Gudi Tito 3:1-15
3 Landula guawunguluisa* ha gunemesa nu ha gutumagela baguvernema nu ahinyinyi nu ha gukhala hehi mukunda nu mudimo wagasue wabonga,
2 akhadigo mushinga nga muthu mumoshi, akhadigo enya nguma, akhadigo nji enya ndaga jiakola, uvi akhale atuluga gudi athu agasue.
3 Handaga ha thomo esue nji tuakhalele athu aheya, tuakhalelego mutumaga, tuakhalele mu gujimbila, tuakhalele ahiga a nzala jia maluholo agasue nu a ndaga jiana suanguluisa, tuakhalele mukalagala ndaga jiabola, tuakhalele muvila athu giphi, tuakhalele athu abola diago, tuakhalelego nji gudizumba.
4 Uvi Nzambi Muhuluishi wetu wazumbile athu nu waamonesele mutshima wabonga
5 (gatshitshilego ngenyi mukunda nu midimo yabonga tuakalegele, uvi yakhalele mukunda nu khenda jienji), watuhuluishile mu njila ya meya* atubatediele monyo, watuhuluishile nji tangua diatubuishile muene athu ahe-ahe mu njila ya nyuma yenji.
6 Watuhanele nyuma yene yavula mu njila ya Muhuluishi wetu Yesu Klisto.
7 Khenda jienji jiavula jiamutumile ha gutumona gifua athu abonga, hagula tuajiya guheta monyo wa mayilago watulayele muene.
8 Mbimbi eji jidi jiatagana ha gujishila mutshima. Ngumutshigina egi ulandule gujizuelela, hagula athu adi musha gutshigina gudi Nzambi ahage matangi awo ha gukalagala midimo yabonga. Ndaga eji jidi jiabonga nu jidi nu ndando mukunda nu athu.
9 Uvi tuna iphapha ya githugu nu senga jia akhakha, gumana nu nguma jiana zola athu mukunda nu Mukhuala handaga jidi ndaga jia githugu nu jia phamba.
10 Gila muthu udi mubata malongo a mambo, udi naye gumubela. Uvi gila wamubela* hugo dia thomo nu hugo dia mbadi muene guvua ndo, udi naye gumutuna.
11 Jiya egi muthu wa luholo elu wajimbidile gale njila, udi mutshita gubola nu udi gudifuisa milonga muene hakhenji.
12 Gula ngatuma Artemase nu Tishike gudi aye, tshita yagasue ha guza gungusanga gu Nikopolise, handaga guene mbangubalegesa sungi ya guhuma.
13 Kuatesa Zena yonu wana jiya Mukhuala muabonga nu Apholo hagula akhale nu ima yagasue adi naye funu tangua adi muza mu njila.
14 Uvi aphangi’etu alandule gukalagala midimo yabonga ha gukuatesa athu adi nu funu ya ukuateshi, hagula akhadigo enya mudimo anyi ashigo muzola mbuto.
15 Athu agasue tudi nawo agutumila lumene. Hana nji moyo gudi aphangi’etu a Aklisto ana gutuzumba muavula.
Khenda jiavula jia Nzambi jikhale nu enue mukut’enu agasue.
