Mukanda wa Yone 1:1-51
1 Gu gisendeselo Mbimbi yakhalele, Mbimbi yene yakhalele nu Nzambi, Mbimbi yene yakhalele nji nzambi.
2 Muene wakhalele nu Nzambi gu gisendeselo.
3 Ima yagasue yafugiwe mu njila yenji, gushigo nga gima gimoshi giafugiwego mu njila yenji.
Ima yafugiwe
4 mu njila yenji yakhalele monyo; monyo wakhalele muanya mukunda nu athu.
5 Muanya udi mulema mu phipha, uvi phipha ishigo guwubalegela.
6 Guajile muthu mumoshi watumiwe gifua mumoneshi wa Nzambi; jina dienji Yone.
7 Muthu muene wajile ha gulongesa athu mukunda nu muanya, hagula athu a maluholo agasue ashe gutshigina mu njila yenji.
8 Muene gakhalelego muanya wene, uvi wakhalele mulongesa mukunda nu muanya wene.
9 Muanya wa giamatshidia unu udi mulemela athu a maluholo agasue wakhalele naye guza ha mavu.
10 Muene wakhalele ha mavu, mavu afugiwe nji mu njila yenji, uvi mavu ene amujiyilego.
11 Muene wajile gumbo diawo, uvi akuaku’enji amutshiginyinego.
12 Athu agasue anyi amutshiginyile, waahanele luendu lua gubua ana a Nzambi, handaga ashile gutshigina mu jina dienji.
13 Ene avalewego mu mahatshi nga mu gutshigina gua muila, nga mu gutshigina gua muthu; uvi mu gutshigina gua Nzambi.
14 Ngenyi Mbimbi yabuile muthu,* yakhalele mukatshi dietu, nu tuamonele lutumbu luenji, lutumbu gifua lua mona mumoshi ha mumoshi* udi mukatuga gudi sh’enji; wakhalele waguzala nu khenda* jia Nzambi nu giamatshidia.
15 (Yone walongesele mukunda nu muene; yadiago, wazuelele mu dijui diakola egi: “Muthu yowu muene ngakhalele gumiwambela egi: ‘Muthu udi muza gungima diami wangubalega gukoma, handaga muene wadiangele gukhala gutuama egi ame nguvalewe.’”)
16 Luholo muene wakhalele waguzala pha nu khenda jiavula nu giamatshidia, esue nji tuahetele khenda jiavula gubalega.
17 Mukhuala wahanewe mu njila ya Moize. Uvi Nzambi watuvidile khenda jiavula nu watulongesele giamatshidia mu njila ya Yesu Klisto.
18 Gushigo nga muthu mumoshi wamonele gale Nzambi; phamba nzambi mumoshi ha mumoshi wavalewe, yonu udi hehi* nu Tata. Muene wakotelesele muabonga gula Tata udi nanyi.
19 Eji ndaga jiazuelele Yone tangua enya Yuda a gu Yelusalema atumile nganga-nzambi nu enya Levi ha gumuhula egi: “Aye udi nanyi?”
20 Watshiginyile ndaga yene, gayitunyilego, wazuelele egi: “Ame ngushigo Klisto.”
21 Ene amuhudile gamba: “Na udi nanyi? Aye udi Eliya ba?” Muene waavutudile egi: “Ndo.” “Aye udi Profete ba?” Muene wazuelele egi: “Ndo gami!”
22 Ene amuhudile egi: “Na udi giwa nanyi? Tuwambele hagula tuye tuhane mvutu gudi athu atutumi. Itshi udi muzuela mukunda nu aye hakhaye?”
23 Muene wazuelele egi: “Ame ngudi dijui dia muthu udi muta mukanda mu mavu a luselenga* egi: ‘Londenu njila ya Yehowa muabonga,’ gifua luholo luazuelele profete Yeshaya.”
24 Afalese atumile nganga-nzambi nu enya Levi ene.
25 Ene amuhudile egi: “Gula aye ushigo Klisto nga Eliya nga Profete, na mukunda natshi udi mubatiza giwa athu?”
26 Yone waavutudile gamba: “Ame ngudi mubatiza nu meya. Uvi gudi nu muthu mukatshi dienu mushigo mujiya,
27 udi muza gungima diami, ngushigo ngatagana ha gujitulula shinga jia saphata jienji.”
28 Ndaga eji jiakalegewe gu Betaniya ha sambua dia Muta wa Yordani, fundo diakhalele Yone mubatiza athu.
29 Lusugu lualanduile, wamonele Yesu muza gudi muene, wazuelele egi: “Talenu Mun’a Gimeme wa Nzambi udi mukatula gubola gua athu ha mavu!
