Mukanda wa Yone 10:1-42
10 “Ngudi gumiwambela giamatshidia egi, muthu wagasue gashigo munginyina ha mufulo wa dinda dia imeme, uvi udi munginyina khanda iko, udi nzangi nu wana tambula athu ima gu ngolo.
2 Uvi muthu udi munginyila ha mufulo, muene udi mubambi wa imeme.
3 Mubambi wa mufulo wana gumuzuluila, imeme yana vua dijui dienji. Muene wana guyitamega mu majina ayo, wana guyituameza hanze.
4 Gula wazola imeme yenji yagasue, wana guya gutuama diayo; yene yana gumulandula handaga yana jiya dijui dienji.
5 Yanago gulandula muthu munu ishigo mujiya. Uvi yana gumulenga, handaga ishigo mujiya dijui dia muthu muene.”
6 Yesu waahanele gifezegeselo egi, uvi ene akhalelego mukotelesa ndaga jiakhalele muene guawambela.
7 Yesu wazuelele luko egi: “Ngudi gumiwambela giamatshidia egi, ngudi mufulo wa imeme.
8 Athu agasue ajile ha fundo diami, adi nzangi nu ana tambula athu ima gu ngolo. Uvi imeme yaavuidilego.
9 Ame ngudi mufulo; muthu udi munginyina gudi ame, mbawuhuluishiwa. Muene mbawungina, mbawuzoga nu mbawuheta ima ya gudia.
10 Nzangi yana za phamba ha gukuya nu gushiya nu gubolesa. Uvi ame ngajile hagula egi imeme ihete monyo nu iwuhete wavula.
11 Ame ngudi mubambi wabonga. Mubambi wabonga wana hana monyo wenji mukunda nu imeme.
12 Muenya mudimo munu gashigo mubambi nu yonu gashigo fumi’a imeme, gula wamona mbulu muza, wana bemba imeme nu wana lenga—mbulu yana kuata imeme nu yana guyimuanga—
13 handaga muene udi muenya mudimo nu gana gudisagesa ndo mukunda nu imeme.
14 Ame ngudi mubambi wabonga. Ngana jiya imeme yami, imeme yami nji yana gungujiya.
15 Luholo Tata wangujiya, ame nji ngana jiya Tata. Ngudi muhana monyo wami mukunda nu imeme.
16 “Ame ngudi nu imeme iko, ishigo mu dinda didi, ngudi naye nji guyinginyisa mu dinda. Yene mbayivua dijui diami, mbayibua hunji dimoshi, mubambi mumoshi.
17 Gishina giene Tata wana gunguzumba, handaga ngudi muhana monyo wami hagula nguwuhete luko.
18 Gushigo nga muthu wajiya gungutambula nawo; uvi ngudi guwuhana mu gutshigina guami. Ngudi nu ngolo jia guwuhana nu ngolo jia guwuzula luko. Wuwu mukhuala ngahetele gudi Tata wami.”
19 Enya Yuda adikhaphumuine luko mukunda nu mbimbi eji.
20 Athu avula mukatshi diawo akhalele muzuela egi: “Muene udi nu demo, udi muenya maluwi. Mukunda natshi mudi gumutegelela?”
21 Ako akhalele muzuela egi: “Muthu udi nu demo gajiyilego guzuela mbimbi jia luholo elu. Demo diajiya gukangula meso a gifofo ba?”
22 Mu tangua diene, Wano wa Gukangudiwa gua Tempelo wakhalele gu Yelusalema, yakhalele mu sungi ya guhuma.
23 Yesu wakhalele muwenda mu tempelo mu mbalanda ya Solomo.
24 Enya Yuda amujietele, asendesele gumuhula egi: “Mukunda natshi ushigo gutuwambela gula udi nanyi? Gula udi Klisto, tuwambele haphelo.”
25 Yesu waavutudile egi: “Ngamiwambela gale, uvi enue mushigo mutshigina. Midimo ngudi mukalagala mu jina dia Tata wami, yene idi muzuela mukunda nu ame.
26 Uvi enue mushigo mutshigina, handaga mushigo imeme yami.
27 Imeme yami yana vua dijui diami; ngana guyijiya, yene yana gungulandula.
28 Ame ngudi guyihana monyo wa ivo nu ivo. Yene mbayishigo mufua nga hazonda. Gushigo nga muthu mumoshi mbawuyitambula ha mago ami.
29 Gima gianguhanele Tata gidi nu ndando gubalega ima iko yagasue. Gushigo nga muthu wajiya gutambula imeme ha mago a Tata.
30 Ame nu Tata tudi muthu mumoshi.”*
31 Enya Yuda anonele luko maseso ha gumusonona.
32 Yesu waavutudile egi: “Ngamimonesa midimo yavula yabonga yakatuga gudi Tata. Mukatshi dia midimo eyi, mudimo utshi mudi gungusonuena maseso?”
33 Enya Yuda amuvutudile egi: “Tushigo gugusonona maseso mukunda nu mudimo wabonga, uvi mukunda nu mashingo; handaga aye udi muthu, uvi udi gudibuisa nzambi.”
34 Yesu waavutudile egi: “Ishigo yagusonega mu Mukhuala wenu egi, ‘Ngazuelele egi: “Mudi jinzambi”’?*
35 Gula muene watamegele athu anyi mbimbi ya Nzambi yana fuisa milonga egi “jinzambi”—mukanda wa Nzambi wajiyilego gusombegesa—
36 ame Tata wangubuishile wagijila, hene wangutumine ha mavu. Luholo lutshi giwa mudi gunguwambela egi, ‘Ngashingana,’ handaga ngazuela egi, ‘Ngudi Mun’a Nzambi’?
37 Gula ngushigo mukalagala midimo ya Tata wami, mutshiginago ndaga jiami.
38 Uvi gula yene ngudi mukalagala, nga muatuna genu gungutshigina, tshiginenu genu midimo yene, hagula mukotelese nu mulandule gujiya egi ame nu Tata tuana gudivua muabonga.”
39 Akambele gumukuata luko, uvi muene walengele.
40 Wayile luko ha sambua dia Muta wa Yordani, fundo diakhalele Yone mubatiza thomo, nu wasalele guene.
41 Athu avula akhalele muza gumutala, akhalele muzuela egi: “Yone gakalegelego nga ndaga imoshi ya gushimana. Uvi ndaga jiagasue jiazuelele muene mukunda nu muthu yowu, jidi jia giamatshidia.”
42 Athu avula akhalele hene, ashile gutshigina gudi muene.
