Mukanda wa Yone 11:1-57
11 Guakhalele nu muthu mumoshi, jina dienji Lazalo, wakhalele mukata. Gumbo diawo gu Betaniya, dimbo dia Madiya nu phangi’enji Mata.
2 Madiya yowu, muene wambile Fumu mananashi nu wakukumuine ikanzo yenji nu sanga dienji; phangi’enji Lazalo wakhalele mukata.
3 Aphangi’enji a akhetu atumine mbimbi gudi Yesu egi: “Fumu, muthu wana zumba muavula udi mukata.”
4 Uvi havile Yesu ndaga eyi, wazuelele egi: “Misongo eyi ishigo mukunda nu gubata gu gufua. Uvi idi mukunda nu gutumbuisa Nzambi, hagula Mun’a Nzambi atumbuishiwe mu njila yenji.”
5 Yesu wakhalele muzumba Mata nu phangi’enji wa mukhetu nu Lazalo.
6 Uvi havile muene egi Lazalo udi mukata, wasalele luko fundo diakhalele muene masugu mbadi.
7 Gungima, wawambelele alandudi egi: “Tuyenu luko gu Yudea.”
8 Alandudi amuwambelele egi: “Rabi, masugu abalega, enya gu Yudea akhalele mukamba gugusonona maseso, henyaha uvutuge luko guene?”
9 Yesu waavutudile egi: “Lusugu lumoshi luakhalago nu matangua 12 ba? Gula muthu udi muwenda mu lusugu, gushigo nga gima gimoshi giana gumukhakhuisa, handaga muene udi mumona muanya wa ha mavu.
10 Uvi gula muthu udi muwenda mu phipha, wana khakhuga handaga muanya ushigo mukatshi dienji.”
11 Hamanesele muene guzuela ndaga eji, wazuelele luko egi: “Futa dietu Lazalo udi mubanda tulo, uvi ngudi muya guene ha gumuzugisa.”
12 Alandudi amuwambelele egi: “Fumu, gula udi mubanda, udi muza muvua muabonga.”
13 Yesu wakhalele muzuelela gufua gua Lazalo, uvi ene akhalele mutangiza egi udi muzuela egi wabandji ha guhuluguga.
14 Hene Yesu waawambelele haphelo egi: “Lazalo wafui.
15 Ame ngudi musuanguluga mukunda nu enue luholo ngakhalelego guene, hagula enue mushe gutshigina. Uvi tuyenu fundo didi muene.”
16 Toma, yonu wakhalele mutamegewa egi phasa, wawambelele alandudi ako egi: “Esue nji tuyenu, hagula tuye tufue n’enji.”
17 Hahetele Yesu, wasangele Lazalo wabalegesa gale masugu nguana mu malumba.*
18 Dimbo dia Betaniya diakhalele hehi nu Yelusalema, ha mutango wa bakilometre thathu.*
19 Enya Yuda avula ajile gudi Mata nu Madiya ha guawalagana mukunda nu gufua gua phangi’awo.
20 Havile Mata egi Yesu yowu muza, wayile ha gumutagana. Uvi Madiya wasalele hashi monzo.
21 Mata wawambelele Yesu egi: “Fumu, nga wakhalele haha, nga mun’etu gafilego.
22 Uvi henyaha ngudi mujiya egi yagasue mbawutoga gudi Nzambi, muene mbawuguhana nayo.”
23 Yesu wamuwambelele egi: “Phangi’aye mbawufuzumuga.”
24 Mata wamuwambelele egi: “Ngudi mujiya egi mbawufuzumuga mu gufuzumuga gua athu mu lusugu lua gisugishilo.”
25 Yesu wamuwambelele egi: “Ame ngudi gufuzumuga nu ngudi monyo. Muthu wagasue washa gutshigina gudi ame, nga wafua genji, mbawuheta luko monyo;
26 muthu wagasue udi nu monyo nu washa gutshigina gudi ame, mbagashigo mufua nga hazonda. Aye watshigina ndaga eyi ba?”
27 Mata wamuwambelele egi: “Ayi Fumu. Ngudi musha diago gutshigina egi eye udi Klisto Mun’a Nzambi, yonu udi naye guza ha mavu.”
28 Hazuelele muene ndaga eji, wayile mutamega phangi’enji Madiya. Wamuwambelele mu gisuegi egi: “Mulongeshi udi haha, udi gugutamega.”
29 Havile Madiya ndaga eji, wazugile gatshididi, wayile gudi muene.
30 Yesu wakhalele khenji gangina galego mu dimbo; wakhalele ha fundo Mata gajile gumutagana.
31 Enya Yuda akhalele nu Madiya monzo ha gumuwalagana. Tangua amumonele muzoga mu phushi hanze, amulanduile handaga atangijile egi udi muya gu malumba* ha gudila guene.
