Mukanda wa Yakoba 2:1-26
2 Aphangi, luholo lutshi muajiya guhaga gutshigina gudi Fumi’etu wa lutumbu Yesu Klisto, gula mudi nu lutondo mukatshi dienu?
2 Gula mudi mu gudibungisa guenu, muthu udi nu phete jia wolo gu mino yenji nu milele yabonga wangina, uvi phutu udi nu milele ya mvindu wangina nji,
3 muana hana ginemua gudi muthu udi wa gusudiga milele yabonga nu muana gumuwambela egi: “Aye khala ha fundo edi diabonga,” uvi muana wambela phutu egi: “Aye khala wa gumagana,” nga ndo, “khala ha gihagelo gia malu ami”?
4 Gula idi ngenyi, ishigo mumonesa egi mudi nu ukhaphumunyi mukatshi dienu nu mudi manzuji adi musophesa mu luholo luabola ba?
5 Aphangi’ami ngana zumba muavula, tegelelenu: Ishigo Nzambi watombele athu anyi enya ha mavu ana mona egi adi phutu, ha gubua enya umonyi mu gutshigina nu ha guheta Ufumu unu watendelele muene athu ana gumuzumba ba?
6 Uvi enue mudi musegulula phutu. Ishigo enya umonyi ana gumisagesa nu ana gumibata gu tribinale ba?
7 Ishigo ene ana shinga jina diabonga diamihanewe ba?
8 Gula mudi mutumagela muabonga mukhuala wa ufumu udi muzuela mu mbimbi ya Nzambi egi: “Zumba muthu na muku’enu gifua luholo wana zumba muila waye,” ngenyi mudi mutshita diago muabonga.
9 Uvi gula mudi mulandula gukhala nu lutondo, mudi mutshita gubola, mukhuala udi mumonesa nji haphelo egi mudi ashiyi a mikhuala.
10 Gula muthu watumagela Mukhuala wagasue, uvi nu gutumagela ndo ndaga imoshi mukhuala wana toga, muene washiya mukhuala wagasue.
11 Handaga muthu wazuelele egi: “Ukalagalago uthambi,” muene wazuelele nji egi: “Ushiyigo muthu.” Gula watshitshilego uthambi uvi washiya muthu, na wabua muthu wana shiya mukhuala.
12 Landulenu guzuela nu gudituameza gifua athu anyi mbaasophesewa gu mukhuala wa athu ashigo mu uhiga.*
13 Handaga muthu munu gashigo muvila athu ako khenda, mbaashigo gumuvila khenda tangua mbaamusophesa. Uvi muthu wana vila athu ako khenda, mbawubinga tangua mbaamusophesa.
14 Aphangi, gubonga gutshi muthu wajiya guheta gula udi muzuela egi udi nu gutshigina, uvi gashigo mumonesa gutshigina guene mu midimo? Gutshigina gua luholo elu guajiya gumuhuluisa ba?
15 Gula phangi mumoshi wa yala nga wa mukhetu gashigo nu milele* nu gashigo nu ima ya gudia,
16 uvi muthu mumoshi mukatshi dienu wamuwambela egi: “Nda mu guhuima; weta tshuya, dia muabonga,” uvi enue nu gumuhana ndo ima idi nayo muene funu mukunda nu muila wenji, gutshita ngenyi gudi ndaga yabonga ba?
17 Luholo lumoshi, gutshigina guene hakhenji, gula gushigo nu midimo, gudi gua gufua.
18 Uvi muthu mumoshi wajiya guzuela egi: “Aye udi nu gutshigina, uvi ame ngudi nu midimo. Ngumonese gutshigina guaye gushigo nu mudimo, ame mbangugumonesa gutshigina guami mu midimo yami.”
19 Aye wana tshigina egi Nzambi udi mumoshi ba? Idi ndaga yabonga. Uvi bademo nji ana tshigina nu ana digita.
20 Oo aye muthu waheya, udi mukamba ijiyishilo ha gujiya egi gutshigina gushigo nu midimo gushigo nu ndando?
21 Mukunda natshi Nzambi wamonele egi tata wetu Abalahama wakhalele muthu wabonga? Yakhalele mukunda nu makalegelo enji tangua diahanele muene mun’enji Isaka holu dia giwotshielo.
22 Aye udi mumona muabonga egi gutshigina guenji guakhalele muwenda hamoshi nu midimo yenji nu gutshigina guenji guabuishiwe guatagana mu midimo yenji.
23 Ndaga eyi yazuelele mukanda wa Nzambi yatagenesewe: “Abalahama washile gutshigina gudi Yehowa, hene watangewe egi udi muthu wabonga.” Watamegewe nji egi futa dia Yehowa.
24 Mudi mumona muabonga egi muthu wana monewa egi udi muthu wabonga mu njila ya midimo, uvi ishigo phamba mu njila ya gutshigina.
25 Luholo lumoshi nji, Lahaba mukhetu wa thambi, wamonewe egi udi muthu wabonga mu midimo yenji, hayambele muene athu atumiwe nu gisemo giagasue nu haazolele muene ha guya mu njila iko.
26 Gifua luholo muila ushigo nu nyuma* udi wa gufua, gutshigina gushigo nu midimo gudi nji gua gufua.
Mbimbi goshi'a diyiji
^ Mu Greke: “mukhuala wa gukatudiwa mu uhiga.”
^ Mu Greke: “udi thowa.”
^ Nga “muhehe.”
