuela egi tudi athu abola? Nanyi wajiya guluisa gutshigina guenji?”
20 Uvi aye muthu udi nanyi ha guwambela Nzambi mbimbi jiabola? Nzungu ya wuma yajiya guwambela mubumbi wayo egi: “Mukunda natshi wangulondele luholo elu?”
21 Mubumbi wa wuma gashigo nu ngolo jia gubumba wuma umoshi, akalagala nzungu jiyadi, iko mukunda nu mudimo wa lutumbu, uvi iko mukunda nu mudimo wa githuhu ba?
22 Idi nji luholo lumoshi nu Nzambi; watshiginyile gumonesa khabu jienji gudi athu abola nu gujiyisa ngolo jienji. Uvi wamonesele guhuiminyina guavula mukunda nu athu adi gifua nzungu jia wuma, jiakhalele naye muene guvuila khabu handaga jidi jiatagana ha gushiyiwa.
23 Watshitshile ngenyi ha gumonesa gukoma gua lutumbu luenji gudi athu adi gifua nzungu jia wuma, jiavuidile muene khenda. Wadiangele gualonda hagula a ahane lutumbu.
24 Watutamegele nu esue nji, gatamegenego phamba enya Yuda, uvi watamegene nji athu a ifutshi iko.
25 Idi gifua luholo luazuelele muene mu mukanda wa Hoshea egi: “Athu anyi akhalelego athu ami, mbanguatamega egi ‘athu ami.’ Mukhetu ngakhalelego muzumba, mbangumutamega egi ‘mukhetu ngana guzumba muavula.’
26 Ha fundo diakhalele athu guawambela egi ‘mushigo athu ami,’ mbatamegewa guene egi ‘ana a Nzambi wa monyo.’”
27 Luko, Yeshaya wazuelele mu dijui diakola mukunda nu Isalele egi: “Enya Isalele adi avula gifua gishegele mu khulo ya kianga. Uvi athu anyi mbaasala, ene phamba mbahuluishiwa.
28 Handaga Yehowa mbawusophesa athu a ha mavu; mbawuyikalagala mu phushi.”*
29 Idi gifua luholo luadiangele guzuela Yeshaya egi: “Nga Yehowa Nzambi wa ngolo jiagasue gatubembelego ajigulu,* nga tuabuile gale gifua enya Sodoma nu enya Gomola.”
30 Itshi tuajiya guzuela giwa? Egi athu a ifutshi iko akhalelego mutshita ndaga jiabonga. Uvi tangua ashile gutshigina, abuile athu abonga gu meso a Nzambi.
31 Enya Isalele akalegele ngolo ha gutshita ndaga jiabonga gifua luholo luakhalele muzuela mukhuala. Uvi abingilego ha gunemesa mukhuala wene.
32 Mukunda natshi? Handaga atangijile egi mbabua athu abonga gu meso a Nzambi mukunda nu midimo yawo, uvi mu gusha gutshigina ndo. Adikumine gu “seso diana khakhuisa.”
33 Idi gifua luholo mukanda wa Nzambi udi muzuela egi: “Talenu, ngudi muhaga seso mu Siona dinyi mbadikhakhuisa athu. Seso diene mbadibuisa athu. Uvi muthu udi musha gutshigina gudi muene, mbagashigo muvishiwa musonyi.”
Mbimbi goshi'a diyiji
^ Mu Greke: “nu muila gifua muthu.”
^ Mu Greke: “vungu.”
^ Mu Greke: “vungu.”
^ Mu Greke: “ana a mu muila.”
^ Mu Greke: “vungu.”
^ Mu Greke: “ishigo mukunda nu felela dia muthu nga mukunda nu phushi jienji.”
^ Nga “mbawashiya mu phushi.”
^ Mu Greke: “vungu.”