32 Hahetele Madiya fundo diakhalele Yesu nu hamumonele muene, wabuile mu malu enji, wazuelele egi: “Fumu, nga wakhalele haha, nga mun’etu gafuilego.”
33 Hamonele Yesu Madiya nu enya Yuda anyi ajile n’enji mudila, wavile gikenene mu mutshima* nu wadisagesele.
34 Waahudile egi: “Muamuhagi gui?” Ene amuwambelele egi: “Fumu, iza utale.”
35 Yesu wazolele masoji.
36 Enya Yuda asendesele guzuela egi: “Tala, wakhalele gumuzumba muavula!”
37 Ako azuelele egi: “Muthu yowu wakanguile meso a gifofo, muene gakhalelego naye gukanga njila egi Lazalo gafuigo ba?”
38 Yesu wavile luko gikenene, gungima wayile gu malumba.* Malumba ene asongewe mu seso, akhalele nu seso dia gukanga ha mufulo.
39 Yesu waawambelele egi: “Katulenu seso.” Uvi Mata, phangi’a muthu wafile, wazuelele egi: “Fumu, idi naye gukhala egi udi gale muzoga vumba, handaga masugu nguana abalega gale.”
40 Yesu wamuwambelele egi: “Ngagulezelego egi gula udi nu gutshigina, eye mbawumona lutumbu lua Nzambi ba?”
41 Hene akatuile seso. Gungima Yesu watuphuile meso gosa, wazuelele egi: “Tata, ngudi guguhana mersi luholo wanguvuila.
42 Yadiago, ame mujiya egi wana gunguvuila tangua diagasue. Uvi ngudi muzuela mukunda nu athu adi haha hagula atshigine egi eye wangutumine.”
43 Hamanesele Yesu guzuela ndaga eji, wakalugile mu dijui diakola egi: “Lazalo, zoga!”
44 Muthu yonu wafile, wazogele, malu enji nu mago enji akhalele a gulanga ibanji; phala yenji yakhalele yagukanga nu mulele. Yesu waawambelele egi: “Mujitululenu, mubembenu aye.”
45 Enya Yuda avula anyi ajile nu Madiya, amonele ndaga yakalegele Yesu, ashile gutshigina gudi muene.
46 Uvi ako ayile mutela Afalese lumene lua ndaga yakalegele Yesu.
47 Mafumu a nganga-nzambi nu Afalese, abungishile enya Sanedrene, azuelele egi: “Itshi tukalagala handaga muthu yowu udi mutshita ndaga jiavula jia gushimana?
48 Gula tuamubemba ngenyi, athu agasue mbaasha gutshigina gudi muene. Ngenyi enya Roma mbaaza mutambula fundo* dietu nu gifutshi gietu.”
49 Uvi muthu mumoshi mukatshi diawo, jina dienji Kayifa, wakhalele nganga-nzambi wakoma mu givo giene. Waawambelele egi: “Enue mushigo mujiya nga gima.
50 Mushigo mukotelesa egi, idi mukunda nu gubonga guenu egi muthu mumoshi afue mukunda nu athu agasue, ha fundo egi gifutshi giagasue gishiyiwe.”
51 Ndaga jiazuelele muene, jiakatugilego gudi muene hakhenji; uvi luholo luakhalele muene nganga-nzambi wakoma mu givo ginyi, wadiangele guzuela egi Yesu wakhalele naye gufua mukunda nu gifutshi.
52 Yakhalelego phamba mukunda nu gifutshi, uvi yakhalele nji mukunda nu gubungisa ana a Nzambi agasue anyi amuanganele hagula akhale nu gudivua guabonga.
53 Sendese lusugu lunu, ayile giphungi ha gumushiya.
54 Hene, Yesu gakhalelego luko muwenda ha meso a athu avula mukatshi dia enya Yuda; uvi wayile gu khanda iko hehi nu mavu a luselenga, gu dimbo dia Efelayima. Wakhalele guene nu alandudi enji.
55 Uvi Wano wa Pake wa enya Yuda wasuenele hehi. Athu avula a mu membo a hehi, akandugile gu Yelusalema gutuama dia wano ha gudiphelegetesa gifua luholo mukhuala wakhalele mutoga.
56 Akhalele mukamba Yesu; akhalele muzuela mukatshi diawo tangua akhalele mu tempelo egi: “Itshi mudi mutangiza? Muene udi muza gu wano nga ndo?”
57 Uvi mafumu a nganga-nzambi nu Afalese awambelele athu egi, muthu wagasue wajiya fundo didi Yesu, udi naye guawambela hagula amukuate.
Mbimbi goshi'a diyiji
^ Nga “malumba a guwunguluga.”
^ Mu Greke: “Ba stade 15.”
^ Nga “malumba a guwunguluga.”
^ Mu Greke: “mu nyuma.”
^ Nga “malumba a guwunguluga.”
^ Yakotelesa egi, tempelo.
