Gudi Tito 2:1-15
2 Uvi aye, landula guzuela ndaga jidi gudivua nu malongo abonga.
2 Makota a mala akhale gudikanda mu ndaga jiagasue, akhale athu a gushila mutshima, akhale mutangiza muabonga, akhale nu gutshigina guakola, akhale muzumba athu ako, akolesele nji mu malamba.
3 Luholo lumoshi nji, akhetu a gukola akhale nu makalegelo adi munemesa Nzambi, akhadigo enya mambo, akhadigo ahiga a matombe, akhale mulongesa ndaga jiabonga
4 hagula ahane malongo gudi mavuala a akhetu ha guzumba alumi’awo nu an’awo,
5 ha gukhala nu matangi abonga nu mitshima yaphelegeta, ha gukalagala midimo gu jinzo jiawo, ha gukhala nu makalegelo abonga, ha gutumagela alumi’awo hagula athu azuedigo ndaga jiabola mukunda nu mbimbi ya Nzambi.
6 Luholo lumoshi nji, kolesa mavuala a mala ha gukhala nu matangi abonga.
7 Aye khala gifezegeselo mu ndaga jiabonga jia maluholo agasue. Longesa ndaga jia giamatshidia nu mutshima umoshi.
8 Kalegela mbimbi jiabonga jinyi athu ajiyilego gusegulula, hagula mbalagaji jivue musonyi, amonyigo nga ndaga imoshi yabola* ya guzuela mukunda nu esue.
9 Ahiga akhale mutumagela mafumu awo mu ndaga jiagasue, atshite yagasue ha guasuanguluisa. Akhadigo muta nawo itotshi,
10 akhadigo guakuya, uvi adimonese egi adi diago athu a guhagela mutshima, hagula malongo a Nzambi, Muhuluishi wetu atumbuishiwe mu maluholo agasue.
11 Handaga Nzambi wamonesele khenda jienji jiavula ha guhuluisa athu a maluholo agasue.
12 Khenda jiene jiana gututuma ha gutuna makalegelo ashigo munemesa Nzambi, nu ha gutuna nzala jia ha mavu, nu ha gukhala nu matangi abonga, nu ha gukalagala ndaga jiabonga, nu ha gukhala yagujinginyina gudi Nzambi ha mavu awa,*
13 hatudi munengena felela dia gusuanguluga nu gumonega gua Nzambi wakoma nu gua Muhuluishi wetu Yesu Klisto,
14 wadihanele mukunda nu esue* ha gutukatula mu uhiga wa gukalagala ndaga jiagasue jidi mushiya mukhuala, nu waphelegetesele athu enji diago, adi mukalagala midimo yabonga nu gikhesa giagasue.
15 Landula gulongesa ndaga eji nu guhana athu gikhesa ha gujikalegela nu guabela handaga udi nu ufumu wa gukalagala ndaga eji. Ubembigo egi nga muthu mumoshi agusegulule.
Mbimbi goshi'a diyiji
^ Nga “ndaga ya githuhu.”
^ Nga “gindongo egi.” Tala Ukoteleshi wa Mbimbi.
^ Mu Greke: “watuhuluishile mu njila ya gibawu; watusumbile.”