30 Muthu yowu, muene ngakhalele gumiwambela egi: ‘Muthu udi muza gungima diami wangubalega gukoma, handaga muene wadiangele gukhala gutuama egi ame nguvalewe.’
31 Nu ame nji ngakhalelego gumujiya, gishina giene ngaza gumubatiza mu meya hagula enya Isalele amujiye.”
32 Yone wazuelele luko egi: “Ngamonele nyuma mubulumuga mu dilu gifua yembe, yamaganele holu dienji.
33 Ame nji ngakhalelego gumujiya, uvi Muthu wangutumine ha gubatiza athu mu meya wanguwambelele egi: ‘Muthu wagasue mbawumona nyuma muza mumagana holu dienji, jiya egi muene udi mubatiza mu nyuma ya Nzambi.’
34 Ngamonele ndaga yene, hene ngawambelele athu egi muthu yowu udi Mun’a Nzambi.”
35 Lusugu lualanduile, Yone wakhalele wamagana nu alandudi enji muyadi.
36 Hakhalele muene mutala Yesu muwenda, wazuelele egi: “Talenu Mun’a Gimeme wa Nzambi!”
37 Tangua alandudi mbadi avuile ndaga yene, alanduile Yesu.
38 Tangua diabalumugile Yesu gungima, waamonele wawa gumulandula, waahudile egi: “Itshi mudi mukamba?” Ene amuvutudile gamba: “Rabi (yakotelesa egi “Mulongeshi”), wana khala gui?”
39 Muene waawambelele gamba: “Izenu, mbamumona.” Ayile n’enji, amonele fundo diakhalele muene, asalele n’enji lusugu luene; yakhalele mu tangua dia nguana gungima dia midi.*
40 Andele, phangi’a Simona Phetelo, wakhalele mukatshi dia alandudi mbadi anyi avuile mbimbi jiazuelele Yone nu alanduile Yesu.
41 Wayile thomo mumona phangi’enji Simona, wamuwambelele egi: “Tuamona Masiya,” (yakotelesa egi “Klisto”).
42 Gungima wayile n’enji gudi Yesu. Hamumonele Yesu, wamuwambelele egi: “Aye udi Simona, mun’a Yone; mbawutamegewa egi Sefase” (yakotelesa egi “Phetelo”).
43 Lusugu lualanduile, Yesu wakhalele mutshigina guya gu Galilea. Wataganele nu Filipho, wamuwambelele egi: “Iza ungulandule.”
44 Filipho wakhalele muenya gu Betesayida, dimbo dia Andele nu Phetelo.
45 Filipho wayile mumona Natanaele, wamuwambelele gamba: “Tuamona muthu munu Mukhuala wa Moize nu Baprofete ana zuelela, jina dienji Yesu wa gu dimbo dia Nazaleta, mun’a Yozefe.”
46 Uvi Natanaele wamuwambelele gamba: “Gima giabonga giajiya guzoga mu Nazaleta ba?” Filipho wamuwambelele egi: “Iza gale umone.”
47 Hamonele Yesu Natanaele muza gudi muene, wazuelele egi: “Talenu muenya Isalele wa giamatshidia, muene gashigo nu mambo.”
48 Natanaele wamuhudile gamba: “Luholo lutshi wangujiya?” Yesu wamuvutudile egi: “Ngagumonyi tangua wakhadi ha mushin’a mutshi wa figi gutuama egi Filipho agutamege.”
49 Natanaele wamulezele egi: “Rabi, aye udi Mun’a Nzambi, udi Fumu wa Isalele.”
50 Yesu wamuvutudile egi: “Aye watshigina handaga ngaguwambela egi ngagumonyi tangua wakhala ha mushin’a mutshi wa figi? Mbawumona ndaga jiakoma gubalega eji.”
51 Yesu wazuelele luko egi: “Ngudi gumiwambela giamatshidia egi, mbamumona dilu dia gukanguga, anjelo a Nzambi adi mukanduga nu gubulumuga gudi Mun’a muthu.”
Mbimbi goshi'a diyiji
^ Mu Greke: muila.
^ Mu Greke: mona mumoshi ha mumoshi wavalewe.
^ Nga “khenda jiavula jia Nzambi.”
^ Nga “ha thulo ya Sh’enji.” Mbimbi eji jidi mumonesa egi wakhala nu ufuta wakola nu Sh’enji.
^ Nga “gishegele.”
^ Yakotelesa egi, mu tangua dia kumi
