Gudi Tito 1:1-16
1 Ame Phaula muhiga wa Nzambi, mupostolo wa Yesu Klisto. Gutshigina guami nu mudimo wami wa mupostolo udi gudivua nu gutshigina gua athu anyi Nzambi watombele nu malongo a giamatshidia adi mumonesa luholo lua gusala yagujinginyina gudi Nzambi.
2 Ndaga eji jiagasue jidi gudivua nu felela dia monyo wa ivo nu ivo walayele Nzambi munu gajiyilego gumba mambo sendese mualeha.
3 Uvi hataganele tangua diatombele muene, wajiyishile mbimbi yenji mu njila ya lukuma luabonga luanguhanele muene ha gutadila mukhuala wa Muhuluishi wetu Nzambi.
4 Ngudi musonegela Tito, mun’ami diago tuana khala n’enji gutshigina gumoshi:
Nzambi Tata wetu nu Muhuluishi wetu Klisto Yesu aguvile khenda jiavula, agukuatese nji ha gukhala mu guhuima.
5 Ngagubembele gu Krete hagula ulondege ndaga jishigo muyila muabonga nu utombe akulu mu dimbo nu dimbo, gifua luholo ngaguwambelele:
6 Mukulu* gashigo naye gufundiwa mu ndaga jiabola, udi naye gukhala nu mukhetu phamba mumoshi, an’enji adi naye gukhala Aklisto, ashigo naye gufundiwa mu ndaga jia musonyi,* adi naye gukhala ana atumaga.
7 Luholo mukulu udi muenya mudimo wa Nzambi, gashigo naye gufundiwa nga mu ndaga imoshi yabola, gashigo naye gukhala muenya muto wakola, gashigo naye gukhala muthu wana vua khabu muphushi, gashigo naye gukhala muthu wana nua matombe avula, gashigo naye gukhala muenya khuta,* gashigo naye gukhala nu nzala ya guheta ima mu luholo luabola.
8 Uvi udi naye gukhala muthu wana yamba athu, muthu wana zumba ndaga jiabonga, muthu wana tangiza muabonga, muthu wana kalagala ndaga jiabonga, muthu wagujinginyina gudi Nzambi, muthu wana gudikanda,
9 udi naye gujinginyina gu mbimbi ya giamatshidia* mu luholo luenji lua gulongesa, hagula akhale watagana ha guhana athu gikhesa mu malongo enji abonga nu ha gubalela athu adi muhaga iphapha.
10 Handaga athu avula adi mulumbuga, adi enya izuele-zuele, adi enya mambo. Avula mukatshi diawo ana gudihana muavula mu ndaga yatadila gumbiwa gu mukanda.
11 Adi naye guhenesewa tedie, handaga adi mubolesa gutshigina gua fami jiagasue, adi gualongesa malongo ashigo naye gulongesa ha guheta ikumba mu luholo luabola.
12 Profete mumoshi wa gumbo diawo wazuelele egi: “Enya Krete ana khala tangua diagasue enya mambo, shitu jiabala jia mu foto, imonya, mudimo wawo phamba gudia.”
13 Ndaga eyi idi ya giamatshidia. Gishina giene, landula guabalela mangololo hagula akhale nu gutshigina guakola.
14 Ulandulago ishima ya githugu ya enya Yuda nu mikhuala ya athu ashigo mutshigina giamatshidia.
15 Ndaga jiagasue jiana khala jia phelegeta mukunda nu athu aphelegeta. Uvi athu a usala nu anyi ashigo nu gutshigina, gushigo nga ndaga imoshi yaphelegeta handaga matangi awo nu mitshima yawo yana khala ya usala.
16 Ana zuela ha meso a athu agasue egi ajiya Nzambi, uvi ana gumutuna mu makalegelo awo handaga adi diago athu abalega gubola, anago gutumaga nu ashigo atagana ha gukalagala nga ndaga imoshi yabonga.
Mbimbi goshi'a diyiji
^ Mu Greke: “Gula gudi nu yala.”
^ Nga “makalegelo abola.”
^ Nga “muthu wana beta athu.”
^ Nga “lukuma luatagana.”
