Mukanda wa Yakoba 3:1-18
3 Aphangi, athu avula mukatshi dienu abuigo alongeshi, handaga mudi mujiya egi mbatusophesewa mangololo diago.
2 Handaga matangua avula mukut’etu agasue tuana jimbila.* Gula muthu gashigo mujimbila mu mbimbi, udi muthu watagana, wajiya gukanda muila wenji wagasue.
3 Gula tuana jitshiga ngonji gu makano a phunda hagula jitutumagele, tuana tuameza nji muila wajio wagasue.
4 Talenu nji masuwa: Ikhale ana khala akoma nu ana tuamezewa gu funji yakola, uvi muthu wana kalegela khayi yazonda ha guatuameza fundo diagasue dimutshigina muene guya.
5 Luholo lumoshi nji, ludimi ludi gitshinyi giazonda mu muila, uvi luana gudisunzula muavula. Tshuya tuazonda tuana konda gishitu giakoma!
6 Ludimi ludi nji gifua tshuya. Mukatshi dia itshinyi yagasue ya muila, ludimi luana khala lua guzala nu ndaga jiagasue jiabola. Luana buisa muila wagasue usala, luajiya gubolesa monyo wagasue wa muthu nu luana lema tshuya tuana katuga gu Gehena.*
7 Handaga muthu wajiya gukuata nu gutuameza shitu jia mu foto jia maluholo agasue nu tunjila nu shitu jiana wenda vumo mu mavu nu shitu jia mu mita. Gudi nu athu atshitshile gale ngenyi.
8 Uvi gushigo nga muthu mumoshi wajiya gutuameza ludimi luenji; handaga ludimi luana khala luabola, luajiyilego gukandewa. Luana khala lua guzala pha nu puazo yana shiya athu.
9 Ludimi luene tuana tumbuishila Yehowa Tata wetu, uvi luene nji tuana tela athu afugiwe “mu gifuanesa gia Nzambi” mikumbu.
10 Mu kano diene dimoshi, muene muana zoga ndaga jiabonga nu mikumbu.
Aphangi, ndaga jishigo naye gukalegewa mu luholo elu.
11 Gito gimoshi gianago guzola meya atuluga* nu meya alula.
12 Aphangi, mutshi wa figi wajiyilego guhaga mabundu a olive. Mutshi wa vinyo wajiyilego guhaga mabundu a figi. Meya a mungua ajiyilego nji guzola meya atuluga.
13 Nanyi udi nu gutema nu ndunge mukatshi dienu? Ajimonese mu makalegelo enji abonga nu mu midimo idi mutshita muene nu gutuluga guana katuga mu gutema.
14 Uvi gula mudi nu giphi giabala nu gumana* mu mitshima yenu, mudisunzulago nu mumbilago giamatshidia mambo.
15 Jinyinyi jishigo ndunge jiana katuga mu dilu, uvi jidi ndunge jia ha mavu, jia shitu nu jia bademo.
16 Handaga fundo didi giphi nu gumana,* diana khala nji mu lumuamua nu ndaga jiagasue jiabola.
17 Uvi ndunge jia mu dilu jiana khala thomo jiaphelegeta, gungima jiana khala nu guhuima, jiana khalago nu ndaga jiakola-kola, jiana khala hehi ha gutumaga, jiana khala jia guzala pha nu khenda nu mabundu abonga, jiana tomba-tomba ndo, jiana khalago nu mambo.
18 Bundu dia ndaga jiabonga diana kunyiwa mu guhuima mukunda nu* athu ana kamba guhuima.
Mbimbi goshi'a diyiji
^ Nga “gutshita gubola.”
^ Tala Ukoteleshi wa Mbimbi.
^ Mu Greke: “abonga.”
^ Nga ndo yajiya gukhala egi, “gukamba gubonga guene hakhenu.”
^ Nga ndo yajiya gukhala egi, “gukamba gubonga guaye hakhaye.”
^ Nga ndo yajiya gukhala egi, “gudi.”
