Mukanda wa Yakoba 5:1-20
5 Tegelelenu, enue enya umonyi. Dilenu, khalenu nu gikenene mukunda nu malamba adi naye gumibuila.
2 Umonyi wenu wafukha, sualala jiadia milele yenu.
3 Wolo wenu nu utadi wa siliva mbawukuata ukelengenye. Ukelengenye wene mbawumifisa milonga nu mbawudia muila wenu. Ima yagasue muabungishile mbayikhala gifua tshuya mu masugu a gisugishilo.
4 Talenu! Athu akatudile mbuto mu mahia enu adi mudila handaga muaahanelego lufuto luawo. Yehowa Nzambi ya masuta a mu dilu wavua gudila guawo.
5 Muakhalele mujinga ha mavu nu ima ya ndando ha gudisuanguluisa. Muakhalele mudia, muabuishile mila yenu maji-maji gifua ngombe mu lusugu lua gushiyiwa guayo.
6 Enue muafishile muthu wabonga milonga nu muamushiyile. Muene gashigo mbalagaji wenu ba?
7 Aphangi, khalenu nu guhuiminyina uu nu tangua mbadivutuga Fumu. Mudimi wa mahia wana nengena mbuto jiabonga jiana zoga mu mavu. Wana nengenena nu guhuiminyina guagasue uu nu mu sungi ya mvula ya thomo nu mu sungi ya mvula ya gisugishilo.
8 Enue nji khalenu nu guhuiminyina, kolesenu mitshima yenu, handaga guvutuga gua Fumu guasuena hehi.
9 Mukhadigo muzuela ndaga jiabola* mukunda nu athu ako hagula musophesewago. Talenu! Nzuji udi ya gumagana gutuama dia mifulo.
10 Aphangi, mu ndaga yatadila gukolesela mu malamba nu gumonesa guhuiminyina, landulenu gifezegeselo gia baprofete anyi alongesele mu jina dia Yehowa.
11 Athu anyi akolesele mu malamba adi enya gusuanguluga. Muavuile luholo Yobo wakolesele mu malamba, muamonele nji ndaga Yehowa wamukalegele gu gisugishilo. Idi mumonesa egi Yehowa wana khala nu guzumba guakola nu khenda jiavula.
12 Aphangi, bembenu gudiloga mu jina dia dilu, nga mu jina dia mavu, nga mu jina dia gima giko. Uvi mbimbi yenu “Ayi” ikhale ayi. “Ndo,” ikhale ndo hagula musophesewago.
13 Gula gudi nu muthu udi mumona malamba mukatshi dienu, muene asambe Nzambi. Gula gudi nu muthu udi nu gusuanguluga, muene ayimbe ngimbo ha gutumbuisa Nzambi.
14 Gula gudi nu muthu udi mukata mukatshi dienu, muene atamege akulu a mu hungu akombelele mukunda nu muene, amukunge maji mu jina dia Yehowa.
15 Gisambu giakalegewa nu gutshigina mbagikuatesa muthu udi mukata* ha gudivua muabonga. Yehowa mbawumusaga. Gula watshitshile gubola, Nzambi mbawumutotesela.
16 Khalenu muzuela gubola guenu mukatshi dienu, khalenu musamba nji mukunda nu athu ako. Ngenyi, muajiya gusagewa. Gisambu gia muthu wabonga giana khala nu ngolo jiavula.
17 Eliya wakhalele muthu gifua esue, uvi tangua diakombelele muene mangololo hagula mvula inogi ndo, mvula yanogele ndo mu gifutshi ivo thathu nu mbeji samano.
18 Gungima, muene wasambele luko, dilu dianogesele mvula, mavu azolele mbuto.
19 Aphangi, gula muthu mungoshi mukatshi dienu wabemba njila ya giamatshidia, uvi muthu muko wamuvutula mu njila,
20 jiyenu egi muthu wagasue wakuatesa muenya gubola ha gukatuga mu njila yabola yajimbidile muene, mbawumuhuluisa* mu gufua nu mbawutshuiga masumu avula.
Mbimbi goshi'a diyiji
^ Nga “gudinyemena.”
^ Nga ndo yajiya gukhala egi, “muthu ya guhuila.”
^ Nga “monyo wenji.”
