Mukanda wa Yakoba 1:1-27
1 Ame Yakoba muhiga wa Nzambi nu wa Fumu Yesu Klisto, ngudi musonegela iphuta 12 idi mu mafundo agudisha:
Moyo wenu!
2 Aphangi, khalenu nu gusuanguluga guavula tangua mudi mutagana nu malamba a luholo nu luholo.
3 Handaga mudi mujiya egi tangua gutshigina guenu guana lolewa, muana heta ngolo jia gukolesela.
4 Uvi bembenu egi gukolesela gumanesele mudimo wenji, hagula mukhale muatagana nu mukhadigo nu gubola mu ndaga jiagasue nu hagula mumonyigo lamba nga dia gima gimoshi.
5 Gula muthu gashigo nu ndunge, alandule gujilomba gudi Nzambi, muene mbawumuhana najio handaga wana hana athu agasue ima ana gumutoga, uvi ganago guabalela.*
6 Uvi alandule gujitoga nu gutshigina guagasue, gakhadigo nu giphapha, handaga muthu udi nu giphapha udi gifua matshipha-tshipha a muta anyi muhehe udi mutuala khanda nu khanda.
7 Muthu wa luholo elu gadifelelago egi wajiya guheta nga gima gimoshi gudi Yehowa.
8 Handaga muthu muene gana zulago desizio, wana wungagana mu ndaga jiagasue jiana tshita muene.
9 Phangi udi phutu akhale nu gusuanguluga* luholo amukanduisa.
10 Muenya umonyi asuanguluge luholo amubulumuisa, muene mbawufua gifua giyaji gia mu temu.
11 Handaga tangua diana zoga nu muanya wabala, nu wana miginyisa mitshi. Yaji ya mitshi yene yana bua, gubonga guenji guana hua. Luholo lumoshi nji, muenya umonyi mbawufua mukatshi dia midimo yenji.
12 Gusuanguluga gudi nu muthu udi mulandula gukolesela mu malamba, handaga Nzambi mbawumutshigina. Muene mbawuheta monyo gifua gishimbigo Yehowa walayele athu ana landula gumuzumba.
13 Gula muthu watagana nu malamba, gazuedigo egi: “Nzambi udi gungulola.” Handaga Nzambi gana lolewago gu ndaga jiabola. Muene nji gana lola ndo nga muthu mumoshi.
14 Uvi muthu wagasue wana lolewa gula wabemba egi nzala yenji imunane nu imutuameze.*
15 Gula nzala yene yakola,* yana vuala gubola. Gungima gula gubola guakalegewa, guana vuala gufua.
16 Aphangi’ami ngana zumba muavula mudihuigigo.
17 Khapho diagasue diabonga nu gima giagasue giatagana yana katuga mu dilu. Yana katuga gudi Tata wa muanya wa mu dilu. Muene ganasombegesa ndo gifua muana sombegesa ivule-vule.
18 Gutshigina guenji guakhalele egi tuvualewe mu mbimbi ya giamatshidia, hagula tubue mbuto jia thomo jia ima yafugile muene.
19 Aphangi’ami ngana zumba muavula, jiyenu egi: Muthu wagasue udi naye gukhala hehi ha gutegelela, gashigo naye guzuela muphushi, gashigo naye nji guvua khabu muphushi.
20 Handaga gula muthu wavua khabu, muene gana tshitago ndaga jiabonga gu meso a Nzambi.
21 Katulenu ndaga jiagasue jia usala nu ndaga jiagasue jiabola.* Tshiginenu mbimbi idi mukuna Nzambi mu mitshima yenu nu gudibulumuisa guagasue, handaga yajiya gumihuluisa.*
22 Hene, khalenu mukalagala ndaga mbimbi ya Nzambi idi muzuela, uvi mukhadigo phamba athu adi mutegelela ha gudihuiga nu matangi’a mambo.
23 Handaga gula muthu udi phamba mutegelela mbimbi ya Nzambi, uvi gashigo guyikalegela, udi gifua muthu udi mutala phala yenji gu nganza.*
24 Wana guditala, gungima wanaya genji. Uvi gungima dia tangua diazonda, gana jiya luko ndo gula phala yenji idi luholo lutshi.
25 Uvi muthu udi mutala muabonga mukhuala watagana udi mukatula athu mu uhiga, nu gula udi mukolesela, mbagashigo mubua muthu wana tegelela gungima gajimbila; uvi mbawukalagala ndaga jiavi muene; mbawukhala diago nu gusuanguluga mu ndaga jidi mukalagala muene.
26 Gula muthu udi mutangiza egi udi mukombeledi wa Nzambi, uvi gashigo mukanda ludimi luenji,* udi muhuiga mutshima wenji, nu guene gukombelela guenji gudi gua githuhu.
27 Gukombelela guaphelegeta nu gushigo nu usala gu meso a Nzambi Tata wetu guenyogu: Gukuatesa ana a shiye nu akhetu a gafunda mu malamba awo nu gutuna ndaga jia ha mavu awa jiana bolesa athu.
Mbimbi goshi'a diyiji
^ Nga “gana monago gubola.”
^ Mu Greke: “adisunzule.”
^ Nga “akuatewe gu muheto nu ndulo.”
^ Mu Greke: “yazula vumo.”
^ Nga ndo yajiya gukhala egi, “nu ndaga jiavula jiabola.”
^ Nga “guhuluisa mionyo yenu.”
^ Nga “thala-thala.”
^ Nga “gashigo mujitshiga ludimi luenji.”
